Feeds:
Posts
Comments

Archive for the ‘Ulaon Habot Ni Roha(Duka Cita)’ Category

Molo marujung ngolu ni sasahalak tarlumobi naung marhasohotan (hot ripe) somal dipatupa do parrapoton (tonggo raja). Molo naposo dope na monding i somalna didok marhata raja ima dalan laho manariashon jala pabotohon jujur ngolu ni namonding jala sangkap ni hasuhuton tu dongan sahuta tarlumobi tu Tulang ni namonding i. Diama naporlu sihobasan namarpardomuan tusi ?.

Tarsongon on ma pardalanna.
Dung marujung ngolu ni sasahalak pintor dipabotohon ma tu horong ni hasuhuton (sapanganan). Dungi mardos ni roha ma nasida dohot hasuhuton bolon manaringoti sangkap ni hasuhuton isarana andigan ma disangkapi tu udean, didia udeanna dohot lan naasing. Paidua ni hasuhuton (ompu martinodohon) ma namanguluhon sude na hombar laho pabotohon namasa i dohot sangkap nasida laos pabotohon andigan parrapoton (tonggo raja) tu angka dongan tubu, boru, dongan sahuta, huria suang songoni nang tu horong ni Hulahula dohot Tulang (mangihut ma Bona Tulang, Tulang Rorobot sahat tu Bonaniari – hombar tu parmonding ni namonding – sarimatua-saurmatua).
Dung sahat boa-boa habot ni roha tu saluhut sisolhot laos manigor ma dihobasi angka naringkot tu ulaon tonggo raja isarana tenda, kursi, sipagogo suara(sound system) dohot sipanganon nahombar tu tonggo raja. Molo pinomat nunga sarimatua namonding i, ingkon patupaon ni hasuhuton do sipanganon namarsaudara (martudutudu sipanganon), alai molo ditoru ni sarimatuai dope ndang ingkon patupaon sipanganon namarsaudara. Lapatanna molo tung dipatupa hasuhuton pe sipanganon boi ma rambingan. Molo na so marhasohotan dope na monding i ndang talup patupaon ni hasuhuton sipanganon.
Molo di tano parserahan on alani angka partingkian nunga somal migor dipasahat tu “parkatering” . Alani i ingkon mangalapik hata do hasuhuton tu horong ni boru dohot dongan sahuta (jagar hata). Na porlu siparateatehon sotung magodanghu dipatupa sipanganon gabe lobi hape taboto do tangkas: Pitu batu martindi sada do sitaon nadokdok (manang aha pe sude do i peak tu hasuhuton, alani i unang gogo mandok, ingkon tiroanta do hasuhuton). Mansai porlu ingotonta taringot tu sipanganon, sadia godang pe tapatupa na laho suda do, alai mo tung hurang pe napatupa maradophon torop ni situan natorop na ro manungkir (pelayat) ndang masa manarita ala ulaon habot ni roha do, toho di ulaon las ni roha molo hurang sipanganon na dipatupa hasuhuton haurahan ma nasida ala ndang taruli sipanganon na niontang na.
Molo dung ditontuhon parrapoton bodarion isarana pukul 20.00 Wib, pintor digorga hasuhuton dohot paidua ni hasuhuton (dibuat draft) tarsongon on ma:
Jujur ngolu ni namonding ima mulai sian napomparhon na monding i pinomat (saotikotikna) 3 sundut tu ginjang ima ompung ni amongna margoar …. jala marhuta didia/sian dia hutana – piga anakna, anak ni i ima ompungni namonding on margoar …. – piga anakna, anak ni i ima among ni namonding margoar ….. piga anakna dohot boruna digoari sude, sahat ma tu namonding on andigan tubu, marhasohotan, piga dakdanak naung pinalumen ni Tuhanta, dipatorang angka naung marhasohotan anak mangalap boru ni raja i raja ……. sian (hutani hulahula i)- piga pahompu sian nasida, molo boru marhamulian tu anak ni parboruannami raja…. sian (hutani natoras ni hela i) piga pahompu sian nasida. Dungi dipadomu ma sude pinompar ni naung marujung ngolu i toropna ……
Catatan: mansai denggan do molo boi ta gorga sahat tu pardomuanta tu paidua ni hasuhuton, isarana molo hami Sitorus na sian Lumban Tongatonga Silamosik, ahu nunga disundut pasampululimahon (generasi ke 15 dari Sitorus), jala di sundut pasampuluhon(generasi ke 10) ma pardomuan ni ompunami opat namarhaha maranggi.
Riwayat parsahiton ni namonding, pajojoronta ma parsahiton ni namonding i sahat tu parmondingna.
Sangkap ni hasuhuton taringot tu partuat ni monding, isarana Partangiangan (mate makkar), Sarimatua manang Saur Matua hombar tu hagabeon/pinompar ni namonding i.
Denggan ma sude i disurat disada buku, dung i dipasahat ma annon botari tu natuatua ni punguan marga asa nasida marsiaturan ise na laho manariashon di ulaon tonggo raja (Raja Parhata ma namangaturhon saluhutna i).
Horong ni hasuhuton dohot dongan tubuna nunga ingkon mangarade di inganan partonggoan ni raja pinomat pukul 19.00 Wib. Ingkon jumolo do ro hasuhuton dohot dongan tubuna sian sude horong ni Hulahula dohot Tulang, sada hailaon do i di hasuhuton molo gabe Hulahula dohot Tulang paima haroroni hasuhuton namardongan tubu.
Dung jumpang tingkina, mardos ni roha ma namardongan tubu ise na gabe protokol, dung i marhuhuasi ma protokol asa rap marnatampak nasida namardongan tubu, dongan sahuta, boru dohot ale-ale.
Protokol
“ Loloan namarhabot ni roha (sarimatua/saurmatua), ala nunga jumpang tingkina hombar tu boaboanami hasuhuton bolon, borngin on patupaonta do ulaon parrapoton songon tonggo raja laho manariashon jala mangido panuturion hami hasuhuton sian horong ni Hulahula dohot Tulang taringot tu parmonding dohot ulaon partuatni ama/ina nanung jumolo marujung ngolu sian tongatonganta, alani i asa marnatampa ma hita rap hundul, suang songoni ma nang dihamu Raja ni Dongan Sahuta nami, didok natua-tua jonok dongan tubu jumonokan dongan parhundul. Amang Raja hamu do dongan parhundul ni hasuhuton nami di hutaon, alani i gomos hupangido hami asa tuturi hamu hami jala rap hita mangadopi horong ni Hulahula dohot Tulang nami. Suang songoni ma nang dihamu borunami asa mangarade ma hamu jala sigap laho manghobasi naringkot tu parrapoton on. Mauliate ma.”
Dungi diuduti manangkasi Hulahula dohot Tulang, didompakhon ma tu nasida.
“Amanta Raja dohot Inanta Namoragabe, Raja nami raja bolon, hombar tu boaboa nami rajanami nunga jumpang tingkina laho patupahon ulaon parrapoton, molo sian hami horong ni parboruon muna nunga mangarade hami raja nami laho mangido panuturion siang saluhut hamu nahuparsangapi hami. Alani i rajanami (digorahon sude horong ni Hulahula dohot Tulang) nunga hupatupa hami inganan hundulan ni Raja i dohot angka Nantulangnami, boha Raja nami nunga tipak hundulanni Rajai ?. (Somalna dialusi : Nunga) laos didok protokol ma : Mauliate ma Rajanami. Boha di roha ni raja i, adong dope sipaimaonta manang nunga boi pungkaonta panghataion, partingkian on hupasahat hami tu raja i.
Horong ni Hulahula dohot Tulang.
Somalna mangido partingkian nasida laho marsiaturan ise nasida nalaho gabe Raja Panuturi di parboruon nasida. Somalna mardos ni tahi jo parjolo Hulahula dohot Tulang, dung dos tahi nasida diuduti ma muse mardos tahi ise na gabe Raja Panuturi.

Raja Panuturi:
Dihamu raja ni parboruonnami nunga dos roha nami jala satahi hami horong ni Hulahula dohot Tulang molo tung sada silompa gadong, dua silompa puli, molo tung ahu pe namanghatahon saluhut do hami horong ni Hulahula dohot Tulang na gabe panuturi dihamu parboruon nami (somal sahundulan–sejejer do parhundul ni Hulahula dohot Tulang), alani i nunga mangarade hami asa partingkian on pe hupasahat hami ma tu hamu, botima.

Protokol:
Mauliate malambok pusu ma hami raja nami ala tangkas do dihatahon raja i naung mangarade raja i laho manuturi hami parboruonmuna.
Antong dihita namarhahamaranggi, suang songoni nang di raja ni dongan sahuta nami, ala naeng mangido panuturion ma hita sian horong ni Hulahula dohot Tulangta asa dos ma rohanta ta pasahat ma tu natua-tua i…….. (nunga ditodo hian ise nagabe Raja Parhata).
Raja Parhata (didompakhon ma bohi na tu nasida namardongan tubu):
Dihita namarhaha maranggi pomparan ni ompunta Raja ……. , mauliate ma didos ni tahinta. Tongon ditingki on dipabangkit hamu ahu nalaho mangido panuturion diparrapoton natapatupa diborngin on. Alani i dibagasan unduk dohot serep ni roha, huhalashon jala rade ma ahu laho mangulahon i, botima.
Dungi didompakhon ma bohina tu horong ni Hulahula dohot Tulang didok ma hatana:
Suang songoni ma dihamu nahuparsangapi hami… (dijahahon ma sude daftar horong ni Hulahula dohot Tulang), Raja nami, raja bolon ala naeng pungkaonta ma parapoton tarsongon ma nian pangidoan nami rajanami :
1. Parjolo ma hami pasahat tudu-tudu sipanganon (keterangan lihat catatan huruf tebal perihal sipangangon na marsaudara).
2. Udut tu si jahahonon nami ma jujur ngolu ni ama/ina naung jumolo monding, dohot riwayat parsahitonna sahat rodi tu parmondingna
3. Dungi tariashonon nami ma angka naung husangkapi/hurangrangi hami dungi mangido panuturion ma hami sian hamu nahuparsangapi hami Hulahula dohot horong ni Tulang suang songoni nang Raja ni dongan sahuta nami.
4. Mangampu ma hami hasuhuton,
5. Hulahula Mangujungi parrapoton (ditutup marhite tangiang)
6. Mompo / pamasuk tu jabujabuna.
7. Mangampu Bona ni Hasuhuton (paidua ni hasuhuton)
8. Marsipanganon
Boha rajanami tuturi hamu hami, molo nunga uli diroha ni raja i asa borhat ma hami pasahat tudu-tudu ni sipanganon.
Raja Panuturi:
Mauliate ma amangboru, nunga mansai uli indok roha nami on pe ulahon hamu ma.

1. Pasahat Tudutudu Sipanganon
Raja Parhata (didompakhon ma bohi na tu boru nasida):
Dihamu raja ni parhobas nami, boru nami asa boan hamu tu son tudutudu ni sipanganon asa borhat hami pasahathon tu Raja i.
Dung dipeakhon diadopan ni Hulahula dohot Tulang, diuduti Raja Parhata ma mandok:
Raja nami raja bolon, tangkas do hupangkilalahon hami denggan basa ni Amanta Debata tu hami parboruonmuna, Hata ni Tuhanta tarsurat di Filifi 4: 4 mandok: Marlas ni roha ma hamu tongtong dibagasan Tuhan. Namarningot ima hami ditingkion, nang pe tongon dibagasan habot ni roha hami tongtong do hami mandok mauliate tu Tuhan i ala tangkas do dipargogoi hami jala marparbue holong na sian Tuhan i dihita tarlumobi ma i disaluhut hamu nahuparsangapi hami namarholong ni roha dihami rade rohamuna ro manopot hami mangadopi boaboa nami diparmonding ni ama/ina na tahaholongi on. Ala ni raja nami molo tung hupatupa hami pe sipanganon namarsaudara dalan nami ma i rajanami laho manghalashon denggan basa ni Tuhanta suang songoni pasangaphon hamu hulahula nami. Asa sitiktik marsigompa golang-golang pangarahutna, tung songon on pe naboi hupatupa hami rajanami, Debata ma napasahat pasupasuna hombar tu lomo ni rohana. Dame nasumurung i ma na tongtong mian ditongatonganta, Amen, Botima Rajanami.
Raja Panuturi (Hulahula dohot Tulang ndang pola pasahat dengke).
Imma tutu, mauliate ma amangboru nunga dipasahat hamu tudutudu ni sipanganon, anggiat ma tutu songon tangiangmuna i, Debata ma namampargogoi hamu namarhabot ni roha, dilehon ma antong dihita ganup dame jala holong tongtong mian ditongatonganta. Amangboru tangkas do huboto hami anakni raja do hamu jala nabisuk, alani I amangboru taringot tu tudutudu ni sipanaganon naung pinatupa muna on asa denggan ma dihobasi berenami boru muna hombar tu solup namasa dihuta muna on, botima amangboru, laos uduti hamu.
2. Manjaha Jujur Ngolu ni namonding
Raja Parhata : Mauliate malambok pusu ma hami raja nami, rade ma hami mangulahonsa. Dihita namarhahamaranggi, hombar tu panuturion ni raja i asa tatuturi borunta laho pature tudutudu sipanganon on hombar tu solup namasa dihutanta. Boru nami, pature hamu tudutudu ni sipanganon on jala tangkas pasahat hamu tu hasahatanna. (somalna sahalak sian hasuhuton borhat mangihuthon parhobas laho manuturi boru nasida).
Raja nami raja bolon nuaeng pe udutan nami ma rajanami manjahahon jujur ngolu ni ama/ina naung jumolo marujung ngolu on. (somalna paidua ni hasuhuton do manjahahon). Dung sidung i laos diuduti Raja Parhata ma manariashon sangkap nasida.
3. Manariashon sangkap ni hasuhuton.
Raja Parhata:
Dihamu nahuparsangapi hami, Hulahula dohot Tulangnami (dijahahon sude horong ni Hulahula dohot Tulang), hombar tu jujur ngolu dohot riwayat parsahiton rodi parmonding ni ama/ina nami naung jumolo marujung ngolu on, nunga hurangrangi asa mangido panuturion ma hami tu hami nahuparsangapi hami, tarsongonon ma nanaeng siulahonon:
1. Pangidoan nami rajanami partuatni ama/ina nami on : …….. (misal sari matua/saurmatua)
2. Laos borngin on ma mompo tu jabujabuna.
3. Partuatna marsogot di ari …….. jala suanon/ tu udean di …………… (TPU….)
4. Boanna rajanami ……… (lombu sitio natinutungan – manang hombar tu hagabeon ni namonding)
5. Molo siat pangidoannami taringot tu ulos tarsongonon ma nian rajanami:
Ulos Saput sian Tulang nami apala Tulang ni ama/ina na monding on ima Raja i Raja …….
(catatan: sasintongna Tulang ni namonding do napasahat saput)
Ulos Tujung (saurmatua = ulos sampe tua) sian Hulahula nami (parboru) Raja i Raja ………
Ulos Holong (pinomat ingkon naung sarimatua do asa talup manjalo ulos holong).
Tarsongon ima naung hurangrangi hami, on pe rajanami asa tuturi hamu hami dia ma nanaeng siulahonon nami.
Raja Panuturi
Mauliate ma amangboru, nunga tangkasi dijahahon hamu jujur ngolu dohot riwayat ni lae/iboto nami naung marujung ngolu on, laos nunga ditariashon hamu angka naung nirangrangan muna, onpe mangido panuturion hamu sian hami saluhut horong ni Hulahula dohot Tulang, andorang so hupasahat hami panuturion asa lehon hamu ma jolo partingkian tu hami, mauliate.
Didompakhon ma bohina tu horong ni Hulahula dohot Tulang.
Dihita horong ni Hulahula dohot Tulang, nunga rap umbegesa hita di jujur ngolu dohot riwayat ni lae/ibotonta suang songoni di sangkap dohot pangidoan nasida, on pe asa denggan ma tatuturi nasida. Partingkian on parjolo hupasahat hami tu hamu haha parhundul nami (Tulang ni hasuhuton) Raja i Raja…… (mangalehon pandapot manolopi manang ndang dipangidoan ni hasuhuton). Molo ama do namonding, nasida ma napasahat saput, jadi sungkunon nasida ma jam piga ma haradeon ni hasuhuton manjalo haroro nasida. Molo pinomat nunga sarimatua namonding i laos hatahonon ni nasida ma piga ulos holong sipasahatonna dohot hasahatanna. Dung sidung Tulang diuduti ma muse tu Hulahula.
Molo ditoruni sarimatua do partuatni namonding i holang Hulahula dohot Tulangni namonding do na talup pasahat ulos, jala ndang mardalan ulos holong. Alai molo sarimatua/saurmatua ba sude ma ris horong ni Hulahula dohot Tulang mangelehon panuturion dohot manghatahon ulos holong sipasahaton nasida dohot hasahatanna.
Dung singhop sude, dipaampuhon Raja Panuturi ma tu Raja Parhata ni hasuhuton.
4. Mangampu hasuhuton.
Andorang so mangampu hasuhuton,
Raja Parhata mangido panuturion sian dongan sahuta.
Mauliate godang ma hupasahat hami tu hamu salauhut horong ni Hulahula dohot Tulang nami, Rajanami andorang so mangampu hami asa lehon hamu jo partingkian tu hami laho mangido panuturion sian Raja ni Dongan Sahuta nami.
Suang songoni ma di hamu nahuparsangapi hami raja ni dongan sahuta nami, tangkas do dipaihutihut hamu hami dipanghataionnami tarlumobi dinamangido panuturion hami sian saluhut horong ni Hulahula dohot Tulang, on pe rajanami on ma ombas na hami mangido panuturion siang hamu diangka panghataionnami atik tung adong na hurang lobi asa tuturi hami hami rajanami.
Raja ni Dongan Sahuta:
Mauliate ma dihami hasuhutonnami, mansai las rohanami jala sangap do antong hami dibahen hamu. Nuaeng pe di namangido panuturion hamu, dohonon nami tangkas do hupaihutihut hami hami dipanghataion muna dohot Hulahulamuna raja…. , Tulang Raja…..
Tangkas do huida hami songon nidok ni umpama:
Aek godang tu aek laut, Dos ni roha sibaen na saut. Tangkas do huida hami dos nirohamuna dinamangido panuturion hamu laos tangkas do dituturi saluhut horong ni Hulahula dohot Tulang hamu hasuhuton nami, on pe antong dohonon nami ma songon nidok ni umpasa:
Balintang ma pagabe tumundalhon sitadoan, arimu ma antong namarhula marboru gabe ala tangkas do hamu hupaihutihut hami marsipaolooloan.
Molo hami dongan sahuta rade ma hami mangurupi hami hasuhuton nami, dung simpul parrapoton on angka diama na naeng siulahonon nami denggan ma annon pasahat hamu tu hami, olat ni tarula hami patupaon nami do angka nadenggan, botima.
Raja Parhata:
Mauliate ma dihamu raja ni dongan sahutanami, tung mansai las rohanami dihata nauli hata nadenggan naung pinasahatmuna.
Saonari sahat ma partingkian tu hita hasuhuton laho mangampu, asa rap jongjong ma hita.
Baca tulisan saya lainnya yang sudah menjelaskan filosipi mangampu.
5. Simpul parrapoton, diujungi Hulahula marhite tangiang.

6. Mompo tu jabujabuna.
Digora protokolma nasida namardongan tubu diurupi boru laho pamasukhon bangke ni namonding I tu jabujabuna. Dung singhop dijouma Tulang dohot Hulahula laho patupa ulaon mompo. Somal dibuha marhite ende dohot tangiang, mandok hata, marende, diujungi dohot tangiang.
7. Mangampu Bona ni Hasuhuton (paidua ni hasuhuton)
Mandok mauliate siala naung denggan mardalan ulaon parmompo ni namonding i laos diuduti tangiang marsipanganon.
8. Marsipanganon
Laos marsingkat soring ma angka namarholong ni roha patupa pangapulion laho patoguhon haporseaon ni pinompar ni namonding i.

Songon i ma naboi pinaandar, anggiat ma manghorhon tu nadenggan jala gabe parsiajaran diangka naringgas roha laho marsiajar diangka paradatonta halak Batak.

Catatan:
Untuk mewujudkan tulisan ini butuh pengorbanan waktu, pikiran, tenaga dan materi. Setiap yang saya tulis adalah apa yang sudah saya lakukan (realita bukan teori).
Oleh karenanya mohon dengan sangat apabila hendak memposting ulang di blog lain agar menyebut sumbernya dan memberikan link (surel) ke blog kami http://sitorusdori.wordpress.com/2013/06/27/jujur-ngolu-dohot-tonggo-raja/
Jujur saya kecewa menemukan banyak tulisan saya di posting ulang diberbagai blog namun dibuat seolah-olah tulisan dari si yang empunya blog. Kekecewaan inilah yang membuat saya kurang bersemangat menulis, karena plagiator dengan cepat hanya copy paste sementara saya berjam-jam bahkan berhari-hari dan tak jarang harus begadang agar dapat menyelesaikan satu topik tulisan.

Tabe mardongan tangiang,

St. Sampe Sitorus/br Sitanggang (A. Hitado Managam Sitorus)- 08129052462.

Read Full Post »

Di ulaon habot ni roha andorang so manjaha Riwayat Hidup ni namonding sai jumolo do marhuhuasi paidua ni hasuhuton. Tarsongon on ma partordingna.

Dung di jahahon protokol partording ni ulaon (susunan acara) somalna pintor di uduti do dohot huhuasi dohot manjaha jujur ngolu sian paidua ni hasuhuton. Tarsongon on ma isarana (contoh) di ulaon Mate Mangkar:

Paidua ni hasuhuton

Loloan namarhabot ni roha, Amanta Raja dohot Inanta Soripada, Nahuparsangapi hami Hula-hulanami Raja…. sian ….. , Tulang nami Raja …… sian……, Bona Tulang nami Raja …… sian ……, Tulang Rorobot nami Raja ….. sian …… (dst sesuai daftar horong ni hula-hula na ro tu ulaon i), nang pe dibagasan habot ni roha, tama do hita mandok mauliate tu Amanta Debata Pardenggan Basa i, siala asi dohot holong ni rohana na tontong mangiring-iring hita tarlumobi ma di saluhut hamu namanghaholongi hami. Mauliate ma hupasahat hami diharoro hamuna di napatuduhon holong hamu jala pasahathon hata apul-apul hata togar-togar laho manungkol-nungkoli hami namarhabot ni roha tarlumobi mai bona ni hasuhuton nami.

Amang Raja, Inang Soripada, jongjong ahu dison marhuhuasi songon paidua ni hasuhuton, mauliate malambok pusu ma dohonon nami siala haroro muna. Tangkas do dipatuduhon hamu holong na sian Tuhanta i marhite pambahenanmuna, tarlumobi ma i di nasogot di parnangkok ni mataniari nunga dipasahat Tulangnami Rajai Raja….(sebutkan marganya) Ulos Saput ni amanami naung bostang tapaadoadopon, anggiat ma antong songon tangiang ni angka datulang manaputi nauli manaputi nadenggan ma i tarlumobi ma di hami natinandingkon ni amanami on. Udut tusi nunga dipasahat Hulahulanami Rajai Raja….(sebutkan marganya) Ulos Tujung tu simanjujung ni ina nami. Asa tangkas ma antong naung onding amanami sian tongatonga nami. Amang Raja, Inang Soripada saluhut hamu na huparsangapi hami namanghaholongi hami, tung mansai gomos do pangidoon nami tu hamu asa tongtong boan hamu hami ditangiangmuna tarlumobi ma i ina dohot ianakhonnami na tinadingkon ni ama nami on . Asa songon parbue tungkir naung pinasahat muna i antong, Pir ma pongki bahul-bahul pansalongan, pir ma tondinami margogo ma hami antong jala tongtong di ramoti Tuhan.

Udut tusi asa tung tangkas boanonmuna ditangiangmuna jahahononku ma jolo jujur ngolu ni ama na tapaadopadop on. (Manjaha Jujur Ngolu termasuk riwayat ni parsahiton rodi tu ujung ni ngolu ni namonding). Dung sidung manjaha jujur ngolu di uduti muse.

Songoni ma jujur ngolu ni amanami on, marhite on  tung gomos do mangido hami tu hamu saluhut namanghaholongi hami asa tongtong boan hamu hami di tangiangmuna tarlumobi ma i hasuhuton nami.

Songon i ma hata huhuasi laos dohot jujur ngoluni ni ama nami on na boi hupasahat hami. Mauliate malambok pusu ma dohonon nami tu saluhut hamu namanghaholongi hami, Botima.

Tarsongoni ma na pinarrohahon di piga-piga ulaon habot niroha. Asa lam tu hantusna hita angka na umposo boi ma ditambai angka dongan.

Tabe mardongan tangiang,

St. Sampe Sitorus/br Sitanggang (A. Hitado Managam Sitorus)

Read Full Post »

Apa sih Ungkap Tujung dan Mengapa harus dilakukan serta kapan seharusnya dilakukan ?.

Pertanyaan ini dikemukakan seorang pelayat yang hadir pada hari Sabtu 10 Juli 2010 lalu di Perumahan Duta Bintaro Cluster Kintamani yakni di ulaon partuatni/parmonding ni lae P.Sitanggang (Ama Charles).

Pertaanyaan itu mungkin sebenarnya sebagai ungkapan “protes” dari dalam hati si penanya karena Ulaon Ungkap Tujung langsung dilakukan oleh Hula-hulanya Sitanggang yakni Raja Manurung terhadap Inangbao namabalu (janda mendiang) setelah Ibadah Tutup Peti di tutup Tangiang Pasupasu oleh Pdt. Daniel Taruli Asi Harahap (dari HKBP Serpong). Begitu peti ditutup, Hula-hula Raja Manurung langsung MANGUNGKAP TUJUNG ni boruna.

Konon katanya hal itu dilakukan karena sudah kesepakatan sewaktu marhata raja Jumat malam. Dugaan saya itu dilakukan pasti dengan alasan  efisiensi waktu (arga ni tingki) agar setelah pemakaman di TPU Petamburan JAKBAR, hula-hula tidak pulang lagi kerumah almarhum di Tangerang.

Beberapa orang ada yang membenarkan apa yang dilakukan Raja Manurung dengan alasan sudah umum (songoni na ma namasa nuaeng on). Saya pribadi tidak sependapat dan menurut saya hal tersebut sudah menyimpang dari filosopi yang mendasari Ulaon Ungkap Tujung.

Menjawab pertanyaan diatas berikut argumen dan penjelasan saya sepanjang yang saya ketahui dan atas dasar filosopi sbb: (more…)

Read Full Post »

Mate Mangkar (baca: Makkar) didok ma i tu na monding nunga marindang anak dohot boru (sudah memiliki putra dan putri) namun diantara anak-anaknya belum ada yang berkeluarga bahkan dan masih menjadi tanggungan/beban bagi keluarga yang di tinggalkan (suami/istri yg berduka).

Tarsongon on ma si ulahononhon:

a. Tujung do pe sipasahotan tu na mabalu i, jala ndang adong dope ianggo “Boan Na” di goari ma on “Mardalan Na Bolon”.

b. Molo ama do na monding i, “Tulang na ma mambahen saputna”, somalna tu na mate purpur ima “Ulos Sibolang” boi do nang “Ulos Sirara”.

c. Hula-hulana ma mambahen tujung ni boru na, na mabalu ima “Ulos Sibolang”. (more…)

Read Full Post »

Molo mate punu didok ma i na so marindang anak baoa, holan boru do ianakhonna. Songon i do huroha pangalahona. Ai so adong na manorushon dohot na manguduti goarna. Hansit do si songon on molo sian adat-paradaton ni hita Batak. Molo najolo jala masa dope i di tingki on, ndang boi dope dibahen maralaman si songon on. Asa holan angka hata apul-apul do panghataion di si, lumobi sian angka horong ni hula-hula dohot horong ni tulang. Alai, taringot tu goar manang ulaon si songon on hombar ma i nian tu keputusan ni panghataion ni angka tutur dohot raja, lumobi sian hula-hula dohot tulang.

Tar dos do ulaon di na Mate Purpur dohot na Mate Punu

Mardalan do dison ulaon napasahat Ulos Saput dohot Ulos Tujung.

Molo monding Ina, Simatua ni namabalui ma pasahat Ulos Tujung tu Helana jala Tulang ni Ina na monding i do na pasahat Ulos Saputna.

Di pasidung ma namangungkap Tujung dung mulak sian udean.

Molo monding Ama dipasahat hula-hula ni namondingi (parboru) ma Ulos Tujung tu Ina namabalui (tu boruna), jala Tulang ni Ama na monding i do na pasahat Ulos Saputna.


Aha latar belakang dohot philosofina ?

1. Unduk marmeme Anak unduk do marmeme Boru: ido pandohan ni Ompunta sijolojolo tubu, jala songoni do nang di parsorang ni dakdanak di Pamoruon, dakdanak baoa manang dakdanak Boru-boru migor do ro Hula-Hulana (Tulangna) mamboan Aek ni Unte dohot pasahat Ulos tu dakdanak nabaru sorangi jala didok ma Ulos Parompa.

2. Mangoli Anak Baoa manang Muli Borui ba Tulangna do napasahat Ulos, jala didok ma nuaeng goar ni Ulosi Ulos Holong.

3. Monding pe Bere Baoa manang Bere Boru-Boru Tulangna ma napasahat Ulos Saput. Ima Ulos parpudi tu Berena namondingi.

4. Secara umum holan 3 hali do sasahalak manjalo ulos sian Tulangna, ima :Ulos Parompa, Ulos Marhasohotan(marbagas), Ulos Saput. Terkecuali molo ama adong kemungkinan 4 hali, ima 1 nai Ulos Mamongoti Bagas hatiha Mangompoi Jabu.(Boasa di dok kemungkinan1 hali nai ? Ala dang sude halak boi manang patuhaon olaon Mangompoi Jabu).

Contoh Skenario:
Sada Ama monding nunga adong boruna alai dan adong dope anakna(baoa), jala Tulang na dimaksud di son ima Tulangni na monding, Hula-hula tangkas Parboru dope, jala mangolu dope paranak(tilahaon matua).

Tarsongon on ma si ulahononhon:

a. Tujung do pe sipasahotan tu na mabalu i, jala ndang adong dope ianggo “Boan Na” di goari ma on “Mardalan Na Bolon”.

b. Molo ama do na monding i, “Tulang na ma mambahen saputna”, somalna tu na mate purpur ima “Ulos Sibolang” .

c. Hula-hulana ma mambahen tujung ni boru na, na mabalu  ima “Ulos Sibolang”.

d. Patupaon do songon ulaon “Marhata Raja”, jala laos di si ma pabotohon ni Paidua ni Suhut songon riwayat singkat (Barita Jujur Ngolu) dohot parsorion ni na monding i di tingki ni ngolu na.

e. Di ulaon na “Marhata Raja”, ndang pola patupaon ni hasuhuton sipanganon.

f. Ndang sijalo on do pe na margoarhon “Ulos Holong” sian Hula-hula dohot sian Tulang ianggo apala di tingki manang di ulaon na songon i.

g. Di tingki partutano na i, ianggo sian ruhut ni paradaton ndang adong do pe sipatupaon ni hasuhuton jala dan adong ulaon maralaman.

h. Tangkas do jalo on ta haroro ni hula-hula dohot tulang, hombar tu tingki naung di tontuhon di tingki na “Marhata Raja” i.

i. Dung mulak sian udean, udutan ma ulaon di na ro raja ni hula-hula “Mangungkap Tujung” ni na mabalu i. Sipatupaon ni Hula-hula di tingki na mangungkap tujung ni na mabalu i ima : dengke sitio-tio, indahan masak, mual (aek) na tio dohot parbue na pir.

j. Di tingki na mangungkap tujung i raja ni hula-hula, molo tung dipatupa hasuhuton pe sipanganon na marsintuhu boi do i alai ndang adong marbagi jambar.

Asa ummura antusanta tar songonon ma partording ni ulaon i.

1. Manjalo haroro ni Tulang pasahat Ulos Saput (somalna jam 10.00 wib)

Laos di acara i ma nasida mar acara penghiburan (pasahat hata apul-apul)

MANOGOTNA DI NA MANJALO HARORO NI TULANG (Ulos Saput)

Mangarade Paranak dohot manang piga nasida na marhaha-maranggi dibagas manjalo dohot mangampu ulaon na pinatupa ni Tulang dohot Hula-Hula.
Mangarade ma Boru laho manjalo Boras si Pir ni Tondi nabinoan ni Hula-Hula:

Paidua ni Suhut:

Di hamu saluhutna Tulangnami, dohot sude hamu Hula-Hulanami, ala naung sahat ma tingkina Rajanami, pungkaonta ma ulaon namanjalo hula-hula di ulaon parmonding ni Ama na ta haholongi on.

Di hamu Tulangnami, (Raja i ..……..) nunga rade hami Rajanami manjalo haroromuna laho pasahathon ULOS SAPUT tu Ama namonding on.

(Note: molo Ina namonding, Tulang Rorobot/Tulang ni ina na monding i ma dijou pasahat Ulos Saput).

Jongjong ma Tulang sipasahat Ulos Saput dohot rombonganna di sabola siamun ni namondingi (tong do mamereng partonding/parpeakni bangke ni namate i /kondisi rumah), jala andorang so dipasahat Ulos Saput, Marende, Martangiang, didok ma hatana:

Hata ni Tulang ni namonding Pasahat ULOS SAPUT (somalna “Ulos Sirara”):

Di hamu Ito dohot Lae… (Natoras ni namonding) songoni nang di borunghu Nai…… (namabalu), pahompuku si…… dohot di hamu berenami na marhaha maranggi, suang songoni di sude hamu namardongan tubu, na dohot do hami Tulangmuna, Nantulangmuna dohot Ompungmuna, sude hami na pungu on marhabot ni roha diparmonding ni Bere nami ima Ama na ta haholongi on.

Najolo diparsorang ni Berenami on, hupasahat hami Tulangna do Ulos Parompa ima songon lampin ni Berenami on. Nuaeng nunga monding ibana, ro ma hami Tulangna pasahat Ulos Saputna.Asa dohononnami ma tu hamu Inang borunghu (namabalu)Nai ..……, pahompuku si……….. dohot tu sude hamu Berenami (haha-anggi dohot iboto ni namonding): Hupasahat hami ma Ulos Saput on tu Berenami naung monding on, dohot pangidoan di tangiangnami tu Amanta Debata Parasi Roha i, asa manaputi Parhorason, Panggabean sian pasu-pasu ni Tuhanta di hamu sude na tinadingkon ni Berenami on.

Borhat ma ho berengku mandapothon Tuhan Jesus Kristus di surgo hasonangan i. (Laos diampehon ma Ulos Saputi tu na mondingi)

Paidua ni Suhut:

Rajanami, mauliate ma di hamu, nunga tangkas di pasahat hamu ulos saput ni beremu ima Ama na hu haholongi hami naung bostang di jolonta on, sahali nari dohonon nami maulitae godang ma di hamu Tulangnami.

Note: dang pala si alusan ni paranak /pasahathon piso-piso tu Tulang dohot Hula-hula alana na mate punu do on, jala Tulang dohot Hula-hula pe ingkon mangantusi do di si. Si tongka ni na unang, sotung adong sarita sian Tulang dohot Hula-hula molo so di pasahat suhut piso-piso (alus ni ulos nasida).

2. Manjalo haroro ni Hula-hula pasahat Ulos Tujung (dung sahat Ulos Saput)

Paidua ni Suhut:

Mauliatema. Di hamu nahuparsangapi hami Hula-Hulanami (Raja ……….……) nunga mangarade hami Rajanami manjalo haroromuna laho pasahathon Ulos Tujung.

Jongjong ma Hula-Hula sipasahat Ulos Tujung dohot rombonganna di sabola siamun ni namondingi (tong do mamereng partonding/parpeakni bangke ni namate i /kondisi rumah), jala sipasahat Ulos Tujung di jolo ni namabalu i.

Andorang so dipasahat Ulos Tujung, Marende, Martangiang, didok ma hatana:

Hata ni Hula-hula (Parboru) Pasahat ULOS TUJUNG (somalna “Ulos Sibolang”):

Di ho Inang, Borunghu: . Di tingki on dipaporsanhon Tuhanta do tu ho sitaonon na mansai dok-dok, mansai borat do sitaonon on songon udan nasohasaongan, songon alogo na so hapudian. Dison ro do hami Hula-Hulamu mandapothon hamu, paboa na rap do hita marsitaonon di parmonding ni Helanami on. Ala naung parjolo monding Helanami on, di son ro hami laho pasahat ULOS TUJUNG tu hamu na paboahon naung marsirang hamu di hangoluan on dohot Helanami naung monding on. Huampehon hami ma Ulos Tujung on tu simanjujungmu, napaboahon naung mabalu hamu, tanda naung holip sian parnidaanmuna Helanami/Laenami naung monding on, jala marhite nahuampehon hami Tujung on tu hamu didongani tangiangnami tu Amanta Debata Parasi Roha i, asa tanganNa nasumurungi ma mangondingi hamu sian sude arsak ni roha on, ditamparhon sian rohamu roha namandele, jala sai ditogu-togu Tuhanta ma hamu laho mandalani ngolumuna tu angka ari nanaeng ro.
(Mangampehon Ulos Tujung: sian siamun ni namabalui, tu simanjujungna torus tu hambirang, jala ingkon satonga pardompahan ni namabalui ditutup tujungi)

Andorang so ditutup hula-hula dohot tangiang panutup, pintor alusan ni Paidua ni Suhut do mandok mauliate, songon on ma hatana:

Mauliate malambok pusu ma Rajanami di holong ni rohamuna i di hami pamoruonmuna on, lumobi ma di naung pinasahatmuna Ulos Tujung tu Inanami namabalu on.
Sai anggiat ma songon pangidoanmuna i, sai asi ma Roha ni Tuhanta, dao ma pandelean sian Ina naung mabalu on, sai tumibu ma tarapul rohana siala ni angka tangiangmuna hula-hulanami.
Rajanami, songon naung hutariashon hami di “Marhata Raja” nabodari, di namulak sian udean annon rap ma hita mulak tu bagasnami on laho pasidunghon ulaonta ima: Ungkap Tujung jala laos di ulaon i ma Rajanami mangido tangiang hami sian hamu hula-hula nami jala apuli hamu hami tarlumobi Ina naung mabalu on, Sahali nari dohononnami ma mauliate godang ma di hamu saluhutna hula-hulanami dohot sude uduranmuna Rajanami.

Dung i ditutup Hula-hula ma dohot tangiang.

3. Diuduti ma muse tu acara mandok hata.

  1. Parjolo manjahahon Riwayat Hidup (Jujur ngolu) ni almarhum.
  2. Mandok hata sian Natua-tua ni Raja Gultom dohot punguan namangihut.
  3. Mandok hata sian Hula-hula na marhaha maranggi
  4. Mandok hata horong ni angka tulang (Bona Tulang, Bona niari) -> jika memang hubungan terjalin bak dan mereka hadir maka harus diberi kesempatan.
  5. Mandok hata Ale-ale
  6. Mandok hata dongan sahuta
  7. Mandok hata pemerintah setempat

4. Diuduti ma muse tu acara paampuhon (mandok hata Tulang & Hula-hula). Rap masuk ma nasida alai sasintongna ingkon Tulang (Raja …..) do na paampuhon ai nasida na nampuna bere (istilahna bilang-bilang nasida do na moru) ai nasida na gabe Partogi di ulaon jala ingkon nasida do na gabe Pargomgom.

5. Mangampu Hasuhuton

6. Di pasahat ma tu Huria

7. Borhat ma tu udean (pemakaman)

8. Ulaon Ungkap Tujung (dung mulak sian udean)

Dung mulak sian sian udean pintor di uduti ma dohot ulaon Ungkap Tujung.

Somalna dung mulak sian udean dibahen do partangiangan. Andorang so mangan na torop, jolo di ungkap suhut parboru ma tujung ni boruna.

Hata sidohonon tingki mangungkap tujung on ma:

Di ho ito. Adat napinungka ni Ompunta siolo-jolo tubu, dung ni ampehon tujung ni namabalu, ingkon ungkapon do muse asa gok ulaon adat i.

Nuaeng pe ro do ahu mangungkap tujung mon. Dung i diungkap ma tujung i, jala di jomput ma boras 3 hali tu simanjujung ni namabalu i jala didok ma: sai pir ma tondim olat ni on tu joloanon. Udut tusi di taburhon ma boras liat-liat, liat gabe liat horas. Salpu i di painumhon ma aek sian galas, jala didok ma: ingot ma ito hata ni Tuhanta na mandok; Ahu do namambugangi, alai laos ahu do na pamalumhon. On pe sai di pamalum Tuhanta ma na hansit jala na bernit na ampe tu borunghu, sai tiur ma pardalananmu tu joloan on bahenon ni Tuhanta Parasi Roha i. Di usaphon ma saotik tu simalolong ni na mabalu i jala didok ma; Tuhanta ma namangapus ilu sian simalolongmon. Dipadao ma angka na holom, sai tiur ma pemerenganmu tu joloan on. Dung i disuhaphon ma muse tu bohi ni namabalu i (disuhapi) jala didokma: sai minar ma bohim, jala sai ro ma las ni roham tu joloan on. Salpu i dilehon ma mangan na mabalu i, ima dengke na pinatupa ni hula-hula.

Dung i marsipanganon ma. Ndang adong marbagi jambar di ulaon on.

Dung sidung marsipanganon di uduti ma muse dohot panghataion ganup ma mandok hata apul-apul na be, parpudi ma Hula-hula hasuhuton (hula-hula tangkas).

Dang adong be sihatahonon ni Hula-hula taringot boru nasida na mabalu i, alana adong do tading-tading ni amanta na jumolo monding i jala hot do ina i di hutana

Ina na mabalu tersebut tidak di mungkinkan untuk kembali ke rumah orang tuanya.

Dia tetap bagian dari keluarga besar suaminya karena dia punya anak dan dia berkewajiban untuk membesarkannya.

Pinadomuni (dirangkum oleh) : Sampe Sitorus, SE (A. Hitado Managam Sitorus)

Medang Lestari B3/K11 08129052462

Referensi & Daftar Pustaka :

1. Jambar Hata, T.M Sihombing, CV Tulus Jaya

2. Dalihan Natolu Nilai Budaya Suku Batak,

Drs. DJ Gultom Rajamarpodang, CV Armada –Medan

3. Garis Besar Ruhur-Ruhut Paradaton Sitorus, Buku Parsadaan

Raja Sitorus Dohot Boruna (PARSIBONA) JABOTABED

4. Situs Simanjuntak Sitolu Sada Ina http://simanjuntak.or.id

5. Situs Partungkoan http://tanobatak.wordpress.com

6. Seri Diskusi Injil & Adat Pdt Daniel Taruli Asi Hararap STh,

http://rumametmet.com

7. Situs Parsadaan Toga Manurung Cileungsi

http://patambor1.multiply.com

8. St. D.P.Hutagalung/Br. Simorangkir (O. ni Salomo)

http://www.rajaparhata.com

9. Literatur lain dan angka panuturion ni angka natua-tua.

Read Full Post »

Monding Baoa manang Boru-boru naung hot ripe alai ndang mardakdanak dope di gori ma i mate purpur .

Mate purpur ma peristiwa na humansit di parmate ni jolma di ngolu ni halak Batak. Mate Purpur digoari di halak Batak do si songon on “siranggapuri” siborgat hau na somardangka so marranting so marbulung, dang adong be sihirimon, soadong be sitatapon manang sipaimaon. Na marlapatan ndang adong tubuna, anak dohot boru.

Tung hira na so dapot do apulan na matean i alani balga ni arsak i. Asa molo tung masa pe si songon i, holan angka hata togar-togar, hata apul-apul do sian angka tutur.
Note: Adat habatakon do mandok nahumansit mate pur-pur. Molo sian hakristenon, di hita naporsea di Jesus Kristus, dos do hamatean i, jala ingkon sude do mamolus i. Parhitean do hamatean laho mandapothon Tuhanta. Jala didok hata ni Tuhanta do muse, ditompa Debata jolma i asa marguna jala hasea di Tuhan i do. (more…)

Read Full Post »

Sude do hita jolma ingkon mate molo jumpang tingkina. Sada pe sian hita ndang adong na boi pasidinghon i. Alai pangidoanta, molo tung marujung pe nian ngolunta sian hasiangan on, asa jolo sahat ma nian hita tu na saur-matua. Ima songon pangidoan dohot elek-elekta tu Tuhanta. Alai molo tung masa pe na masa i, asa dapot ma di hita songon hata ni endenta Buku Ende nomor 539: 4
Sai rade ale tondingku, tagam panjouonna i … manang hata ni ende i

BE. No. 520:2
Ndang na tarpasiding be ianggo hamatean i,
Ingkon do dibolus be, di nalao tu surgo i,
Sihirimon ni rohanta, ngolu sogot i,
Tau pangapul di rohanta, angka naporsea i.

BE 525: 4
Di surgo adui pinarade inganan
Nasonang tutu sai tusi ma ahu lao
O, ho donganhi ingananmu ginjang
Sai dohot ma ho, sai tu surgo ma lao
Sai ro dohot ho, dohot ho, dohot ho,
Sai dohot ma ho, sai tu surgo ma lao.

Sekilas pangatusion tu ulaon arsak ni roha.

Molo di hita Batak Toba, godang do ragam-pandohan tu na mate, jala asing do nang ruhut paradaton tu si. Adong do didok namate dakdanak (mati sewaktu kanak-kanak), mate doli-doli/anakboru (mati sewaktu remaja/ pemuda), mate mangkar, mate pur-pur(mati sesudah menikah namun tanpa anak), mate sarimatua (mati sesudah bercucu namun belum semua anaknya menikah), mate saurmatua (mati sesudah bercucu dan semua anak-anaknya sdh menikah). Adong do deba binege mate sada ama manang ina, hape ndang gok dope adatna, (asing do ulaon dohot ruhut paradaton tu si, mamereng luat dohot paradatonna). Alai naporlu sipatorangon di bagian on, asa dapot hita pangantusion di angka ulaon habot ni roha, songon i nang di ulaon sari-matua dohot saur-matua.

Bagi kita orang yang beriman Kristen makna kematian ini adalah sama: yakni akhir hidup di dunia dan jalan untuk menghadap Tuhan. Sebab itu sebagai orang Kristen kita wajib menaruh penghormatan dan kasih yang tinggi juga kepada orang yang mati muda.

Mate Tilahaon

Molo mate dakdanak baoa, boru, songon i doli-doli, namarbaju, manang mate dung matua alai ndang dope hot ripe. Ndang pola mardalan adat-paradaton di son. Jala masuk horong natilahaon ma on didok. Holan angka hata apul-apul do dipasahat di son, songon i sian hula-hula manang tulang ni namarsitaonon. Molo tung adong pe ni ida sian horong ni hula-hula manang tulang ni monding mambahen ulos saput, jala somal binege ulos parsirangan, ndang pola sala i. Alai holan songon i do i. Ndang pola alusan manang lehonon ni namarsitaonon i piso-piso tusi.

Molo masa si songon on, biasa muse ndang apala marborngin bangke i dibahen. Pintor sadari na i do i ditaruhon tu udean, dung sae acara huria. Jadi intina holan acara huria do. Namarlapatan ndang adong pola sipaimaon di parmate ni tilaha i. Nang pe songon i tergantung do i tahe tu keputusan ni hasuhuton dohot keluarga. Jadi molo tung masa pe na masa i, hatop ma tarapul ili-ilu dohot roha ni sude keluarga.

Molo monding sada dakdanak baoa manang dakdanak boru somalna tarsongon on ma namasa :

a.Ndang adong dope ruhut di paradaton na boi sijalo on ni suhut sian Hula-hula dohot Tulang. (Na so tupa pangidoon ni hasuhuton tu Hula-hula).
b.Ndang adong dison patupaon ulaon “Marhata Raja” holan boa-boa sambing do sitariashononthon tu amanta raja dohot tu inanta soripada, songon na paboahon partutano.

Tarsongon on ma acara manariashon tu amanta Raja dohot Inanta Soripada tarlumobi tu Hula-hula (Ompung/Tulang ni na monding):

  • Dung pungu na mardongan tubu, dongan sahuta dohot sian horong ni Hula-hula, diatur ma parhundu asa marsiadopan (berhadap-hadapan).
  • Dipasahat paidua ni suhut ma tu haha anggina asa nasida na manariashon tu loloan na marhabot ni roha / tarilu-ilu. Dos ma tahu ni namarhaha maranggi ise na manariashon (partarias).
  • Di jahahon partarias ma songon jujur ngou ni namonding sahat tu rencana ni hasuhuton taringot tu pemakaman (andigan, jam dohot udean), termasuk na so patut dope nasida manjalo ulos termasuk ulos parsirangan (natoras ni namonding i do na mambahen ulos parsirangan).
  • Pangidoon nipartarias ma panuturion sian hula-hula dohot pangurupion sian dongan sahuta.
  • Dung dos tahi nasida di tariashon ma tu pangula ni huria andigan (jam piga) dipasahat tu huria.

c.Pangintubu (Na Tilahaon i do) anggo na mambahen “Ulos Parsirangan”. (Jala on do na masa di patupa di Sitorus SEJABODETABEK). Alai nang pe naung keputusan i, molo sai di pangido Tulang ni na monding marhite hata na elek asa pasahaton nasida ulos parsirangan tu bere/ibeberena denggan ma i di tariashon jala haputusan di hasuhuton ma.
d.Patupaon ni Pengurus Parompuon (contoh Parompuon Raja Mandidang Sitorus),songon pangurupion manang sesuai AD/ART ni punguan.
e.Dung mulak sian udean, marpunggu do muse ruasni Punguan Parompuon laho martangiang. Laos di si ma di tontuhon tingki, manang na andigan Punguan Parompuon laho mamboan indahan sipaet-paet manang indahan soso-soso tu bagas ni ruas na marsitaonon i.

Contoh skenario :

Monding ma sada dakdanak boru marumur 10 taon di rumah sakit ala ni sahit (muntaber).

Asa ummura antusanta tar songonon ma partording ni ulaon i

Dung tangkas di paboa pihak rumah sakit (medis) naung marujung ngolu ni dakdanak i, pintor paboahononhon ni amang ni dakdanak (pihak keluaraga) tu angka sisolhot termasuk ma i tu dongan sahuta,dongan tubu, Huria (Gereja), dohot Hula-hula.

Dung sae sude administrasi sian ruah sakit diboan ma mulak dakdanak i tu bagas ni natorasna. PatupaoNdang sai ingkon songon i urutanna, targantung tu dos ni roha do jala marsoring-soring ma mambaen acara penghiburan. Alai ianggo parmasuk bangke ni na mate i ingkon tingki naeng mulaan ni Hula-hula do mangalehon hata apul-apul (mar acara).

Dang adong “mangan” panukkir di son (keluarga yg berkabung tidak menyediakan makanan bagi pelayat).

Dung mulak sian udean, marpungu do muse hasuhuton, dongan sahuta dohot punguan parompuon laho martangiang. Laos di si ma di tontuhon tingki, manang na andigan ro punguan parompuon laho mamboan indahan sipaet paet manang indahan soso-soso tu bagas ni ruas na marsitaonon i.

Pinadomuni (dirangkum oleh) :

Sampe Sitorus, SE (A. Hitado Managam Sitorus)
Medang Lestari B3/K11 08129052462


Referensi & Daftar Pustaka :

1.Jambar Hata, T.M Sihombing, CV Tulus Jaya

2.Dalihan Natolu Nilai Budaya Suku Batak,

Drs. DJ Gultom Rajamarpodang, CV Armada –Medan

3.Garis Besar Ruhur-Ruhut Paradaton Sitorus, Buku Parsadaan

Raja Sitorus Dohot Boruna (PARSIBONA) JABOTABED

4.Situs Simanjuntak Sitolu Sada Inahttp://simanjuntak.or.id

5.Situs Partungkoan http://tanobatak.wordpress.com

6.Seri Diskusi Injil & Adat Pdt Daniel Taruli Asi Hararap Sth,

http://rumametmet.com

7.Situs Parsadaan Toga Manurung Cileungsi

http://patambor1.multiply.com

8.St. D.P.Hutagalung/Br. Simorangkir (O. ni Salomo)

http://www.rajaparhata.com

9.Literatur lain dan angka panuturiaon nu angka natua-tua.

Read Full Post »

Older Posts »

Follow

Get every new post delivered to your Inbox.

Join 878 other followers

%d bloggers like this: