Feeds:
Posts
Comments

Archive for the ‘Umpasa’ Category

Pesta Unjuk Martin Manurung (penyanyi- anak ni owner batakpos)

Maulite godang ma ta pasahat tu Amanta pardenggan basai na tongtong mangiring iring hita sahat tu tikki nauli on ta adopi Pesta Unjuk parbogason ni pahompunami  Martin Manurung dohot oroanna Wasty

Di hamu par boruaon nami Manurung, asa songon hata ni natua-tua ma dohonon nami :

Harangan si Dulang mai inna hatubuan ni rengge-rengge
Horas ma dihamu namar Tulang Horas nang dihami paribebere.

Las si tutu rohanami di gonghon dohot jou-jou mu tu hami Tulangmu Sitorus sian Lumban Tonga-tonga. Suang songoni ma antong las ma ro hamu di haroro nami.

Las ma rohanta nunga sahat pasu-pasu parbogasan ni pahompu nami sai anggiatma gabe rumah tangga na na berbahagia jala langgeng gabe si tiruon ni angka na umposo.

Dohonon nami ma tutu tu hamu :

Eme na marbiur, di lambung ni hariara;
Sai torop ma pomparanmu jala maribur, huhut matakkang jala manjuara
Hau simartolu, di tombak ni Panamparan;
Sahat ma hamu leleng mangolu di haliangi angka pomaparan
Andor halumpang togutogu ni lombu, mamboan tu onan gambiri;
Sai saur matua ma hamu pairing-iring pahompu sahat tu namar nono sahat tu namarnini.

Untuk Kedua Mempelai

Selamat Berbahagia untuk kalian berdua. Harapan  kami kalian senantiasa saling mengasihi. Menurut para para penasehat pernikahan kunci dari langgengnya rumah tangga adalah keterbukaan dan komunikasi yang baik. Kami harapkan kalian berdua dapat saling terbuka serta menerima pasangan apa adanya dan terjalin komunikasi yang baik di antara kalian dan yang paling penting kenakanlah kasih sebagai pengikat di antara kalian berdua.

Dohononhu ma tu hamu songon nidok umpasa :

Asa ni ansisbang, jonok tu panggonggonan;
Badanmuna na so ra sirang, tondimuna marsigonggoman
Tinapul bulung ni salak, tarihut bulung sikkoru
Sai tibu ma hamu mangabing anak, jala tibu magompa boru.
Tangkas do jabu suhat, laos tangkas do jabu bona;
Sai tangkas ma hamu maduma, laos tangkasma nang mamora
Sahat sahat ni solu, sahat di binsar ni mata ni ari,
Pasahaton nami ma ulos holong si ganjang rambu on, leleng ma hamu mangolu jala di iring- iring Tuhan ganup ari.

Note: Pinatorang saotik sian dia dalanna asa marbere hami tu natoras ni si Martin Manurung. Ia apala Tulang tangkas nasida ima hahadoli nami Op. Mangiran pomparan ni R. RUMAGAJA (baca tarombo kami di sundut/generasi ke VIII).

Berhubung di Jabotabek ini tidak ada keturunan dari R. RUMAGAJA maka kami sebagai pomparan dari anggidolinya mangadopi gonghon dohot jou-jou nasida.

Hu parhatutu hami do Op. Mangiran hea marhuta di huta nami Lumban Tonga-tonga, Silamosik-Porsea, jala ima na pajonokhon songon ikatan batin di hami.

On ma salah satu guna ni Punguan Raja Mandidang Sitorus, unang ma nian tingki naeng adong ulaon baru marsitandaan jala ta lului sisolhot. Tongtong ma nian terjalin silaturahmi paling tidak melalui telepon atau SMS sekedar untuk “keep in touch”.


Read Full Post »

Mangalusi sungkunsungkun ni angka dongan taringot tu umpasa sidohonon hatiha mangulosi di ulaon unjuk dison pinaandar pigapiga umpasa na boi pillitonta sian pengalaman ni panurat tarlumobi ma i sian panuturion ni angka natuatua.

Menjawab pertanyaan dai beberapa teman perihal umpasa ketika menyampaikan ulos kepada pengantin pada pesta adat pernikahan, berikut kami rangkum beberapa pilihan (seri 1) berdasarkan pengalaman dan pencerahan dari para orangtua. 

Hula-hula / Tulang Pasahat Ulos tu pengantin (Seri 1)

Dakka ni arirang, peak di tonga onan,
Badan muna naso jadi sirang, tondi mu marsigomgoman
 
Giring-giring ma tu gosta-gosta, tu boras ni sikkoru,
Sai tibu ma hamu mangiring-iring, huhut mangompa-ompa anak dohot boru.

Rimbur ni Pakkat tu rimbur ni Hotang,
Sai tudia pe hamu mangalakka, sai tusima hamu dapot pansamotan.

Dekke ni sale-sale, dengke ni Simamora,
Tamba ni nagabe, sai tibu ma hamu mamora.

Sahat-sahat ni solu, sahat ma tu labuan,
Sahat ma hamu leleng mangolu, jala sai di dongani Tuhan.

Hula-hula / Tulang Pasahat Ulos tu pengantin (Seri 2)

Anian ma pagabe tumundalhon sitodoan,
Arimu ma gabe molo marsipaolo-oloan.

Ruma ijuk tu ruma gorga,
Sai tubu ma anakmuna na bisuk dohot borumuna na lambok marroha

Sahat solu, sahat di parbinsar ni ari,
Leleng ma hamu mangolu jala di iring-iring Tuhan ganup ari.

Hula-hula / Tulang Pasahat Ulos tu pengantin (Seri 3)

Asa ni assisbang, jonok tu pargongonan
Badan mu na sora sirang, tondi mu marsigomgoman
 
Tangki jala hualang, garinggang jala garege.
Tubuan anak ma hamu, partahi jala ulubalang,Tubuan boru par-mas jala pareme.

Bona ni pinasa, hasakkotan ni jomuran,
Tung aha pe dijama hamu, tongtong ma i habaoran pasu-pasu ni Tuhan.

Mandurung di aek Sihoru-horu, manjala di aek Sigura-gura
Udur ma hamu jala leleng mangolu, hipas matua sonang sora mahua.

Sahat sahat ni solu, sahat tu bontean ni tigaras
Pasahathon nami ma ulos si ganjang rabu on, saluhutna ma hita gabe jala horas.

Hula-hula / Tulang Pasahat Ulos tu pengantin (Seri 4)

Ai na tinapu salaon, salaon situa-tua,
Denggan ma hamu masianju-anjuan asa saut gabe jala saurmatua.
 
Martumbur ma baringin, mardangka ma hariara,
Matorop ma pomparanmu maribur, matangkang ma juara.
 
Tangkas pe jabu suhat, tangkasan do jabu bona.
Tangkas ma hamu maduma, tangkas ma nang mamora.
 
Tubuma halosi di dolok ni pintu batu
Hami Tulangmu mangulosi, Debata do ianggo na masu-masu.
 
Sahat-sahat ni solu ma sahat tu bontean,
Pasahaton nami ma ulos si ganjang rambu on Sahat ma hamu tu parhorasan, sahat tu panggaben.

Hula-hula / Tulang Pasahat Ulos tu pengantin (Seri 5)

Dangir-dangir ni batu ma hamu, pandakdahan ni simbora,
Gabe ma hamu jala saurmatua jala sai marsada ni roha.
 
Sai situbu laklak ma hamu situbu singkoru di dolok ni purbatua,
sai tubuan anak ma hamu tubuan boru, donganmuna sarimatua.
 
Dekke ni sale-sale, dengke ni Simamora,
Tamba ni nagabe, sai tibu ma hamu mamora.
 
Songgop ma anduhur titi, sangkot diparjenggaran.
Mangasi ma  Amanta Debata, sai ro ma akka parsaulian.
 
Sahat solu sahat tu bontean, toho di rondang ni bulan
Hata pasu-pasu marrhite tangiang ni tulang, sai sudema di pasaut Tuhan.

Hula-hula / Tulang Pasahat Ulos tu pengantin (Seri 6)

Aek sibarabara, Duruna i tubuan tolong.
Tung aha pe muse na masa, Ndang boi mago ianggo holong.

Ruma ijuk di jolo ni sopo gorga,
Asi ma roha ni amanta Debata. Sai dilehon ma di hamu, Anak na bisuk dohot boru na marroha

Tonggi ma sibahut tabo ma pora-pora.
Gabe ma hita luhut jala sude hita mamora.

Mardakka Jabi-jabi, marbulung ia si Tulan
Pasu-pasu nami marhite tangiang sai sude mai dipasaut Tuhan.

Sahat-sahat ni solu ma sahat tu bontean,
Pasahaton nami ma ulos si ganjang rambu on Sahat ma hamu tu parhorasan, sahat tu panggaben
 
Hula-hula / Tulang Pasahat Ulos tu pengantin (Seri 7)
 
Pinattikhon hujur di topi tapian
Tudia pe hamu mangalakka sai tusi dapotan parsaulian
 
Tangkas ma jabu suhat tangkasan ma jabu bona.
Tangkas ma hamu maduma tangkasan ma nang mamora.
 
Tubu ma lata di toru ni bunga-bunga,
Sai tubu ma di hamu anak namarsangap dohot angka boru namartua.
 
Balintang ma pagabe tumandakhon sitadoan,
Saut do hamu gabe jala sangap asal ma tontong si oloi Tuhan.
 
Sahat-sahat ni solu sahat tu Tigaras,
Sahat ma hamu leleng mangolu, gabe jala horas – horas.

Hula-hula / Tulang Pasahat Ulos tu pengantin (Seri 8)

Dakka ni arirang, peak di tonga ni onan,
Badan muna naso jadi sirang, tondi mu marsigomgoman

Hariara na bolon bahen parlape-lapean,
Sai tubu ma di hamu anak dohot boru na bolas pangunsandean

Simbora ma pulguk, pulguk di lage-lage,
Sai mora ma hita luhut, huhut horas jala gabe.

Tingko ma inggir-inggir, Bulung nai rata-rata
Hata pasu-pasu i, Pasauthon ma namartua DEBATA

Sahat-sahat ni solu  toho di rondang ni bulan
Leleng ma hamu mangolu, gabe jala si oloi Tuhan.

Hula-hula / Tulang Pasahat Ulos tu pengantin (Seri 9)

Pirma toras ni pongki, Bahul-bahul pansalongan
Pirma tondi muna, Tutambana pangomoan

Ruma ijuk tu ruma gorga,
Sai tubu ma anakmuna na bisuk dohot borumuna na lambok marroha.

Andor halumpang Togu-togu ni lombu, andor hatiti Togu-togu ni horbo
Penggeng saur matua ma hamu pairing-iring anak dohot boru Sahat tu namarnini sahat tu namarnono

Tingko ma inggir-inggir, Bulung nai rata-rata
Hata pasu-pasu i, Pasauthon ma namartua DEBATA

Sahat-sahat ni solu sahat tu Tigaras,
Sahat ma hamu leleng mangolu, gabe jala horas – horas.

Hula-hula / Tulang Pasahat Ulos tu pengantin (Seri 10)

Martantan ma baringin, Mardangka hariara
Horasma tondi madingin, Matangkang ma manjuara

Bintang ma narumiris, Tu ombun na sumorop
Anak pe antong riris, Jala boru pe antong torop

Dekke ni sale-sale, dengke ni Simamora,
Tamba ni nagabe, sai tibu ma hamu mamora.

Marmutik tabu-tabu mandompakhon mataniari,
Sai hot ma di hamu akka pasu-pasu, laho marhajophon akka na sinari.

Sahat-sahat ni solu, sahat ma tu labuan,
Sahat ma hamu leleng mangolu, jala sai di dongani Tuhan.

Hula-hula / Tulang Pasahat Ulos tu pengantin (Seri 11)

Balintang ma pagabe tumandakhon sitadoan,

Saut do hamu gabe asal ma tontong masipaolo-oloan.

Tubu ma hariara, di tonga-tonga ni huta
Sai tubu ma di hamu anak namarsahala dohot boru namora jala na martua

Tinaba hau sampinur di tombak simarhora-hora.
Sai lam matorop ma hamu maribur lam marsangap jala mamora.

Eme sitamba tua ma, Parlimggoman ni siborok
Debata do na martua, Horas ma hamu di parorot

Sahat solu, sahat di parbinsar ni ari,
Leleng ma hamu mangolu jala di iring-iring Tuhan ganup ari.

Songon i majolo na boi pinaandar.

Tangerang 3 Juni 2009, Tabe mardongan tangiang,

St. Sampe Sitorus/br Sitanggang (A.Hitado Managam Sitorus)

Dirangkum dan disusun dari berbagai sumber dan pengalaman serta “panuturion ni natuatua”.

Silahkan di copy dan share, namun dimohon menyebutkan blog ini.

Note: banyak tulisan kami di copy posting di blog lain namun dibuat seolah-olah tulisan dari si pemilik blog tersebut.

Read Full Post »

Labu pe labu i, ndang asal suanhononhon,
Jabu pe jabu, ndang asal inganan.

Mabaor aek puli sian dolok ni Simamora,
Sai hot ma jabunta on bagas na uli, ingananmu marlas ni roha.

Tangkas do jabu suhat, laso tangkas do jabu bona,
Sai tangkas ma hamu dung maringanan di jabu on maduma, tangkas nang mamora.

Andor ras ma tu andor ris di tombak ni Purbasinomba
Sai horas-horas ma hamu torkis-torkis, tumpahon ni Debata namartua.

Jongjong di Dolok Purbasinomba, manatap tu Panamparan,
Sahat ma hamu saur-matua mangingani jabu on dihaliangi angka pomparan.

Sahat-sahat ni solu toho di rondang ni bulan,
Sahat ma hamu leleng mangolu mangingani bagas on, sai diiring-iring Tuhan.

Eme si tamba tua parlinggoman siborok,
Sai dilehon Tuhanta ma di hamu tua, hot ma hamu di jabu on diparorot.

Dohot angka na asing.

Read Full Post »

HUHUASI NI SIPANGANON

Si tikti mar si gompa, golang-golang pangarahutna,
Otik so sadia pe na tupa, sai godang ma pinasuna.

Otik si butong-butong, godang si pir ni tondi,
Otik so sadia na boi hupatupa hami, pamurnas ma i tudaging, saudara tu bohi, si palomak imbulu ma i, si paneang holi-holi.

Bagot na marhalto ma tubu di robean,
Horas ma namanganhon, horas ma namangalean.

Huta Tanobato parasaran ni leang-leang,
Horas ma hami namanjalo, horas ma di hamu namangalean.

Dohot angka na asing.

Read Full Post »

Sanjongkal urat ni ri, tolu jongkal urat ni singkoru,
Ulos mula gabe naung pinasahat i, sai saur ma i di hamu, mangulosi anak dohot boru.

Tubu ma lata di toru ni bunga-bunga,
Tubu ma anak na marsangap di hamu dohot boru na martua.

Habang binsak-binsak laos mangihut ambaroba,
Sai tibu ma ro na tapaima, jala dapot nahinirim ni roha.

Tangki ma jala ualang, galinggang jala garege,
Sai tubu ma di hamu anak partahi jala ulubalang, dohot boru namora jala pareme.

Tubu ma hariara, di tonga-tonga ni huta
Sai tubu ma anak dohot boruma na mora jala na martua

Tubu ma hariara diholang-holang ni huta, dakkanai tanggo pinarait-aithon,
Tubu ma di hamu anak na marsahala dohot boru namartua, sitongka panahit-nahiton.

Eme si tambatua ma parasaran ni siborok,
Sai dilehon Debata ma di hamu gogo dohot tua, hot ma hamu diparorot.

Obuk do jambulan nanidandan bahen samara,
Molo mamasu-masu hula-hula, padao sahit dohot mara.

Dohot angka na asing.

Read Full Post »

Pangantusion Umpasa

Hampir di sude ulaon adat sai dipangke do umpasa dohot umpama di sude pangkataion.

Umpasa i ma pasu pasu manang tangiang na ro sian roha ni na mangkatahon umpasa i asa pasauthon Amanta Debata songon na pinagido ni roha ni na mamasu-masu.

Umpasa adalah kata-kata berkat semacam doa agar diluluskan Tuhan hal-hal yang diucapkan. Setiap orang yang mengucapkan umpasa (kata-kata berkat) harus selalu meyakini dalam hatinya bahwa Tuhanlah yang menjadi sumber dan memberikan berkat-berkat tersebut.

Penggunaan umpasa adalah tergantung kepada konteks kegiatan yang dilakukan, ada umpasa untuk orang menikah, ada umpasa untuk orang meninggal, ada umpasa untuk paradaton, dan yang lainnya.

Jotjot do binege angka dongan mandok “Songon nidok ni umpasa ma dohonanku” ninna hape umpama do didok, songon i nang sabalikna. Dison tarida do na so haru diantusi beda ni umpasa dohot umpama.

Dangka ni hariara

Tanggo pinangait-aithon

Sai tubu ma di hamu anak dohot boru

Sitongka panahit-nahiton.

Molo umpasa hira sarupa do tu pantun di hata Indonesia. Sarupa do pangkuling manang soara ni hata i di pudi manang “bersajak”. Alai nang pe sarupa ni pantun dohot umpasa mansai asing do anggo philosofina.

Molo pantun di hata Indonesia dang marrupahon pasu-pasu manang tangiang.

Sungguh enak si mangga udang

Pohonnya tinggi buahnya jarang

Sungguh enak si anak lajang

Kemana-mana tiada larang.

Molo nibandingkon umpasa dohot pantun na di ginjang i boi ma analisaonta tarsongon on.

Molo 2 baris parjolo di hata Indonesia didok ma i “sampiran”. Dua baris parpudi digoari ma i “isi”. Jadi sude pantun 4 baris do i ma sampiran 2 baris jala isi 2 baris.

Laos songon i do nang umpasa. 2 baris parjolo digoari ma “tabas” jala 2 baris parpudi digoari “poda”. Jala molo umpasa adong do hubungan ni tabas dohot poda. Laos on do syarat ni sada umpasa na gabe pasu-pasu.

Tubuan laklak ma tubuan singkoru

Didolok purba tua

Tubuan anak ma hamu tubuan boru

Dongon mu saur matua.

Singkoru i ma hau na metmet na tubu di dolok-dolok, laos songon i ma, antong na hot ripe unang ma paasingkon sian tujuanna i maranak marboru songon na tarida di humaliangna. Nunga kenyataan umum di Bona ni pasogit sai tubu singkoru di dolok-dolok ai disi do hatubuanna.

Talapati majolo umpasa, na di toru on :

Bagot na madungdung

Tu pilo-pilo na marajar

Tading ma antong na lungun

Sai ro ma na jagar.

Molo toho do hita mangantusi umpasa i ingkon boi do patorangonta anatomi ni umpasa i huhut philosofina.

Songon naung pinatorang di ginjang i 2 baris parjolo margoar ma i “tabas” manang “sampiran” di bahasa Indonesia (bagot na madungdung dohot pilopilo na marajar).

Bagot i ma bona ni tuak manang “enau”. Molo niagati dapot ma tuak na sinoloman ni parmitu. “Madungdung” lapatanna nunggu matua, alani i ndang produktif be.

“Pilopilo” ima halto naung madabu sian bagot i jala laos tubu muse. Di Toba digoari ma on “sihilap” alana bulungna bontar sambariba jala rata sambaribanai. Aha do filosofina jala aha do pangantusion na tarsirat di umpasa i ?

Molo tabereng bagot naung madungdung ndang adong be sihirimon sian i alana nunga suda gogo, bulungna pe nunga malos. Alai di toru ni bagot naung mate i tubu manang ro ma pilopilo ima bagot na poso jala uli anak ni bagot naung mate i. Bage jagar do antong naung madungdung i alana adong do gantina nalaho pajagarhon jala na naeng maboan hajagaron. Songon i ma nang natua-tua molo monding, nang pe tong lungun roha, alai hatop do sae ai nunga ro angka anakhonna songon pilopilo na mangganti amana laho pajagarhon.

Sian hatoranganna di ginjang i tangkas do antong tarida na adong do hubungan ni sampiran dohot isi manang “tabas” dohot “poda”.

“Ala jagar do tabas jala sintong poda” ni umpasa i, tarsongon i ma umpasa na tingkos jala memenuhi syarat songon umpasa manang pasu pasu.

Alani antong unpasa na di ginjang dang boi pakkeon molo dakdanak do na monding. Alana ndang bagot i na madungdung manang mate alai pilopilo do na gotap. Antong molo songoni tu namate mangkar ndang boi pangkeon umpasa on. Umpama manang tudosan nama, sipaheon tusi ima: Hotang binebebebe, rambu pinulospulos unang hamu mandele ai godang do tudos-tudos.

Tingki mangampu biasana didok :

Turtu ma ninna anduhur

Tio ninna lote

Hata angka na uli dohot pasu-pasu

Sai unang ma muba unang mose

Tangkas do taboto molo anduhur mangunduhi do i sai hira na mangoloi. Songon i muse lote unduk do on manuruk tu tano, boi ma lambanghonon songon toru ni roha. Ndang rupani songon pidong sigurguak (suman do nian rupana tu anduhur) alai sai andorana na bontar i do dipadirgak-dirgak. Molo taida philosofi ni na mangampu, intina na laho mangoloi do, mangunduk huhut manjalo sude angka hata pasu-pasu dohot angka hata na uli, jadi mansai tingkos do anteng anduhur dohot lote na adong di humaliang ni angka Ompunta najolo dibahen gabe sampiran manang “tabas” asa sahat tu inti ni pandohanna ima “poda” songon na pinatorang di pudi i. Jadi ndang asal dibahen angka Ompunta najolo angka umpasa i, sude do i marlapatan jala timbo do philosofina. Ingkon adong do hubungan ni tabas dohot poda asa tingkos jala memenuhi syarat gabe umpasa, tangiang manang pasu-pasu.

Jadi taingot ma dison manurut hatorangan na di ginjang i, sitongka ni na unang do hape mamasu masu iba tingki mangampu.

Taparrohahon ma muse umpasa na di toru on :

Aek marjutlak jullak

Marjullak-jullak sian batu

Hata angka na uli dohot pasu-pasu

Ampuon ma i antong martongani jabu


Hatorangan : Aek na marjullak sian batu aek na tio do i (mual mata) na boi patorsok uas lumobi di hos ni ari. Nang pe so nilompa mual mata i alai mansai sehat do i, godang mangandung mineral dungi muse manigor sumbu do tu tolonan jala pintor sombu uas.

Alani na boi do antong angka hata na uli dohot pasupasu na pinasahat tu Suhut i pasombu uas ni nasida secara mental dohot rohani gabe didok ma, pasu-pasu i. Didok roha nunga tung tangkas de taantusi philosofi ni umpasa lumobi umpasa pangampuon.

Mardomu tu si, asa tahatahon ma nian hata umpasa dohot umpama i hombar tu rumang dohot ruhut ni angka ulaon, songon i di situasi manang hadirion ni keluarga na naeng manjalo hata i. Misalna, adong pamoruonta naung matua, nunga marpahompu nasida sian anak dohot sian boru. Naeng pasahathon hata si gabe-gebe, hata pasu-pasu ma hita tu nasida di ulaon si las ni roha, ala dipatupa nasida partangiangang (pengucap-an syukur) jala nunga tamat anak siampudanna sian singkola kedokteran. Pasahaton ma tu nasida hata umpasa na hombar tu ulaon i dohot tu hadirion nasida. Unang ma tadok tu nasida: “songan hata ni umpasa ma dohononhu amang boru: Bintang na rumiris tu ombun nasumorop, anak pe antong riris, boru pe antong torop.” Hata umpasa si songon i denggan ma antong tu angka keluarga naumposo. Alai, molo tu keluarga naung antar matua, songon pamuronta nangkin, dohononta ma: Andor halumpang ma togu-togu ni lombu, andor hatiti togu-togu ni horbo. Sahat ma hamu saur matua pairing-iring pahompu sahat tu na marnini marnono.

Laos songon i muse unang ma nian tabahen-bahen (dikarang-karang) sandiri hata umpasa manang umpama i, molo so taantusi lapatan dohot makna ni na tahatahon i. Tumagon ma tadok hata angka nauli nadenggan tu angka tuturta marhite hata na sian Tuhanta, molo so taboto dope angka sidohononta marhite-hite hata umpasa manang umpama.

Sada nari naporlu muse sidohonon, molo angka hata umpasa dohot umpama, somalna sian angka horong ni hula-hula dohot angka tulang do pasahathon i tu pamoruonna, manang sian angka natua-tua tu ianakhonna. Sipata, nian, godang do taida di tingki on adong sian horong ni pamoruon na pasahathon hata umpasa dohot hata umpama tu hula-hula manang tulangna, tarlumobi di tingki mangampu hata. Nadenggan ma i tutu. Alai, adong muse do mandok hata sian boru ala rap uduran ni hula-hula nasida mandok hata i.

Na naeng dohonon di son: molo sian posisi ni boru do hita pasahat-hon hata umpasa manang umpama, asa dumenggan, tama hita nian jolo mangido marsantabi baru pe asa tahatahon si dohononta. Alana, songon naung tangkas taboto, molo hata umpasa i, i ma hata pasu-pasu jala mangalean angka hata pasu-pasu somalna ingkon sian angka horong ni hula-hula dohot tulang. Adong hata ni Tuhanta na mandok: Jadi sandok ndang targagaon, nasumangap i do mamasu-masu na ummetmet. (Memang tidak dapat disangkal, bahwa yang lebih rendah diberkati yang lebih tinggi -Ibrani 7: 7).

Jala dumenggan muse tahe, molo di tingki na pasahathon hata i sai dimulai dohot pandohan: “songon hata ni natua-tua ma dohononhu”, “sai asi ma roha ni Tuhanta”, dohot angka na asing.

Sian angka hatorangan nangkin boi ma dohonon di son, ia hata umpasa i ma angka hata pasu-pasu na mardongan harapan, pangidoan tu Tuhanta Debata asa dilehon angka nauli dohot nadenggan di ngolu ni angka tuturta. Boi do i hahipason, ganjang ni umur, hagabeon, dohot angka na asing. Alai, molo hata umpama, angka hata tudos-tudos manang hata poda na mardongan harapan do i. Contoh:
Molo litok aek di toruan, tingkiron ma tu julu.

Pantun do hangoluan, tois hamagoan

Marbagi di na otik, marbagi di na godang.

Namalo ma tutu ompunta na parjolo i mambahen angka rumang, ruhut ni angka ulaon dohot angka hata i, na gabe songon angka falsafah hidup, identitas, budaya di hita halak Batak na porlu lestarihononhon asa adong warishononta tu angka ianakhonta.

Inkulturasi ni Hakristenon
Molo najolo di angka, umpasa sai tabege do hata, “Ompunta Mulajadi Na Bolon”. Sabotulna, ndang sala. i sesuai dohot pemahamannasida taringot tu Namarhuaso sijadihon nasa na adong ima Debata. Dungi muse molo sian kacamata ni Habatahon tumimbo do Ompung sian Ama. Alai ala marhite Jesus na, gabe pelean pardamean dohot ama i laho manobus hita jolma gabe dipatama hita songon naposo na marhite pandidion Hakristenon alani antong denggan do jouonta goarni Debata, tingki marumpasa hita asalma umpasa na tingkos gabe pasu pasu.
Tubu ma hariara

Di holangholang ni huta

Asima antong roha ni Tuhanta

Sai tubu ma anak na marsangap

Dohot boru na martua.


On ma sada tanda ni inkulturasi ni ugamonta i tu adatta.

Lapatanna gabe diparbadiai hakristenonta i ma adatta i asa mangkorhon pasu-pasu di sude ulaonta. Ai di na tarsurat i pe didok do “Ro Ahu ndang na laho manesa adat ni Ompumu, alai na paulihon do”.

Pinadomuni (dirangkum oleh) :

Sampe Sitorus, SE  (A. Hitado Managam Sitorus)

Medang Lestari B3/K11 08129052462

Referensi dan Daftar Pustaka :

  1. Partungkoan Tano Batak http://tanobatak.wordpress.com
  2. Simanjuntak Sitolu Sada Ina : http://simanjuntak.or.id
  3. St. DP Hutagalung (Op ni Salomo) http://purbatondangmargana.blogspot.com
  4. Silaban Brotherhood http://www.silaban.net
  5. Borsak Sirumonggur http://sihombing.lumbantoruan.net
  6. SIMARMATA (SIMATARAJA) http://simarmata.or.id
  7. Jambar Hata, T.M Sihombing, CV Tulus Jaya
  8. Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
  9. Literatur lain dan angka panuturion ni angka natua-tua.

Read Full Post »

Tubu ma tambinsu di dolok ni Pangaribuan,
Sai anak nabiusk ma ibana, anak na gabe si pajoloon.

Tubu ma pinasa di topi ni aek hole,
Sai boru na malo marroha ibana jala na boi paulaean.

Dangka ni hariara ma ni pangait-aithon
Simbur ma ibana mangodang, sitongka panahit-nahiton.

Habang ambaroba di atas ni Sibuntuon,
Sai burju ma ibana marroha, gabe jolma si tiruon.

Dolok ni Hutanauli hatubuan ni si marlasuna,
Goar nauli ma goarna i, donganna gabe jala mamora.

Eme sitamba tua parlinggoman ni siborok,
Sai dilehon Debata ma di ibana tua, imbur magodang diparorot.

Dohot angka na asing.

Read Full Post »

Follow

Get every new post delivered to your Inbox.

Join 878 other followers

%d bloggers like this: