Feeds:
Posts
Comments

Manulingkit Hinauli ni Sastra
di Umpasa Batak

Oleh: Ranto Napitupulu

OMPU RAJA di jolo, martungkothon siala gundi. Adat pinungka ni ompunta na parjolo, ihuthonon ni angka na parpudi. On ma sada umpasa na somal tabege, songon sosososo dohot poda, asa sai tongtong taihuthon adat na pinungka ni ompunta na parjolo i. Pinillit pe umpasa on, ala dihilala roha, andap jala mansai domu tu na hinirim sian guritgurit na jompok on.

Nian dirajumi roha do, ia di partingkian si saonari on, nunga tung mansai maol patupahon songon hata ni umpasa onteng, tarlumobi ma na marpardomuan tu partording ni angka ulaon adat. Ndang tarpatupa be apala dimpos songon na pinungka ni angka ompunta na parjolo i. Isara ni na marhata sinamot, nuaeng on, asing luat asing nama partupana. Godangan nama matua tu na simpelna dipatupa, jala ndang apala piga be luat na patupahon marnangkok tuat marpangidoan, manang marsitawaran di tingki na marhata sinamot. Asa, gabe adong ma nuaeng on pandohan di ulaon na marhata sinamot manang marpudun saut, si sahali mandok.

Nihilala, ndada pola sai pahebahebaon be angka i. Ai ia tung pe tauji laho paulakhonsa tu na pinungka ni ompunta na parjolo, gabe dapot do angka sungkun dohot pandapot na so marujung jala na so maralus. Isarana, tarsongon on ma sada sungkunsungkun i: di luat dia sintong songon i (marnangkok tuat marpangidoan)?

Jala adong ma muse pandapot na mandok, anggo so mago do unok (filosifi) ni ulaon i, ai aha pola sai tihaan jala sundatan i?

HINAULI NI UMPASA
Satolop be do ra hita, ia adat Batak i, matua sadalan do i dohot umpasanta i. Di dia diulahon adat, matua habegean do disi umpasa. Tung di ulaon adat na mansai metmet pe, sai habegean do dua-tolu umpasa. Ingkon hatindanghononta do, i do sada hataridaan ni ngolu habatahon i.

Borhat sian panatapan si songon i ma, molo tung pe nidok rupani nangkinon, ia angka parasingan ni pardalan ni paradaton i ndada pola be sai pahebahebaon manang tihaan, — ala nunga ragam mansamna, alai anggo angka upasanta i, ringkot sasahali tauji manulinghit, asa ro sihol ni rohanta paulakhonsa tu pandohan na polin, asa ndada holan uli begeon dipandohan, alai naeng ma uli dohot lapatanna.

Ia umpasanta i, sada bagian sian sastra Batak do i. Asing ni surat (aksara) Batak, hira luhut do angka sastra lisan sastra Batak. Sian angka sastra lisan i, umpasa dohot umpama nama na sai boi taboan tu tongatonga ni mangajana (publik adat).

Molo angka na asing, isarana: andung, turiturian, tonggotonggo, tabastabas (mantera), dohot lan na asing, ndang sai sude be hita boi mangulahonsa ala ruhutruhut ni parugamoon.

Ala bagian ni sastra do umpasanta i, ingkon parhatutuon do antong, ndang adong na mangambati manang na manihai, molo dipatomutomu (dicipta) sasahalak sada umpusa na imbaru di partingkianta si nuaeng on. Jala molo tauji pe tasulingkit, ia adong pe angka umpasanta i, na dipatomutomu (dikarang) angka ompunta na parjolo i do i. Dung dipatomutomu, ditonggohon ma i, asa manjadi gabe hata panggabei, hata pasu, jala hata pangidoan na tur. Dung i, dihatahon ma i di jolo ni mangajana di tingki ombas na lehet, laos dipaihutihut angka raja tinonggo ma i tu angka ari na mangihut.

Laos ala sastra lisan do umpasanta i (ndang tarsurat), ndang apala dapot be sitindangi (bukti literatur), songon dia do pandohan ni umpasa na pinatomutomu ni angka ompunta na parjolo i.
Songon dia ma pandohan naung margonti, jala angka dia ma naung pinatomutomu ni angka sundut na mangihut.

Nang pe songon i, molo tauji manulingkit rupani, lumobi sian panatapan ilmu sastra (kebahasaan), hira boi do surasuraon angka dia ma umpasa na pinatomutomu ni angka ompunta na parjolo i, nang pe masa parhosingan di hata (manang tanda dipandohan ni sastra).

Molo angka umpasa na pinatomutomu ni ompunta na parjolo i, sai matua domu do lapatan ni baris parjolo-paduahon (sampiran), dohot lapatan ni hata na di baris patoluhon-paopathon (isi, impola ni umpasa i). Sian haulion (estetika) sastra, mansai hona, jala ndang apala sai andulandul lapatanna. Tabo begeon ni sipareon, ala dos pandohanna di hata na umpudi (persamaan bunyi pada akhir frasa, mengandung unsur eufony –keindahan bunyi).

Naginurithon na mangihut on ma hira marpigapiga umpasa, na nirajuman pandohanna lobi polin jala jumpang na nindohan onteng; domu lapatan ni hata di baris parjolo-paduahon (sampiran) tu hata di baris patoluhon-paopathon (isi, impola):

1. Balintang pagabe,/ tumondakhon sitadoan./ Arinta ma gabe,/ Ai nunga tangkas hita masipaolooloan. Balintang, pagabe, sitadoan, marpigapiga parhohas ni tonun do on. Balintang dohot pagabe, tumodakhon (ndang tumondalhon) sitadoan, gabe sai jojor jala sosotma angka bonang di tonunan i. Marsipaolooloan angka parhohas ni tonun i, gabe manjadi ma ulos dohot abit na mansai uli.

2. Si tiptip marsigompa,/ hotanghotang pangarahutna./ otik pe na tupa,/ sai godang ma pinasuna. Ia si tiptip (ipit-ipit ni sarune), hotang na ni iris do pangarahut ni on. Sai matua diompa parsarune do on di abarana, ndang dihajuti (uju di ulaon), ai mabiar maropuk. Metmet do on, alai uli soarana. Molo so adong si tiptip, dang boi marsoara sarune. Jala laos sampulu pitu pe ogung dohot taganing dipalu pargonsi, ndada uli begeon i, molo so adong soara ni sarune. Jadi, otik (metmet) pe ibana, balga (godang) haulion ni soarana.

Jadi molo didok na deba gabe songon on, tintin na tinopa./ golanggolang pangarahutna, nunga hira morot ni hilala i sian hata (tanda, pesan) na sasintongna. Ai ndang adong tittin ditopa, dungi dirahut muse dohot golang-golang. Jala tittin pe, arta na arga do on. Jadi ndang domu hata i tu hata otik pe na tupa’.

3. Eme si tamba tua,/ parlinggoman ni siborok./Ompunta Debata na martua (nuaeng gabe Amanta),/sai horas ma hita diparorot. Eme nasinuan i, sitamba tua do i di parngoluon ni jolma. Di toruna marlinggomlinggom angka siborok (anak ni bojak na lea). Sangapma tabahen ompunta (amanta) Debata na martua i, asa sai horas ma hita diparorot.

Molo digonti angka dongan hata siborok tu dengke na mokmok di umpasa on dohot sidalian ala hurang suman padosdoson Debata dohot Siborok, hira so jumpang do nihilala. Ai holan tudosan (metafor) do siborok i, jala ndang tu Amanta Debata tudosan ni i, baliksa, tu hametmetonta do maradophon Debata.

Songon na nindohan dipamuhai ni guritgurit on, ala sastra (karangan seni) do umpasa i, tontu boi ma patomutomuon ni sasahalak umpasa na imbaru. Denggan jala uli ma i antong. Alai naeng ma nian polin, jala ndang holan tabotabo begeon ni sipareon ala ni pandohan na dos di pudi ni hata ni umpasa i (persamaan bunyi). Jala sai matua bagas ma nian lapatan ni umpasa i, ai doshon pangidoan manang hata pasu do umpasanta i.

Tauji ma jo manulingkit dua-tolu umpasa na hurang polin, hurang domu, jala mago tondi ni sastra sian umpasa i, atik pe tabo begeon ni sipareon.

“Dangka ni hau tadatada ma,/ panjangkitan ni si Sakkeus./ Horas ma hamu soada mara, diramoti Tuhanta Jesus.”

Atik pe di umpasa on adong hata pangidoan, jala digoari goar ni Tuhan Jesus, hira so domu do ni hilala, jala ndang marsahala. Hira so adong do pardomuan ni hau tadatada tu pangalaho ni si Sakkeus, jala ndang jumpang hata i tu hata pangidoan asa diramoti Tuhanta Jesus. Hira dos do tondi ni umpasa on dohot tondi ni umpasa na mangihut on:

“Pinagalak ma lampu petromak,/ binahen pangke sipiritus./ Sai dapotan ma hamu jampalan na lomak./didongani Jesus Kristus.”

Adong do muse marpigapiga umpasa, tabo begeon alai ndang domu, ala apala andul sian hasintongan. Songon on pandokna:

“Tombak ni Simalungun ma,/ parsobanan ni Simamora./ Salpu ma na lungun,/ sai ro ma silas ni roha.”

Nian tabo ma begeon umpasa on uju mangapuli roha ni na marsak. Jala mangihuthon haulion (estetika) sastra pe, isara dos ni soara di pudi ni pandohan (persamaan bunyi), nunga hira taho nian. Alai ndang jumpang di hasintonganna (logika), ai hira so jumpang do di siganup ari Simamora sian Dolok Sanggul marsoban tu tombak ni Simalungun. Padaohu!

Alai aut sura songon on dibahen: “Sibaganding ni Simalungun,/ panatapan tu tao toba./ Sai tading ma angka hinalungun,/ sai ro ma si las ni roha/” ra lobi uli ma jala polin.

Nahinirim marhite guritgurit na so sadia on, ia tung unang ma nian, ala so adong aturan manang ruhutruhut na tarsurat na mangihoti hita laho patumotomu umpasanta i, gabe mago arga hinauli (nilai estetika) sastra ni umpasanta i. Hape, tung mansai porhot hinauli ni sastra di angka umpasanta i.

Godang do hita bobonosan di patingkianta si nuaeng on. Ninna rohanta be do ra, so tung do sogot di angka sundut na mangihut, laos so marlapatan be angka umpasanta i, holan asal dipandok nama.

Iba pe, hira songon i do biar ni roha. So tung do gabe adong umpasanta i songon pantun na somal tabege di acara televisi, na songonon pandokna:

“beli kedongdong ke pasar minggu,/ beli duku ke pondok labu./ ke mana dong hari minggu, biar kita tahu datang bertamu.”

Ala ni i, ittap ni na boi taradoti, taradoti ma angka umpasanta i, ai arta na mansai arga do i di hita bangso Batak. ***
_______________________________________________
(Dimuat di Majalah Budaya DNT, 2015)

Ranto Napitupulu,
manghasiholi sastra dohot budaya Batak.
Maringanan di Perawang, Siak, Riau.

Eit.. jangan marah dulu, pertanyaan ini bukan untuk mempersoalkan keabsahan klaim marga Sitorus yang menyatakan Sibisa sebagai bonapasogit-nya.
Sebelum kita lebih jauh membahas Sibisa sebagai bonapasogit-nya marga Sitorus, maka perlu kita pahami dulu beberapa hal berikut:

Bonapinasa = tano Batak.
Boasa didok bonapinasa tanok Batak ? Pinasa ima hau natanggo (liat), pintapinta ni sijolojolo tubu ingkon tanggo (tidak rapuh) pangisi ni tano Batak.
Molo tinaba dangka ni pinasa ndang olo mabola/silbak, sai madabu tubonana do i.
(Pohon nangka adalah kayu yang kuat dan tidak rapuh, doa dan harapan nenek moyang orang Batak bahwa warga Batak harus kuat dan tidak rapuh).

Bonapasogit = huta ni samarga (huta asal muasal suatu marga)
Bonapasogit suansuanan nametmet do i hira sipilit bulungna, hirahira sameter timbona, alai tanggo ndang mura tarbutbut. Tarhira di sude luat di tano Batak do tubu i.
(Pasogit sejenis tumbuhan ini berdaun seperti sipilit, tingginya sekitar 1 meter namun kokoh tidak mudah tercabut akarnya. Demikian juga harapan nenek moyang Batak, keturunannya menjungjung tinggi klan-nya dan tidak mudah tercabut dari tradisi dan budaya-nya).

Bonabulu = tano panjararan.
Tano na tinombangan manang naginulut sian marga naasing laos dibahen ma i parhutaan.
(Tanah yang digarap maupun dikuasai termasuk didapatkan dari marga lain dan kemudian dijadikan perkampungan).

Bonasambang = huta ni sada marga alai nungga ditadinghon.
Bona sambang ima parhutaan pinungka ni sadasada marga manang saompu sahat tu namarsundut sundut alai dang adong be pinomparna namangingani huta i.
(Tanah perkampungan suatu marga atau se-nenek moyang namun tidak ada lagi diantara keturunannya yang menempatinya).

Merujuk pada keterangan tersebut diatas maka semua orang Batak memiliki bonapinasa yang sama yakni tano Batak, namun memiliki bonapasogit yang berbeda-beda.

Lantas bagaimana pengertian akan Bona ni pinasa ? Bona ni pinasa berbeda dengan bonapinasa, Bona ni pinasa ima tano parjabuan na gabe Lumban manang Huta ni marga manang ompu. Disuan ma disi Pinasa, Jior dohot Bagot. Jala dang boi gabe tano pribadi alai tano saompu. Bona ni pinasa i ma huta ni ompunabe.

(Bona ni pinasa ialah perkampungan yang menjadi Lumban atau Huta milik marga atau keturunan ompu tertentu, pertanda kepemilikan kampung biasanya pihak yang membuka perkampungan menanam pohon nangka, jior dan enau. Ketiga jenis kayu ini dapat memenuhi kebutuhan akan pembuatan perkakas. Bona ni pinasa berarti kampung ompung/nenek moyang).

PhotoGrid_1568641494670

ARGA DO BONA NI PINASA

Arga do bonani pinasa di angka naserep mar roha,
ai ido tona ni ompunta tu hita angka pinomparna.

Argado bonani pinasa di angka naburju ma roha
sai ingot ma mulak tu huta, mulak tu bona ni pinasa.

Ai tano hatubuan hi do tu si do ingkon mulak au …
Nang pe arga sinamot muna sai ingot ma mulak tu huta.

Arga do bona ni pinasa di angka na burju marroha
Sai ingot ma mulak tu huta, mulak tu bona ni pinasa.

Dao pe au nuaeng marjalang, sambuloki sai hot do i.
Sai ingot ma mulak tu huta, mulak tu bona ni pinasa

Lagu tersebut di atas bahkan sempat menjadi semacam ‘lagu wajib’ pada acara-acara marga Batak di perantauan. Maklum, lagu yang diciptakan rohaniawan asal Tano Silindung tersebut berisi pesan kepada orang-orang di perantauan agar selalu ingat akan kampung halaman.
Arga artinya berharga. Bona ni pinasa arti harafiahnya adalah pohon nangka. Sedangkan makna tersiratnya adalah: asal muasal atau kampung halaman. Jadi arga do bona pinasa di angka nabisuk marroha, artinya kampung halaman itu berharga bagi orang yang bijaksana.

Kembali kepada judul tulisan ini, Deklarasi PIR yang dilaksanakan di Ruma Parsantian pinompar ni Raja Sitorus di Lumban Lobu Sidugul, desa Parsaoran – Sibisa menegaskan kembali bahwa memang disanalah bonapasogit marga Sitorus. Jangan adalagi keraguan atas hal itu, kalaupun kemudian pinompar Raja Sitorus membuka perkampungan baru (mangarerak) hingga ke berbagai penjuru maka perkampungan tersebut kita maknai sebagai bona ni pinasa.
Ingot ma hita di bonapasogit Sibisa jala arga do di hita bona ni pinasa i ma angka huta napinungka ni ompunta.

Tabe mardongan olopolop.

St. Sampe Sitorus/br Sitanggang (A.Hitado Managam Sitorus).

20191026_220617Kebiasaan orang Batak di beberapa tempat menyebut Kanci atau Jobang untuk sangkar burung seperti gambar ini. Paranduhur somal didok doi parkassi.😀

UMPAMA
“Nang pe naung pituhali mamolus
aek parsalinan, tung so muba do
bolang ni babiat”

PhotoGrid_1571914190900
Terjemahan bebas:
Meskipun telah 7 kali menyebur ke air pemandian (air suci) yang diyakini bisa merubah segala sesuatu, namun belang-perilaku macan tidaklah berubah, alias macan akan tetap macan.

Umpama on ombuk do tu halak na sai tong jogal rohana, nian nunga godang napaingothon jala pasahat sipasingot alai ndang marna muba.

Unang ma nian didok halak umpama on tu hita, alani i denggan ma tapauba pangalahonta.

Roma 12:2 (TB) Janganlah kamu menjadi serupa dengan dunia ini, tetapi berubahlah oleh pembaharuan budimu, sehingga kamu dapat membedakan manakah kehendak Allah: apa yang baik, yang berkenan kepada Allah dan yang sempurna.

Rom 12:2 (TOBA) Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.

Tabe mardongan olopolop

St.Sampe Sitorus (A.Agam).

PhotoGrid_1568641494670

 

PARANAK = Raja Sitorus

PARBORU = Raja Sitanggang

Protokol Sitorus ->Raja Boltok).

Ima tutu ala naeng mulaanta ma manghatai dohot hulahulanta Raja i Raja Sitanggang, on pe di hamu hahadoli Raja Dori dohot hahadoli Raja Pane, di dok natuatua molo tinallik huling huling tarida ma holiholi, molo anggina bona ni hasuhuton hahadoli Raja Dori dohot hahadoli Raja Pane ma antong na gabe Parsinabul dohot Panamboli. Dihamu hahadolinami, ala di hami Raja Boltok ma hasuhuton hupasahat hami ma tu hamu asa hamu ma na gabe Raja Parsinabul dohot Panamboli di ulaonta sadarion, partingkian on hupasahat hami ma tu hamu hahadoli nami.

Hahadoli Raja Pane (St. Rindu Sitorus).

Mauliate ma di hamu anggidoli nami tutu ma na nidok mu i molo tinallik huling huling tarida ma antong holi holi, ala hamu anggidoli nami ma bona ni hasuhuton, hami hahadoli mu ma antong na gabe Parsinabul dohot Panamboli. Sian dos ni rohanta jala nunga tahasomalhon anggidoli Raja Dori ma antong na gabe Raja Parsinabul. Antong pinasahat ma tu anggidoli Raja Dori na gabe Raja Pangalusi di sungkunsungkun ni hulahuanta Raja i Raja Sitanggang. Partingkian on hu pasahat hami ma tu hamu anggidoli nami Raja Dori, botima.

Raja Dori (Pahotan Sitorus)

Mauliate ma di hamu hahadoli nami Raja Pane, songoni ma di hita pomparan ni ompunta Raja Dori, nunga di pasahat hahadolinta Raja Pane tu hita asa mardos ni roha ma hita ise ma hita na laho mangalusi sungkunsungkun ni hulahulanta Raja i Raja Sitanggang ? Boha dos ma rohanta ni pasahatma tu natua tua i Amani Managam asa natuatua i ma Raja na tapajolo ? (diolophon natorop nauli). Jadi songon i ma hupasahat hami ma tu natua tua i.

Sampe Sitorus (Ama Hitado Managam Sitorus) selanjutnya menjadi Raja Parhata ni Sitorus.

Gabe ma tutu jala horas, mauliate ma di hita na marhaha maranggi ala nunga dos rohanta jala di pajolo hamu ahu na gabe Raja Pangalusi di sunghunsunghun ni Raja i Raja Sitanggang, antong hu jalo hami dibagasan unduk dohot serep ni roha.

Jadi songoni ma di hamu nahuparsangapi hami Hula-Hulanami dohot saluhut horong ni Tulang nami Rajai Raja (bacakan daftar horong ni Hula-hula dohot Tulang) ala naeng mangarade ma hami laho mangalusi sungkun sungkun ni Hulahulanami Raja i Raja Sitanggang, jumolo ma tangkasan nami hamu hulahula nami.

Raja nami di dok natua tua dijolo hamu siaduon, dipudi hamu sipaimaon, ditongatonga siharungguan, sihorus nasuksuk do hamu Rajanami sigohi nalonga, songon nidok ni umpasa Rajanami: Ranting ni Bulu Duri, sanjongkal dua jari, Hula-Hula naburju do hamu na rade manuturi hami Raja parhata ni pamoruonmuna, antong raja nami annon adong do tingkina dohot ombasna di hami Raja Parhata ni pamoruonmuna mangido panuturion sian hamu di panghataionnami dohot Hulahula nami asa sude mardalan tu na denggan, dohot las ni roha, nueang pe na manangkasi ma hami boha Rajanami nunga tipak be parhundul ni Raja i ? (somal na diunduk horong ni Hulahula dohot Tulang). Mauliate ma Rajanami.

Dihita namarhahamaranggi rap dohot inanta soripada, ala naeng mulaan ma manghatai dohot Raja i asa tangkas ma tapaihutihut, songon i ma nang di inanta soripada asa marnapuran ma hamu.

Suang songoni ma di hamu Raja ni Parhobas nami ala naeng manghatai ma angka Raja marhite on pinangidohon tu hamu molo tung adong na naeng sihobasan jala siparadeon tu angka Raja dohot na niontang annon ma dung sidung marhata angka Raja, jala pinangido asa unang adong na marlaosan sian jolo ni Raja (jangan ada yang jalan di depan /diantara Raja Parhata ni Sitorus dan Raja Parhata ni Sitanggang).

Revisi Harga Cup Seal ukuran-14-12-10-oz

Songoni ma di hamu Hulahulanami Raja i Raja Sitanggang, nunga mangarade hami Rajanami, partingkian on hupasahat hami ma tu hamu, Botima.

Protokol ni Raja Sitanggang

Jadi i ma amangboru. Andorang so ta mulai panghataion asa lehon hamu ma jolo partingkian di hami namarhaha maranggi asa marsiaturan hami laho manise jala manungkun hamu amangborunami.

(Selanjutnya marsiaturan ma Raja Sitanggang – persis songon na niulahon ni Raja Sitorus di nalaho mangarade nasida). Dung simpul  di uduti ma

Raja parhata ni Sitanggang

Jadi ima amangboru .

Asa tek tek mula ni gondang, serser mula ni tortor, sise mula ni hata.
Artia mula ni ari, sipaha sada mula ni bulan, Binsar ma mata ni ari poltak mata ni bulan.
Ala naeng punghaonta ma panghataion denggan ma dipasahat Raja ni Boru pinggan panungkunan.

Raja parhata ni Sitorus (Sampe Sitorus)

Ima tutu di hamu hula hula nami Raja Sitanggang. Barisbaris ni gaja di rura pangaloan, nunga marsuru raja denggan ma antong oloan, ai molo ni oloan dapot ma antong angka parsaulian.

Asa Artia ma antong mula ni ari. Sipaha sada mula ni bulan. 
Binsar ma antong mata ni ari poltak mata ni bulan.
Naeng mulaan ma antong manghatai dohot Raja i denggan ma antong pasahathon pinggan panungkunan .

On pe di hamu boru nami pasahat hamu ma tu Raja i pinggan panungkunan on.

PhotoGrid_1566908997101

RAJA PARHATA NI SITANGGANG:

Mauliate ma Raja ni Boru (Amangboru), dison nunga dipasahat hamu Pinggan Panungkunan,

Di son adong napuran sirara uruk, napuran rata. Sai rata ma tutu di hita panggabean parhorasan.

Adong muse boras si pir ni tondi, boras si ribur-ribur, parbue gabe, asa torop maribur ma pinomparta gabe ma hita luhut jala horas horas. Asa pirma pokki, bahul-bahul pansaloman, pirma tondita ditambai Tuhan di hita angka pansamotan.

Dison muse ringgit/Rupiah namararga, homitan ni boru ni Raja, sipatamba las ni rohanta diloloan bolon on, tarida ma antong dison na Anak ni Raja do hamu, Pahompu ni namora, asa dohononnami ma Binanga ni Siporing binongkak ni tarabunga, muli tu sanggar ma amporik, muli tu ruang ma satua, sai sinur ma napinahan gabe naniula, hujalo hami ma on: (catatan: dibuat ma hepeng i, 3 lembar: salembar dilehon tu hambirangna, salembar dilehon tu siamunna, jala salembar ma hasurungan ni ibana Raja Parsinabung ni Sitanggang) huhut ma dijou Boru nasida: Hamu Borunami pasahat hamu ma jolo Pinggan Pangalusi on tu Paribanmu Raja Parhata ni Borunami Raja Sitorus, jala dung sahat diuduti ma hatana mandok: di hamu Borunami, sahat ma Pinggan Pangalusi on tu hamu, asa rade ma hamu laho mangalusi, mauliate ma.

Diuduti Raja Parhata ni Parboru ma hatana mandok: Amangboru, molo tung hundul di karosi pe hita, tarajumi ma naung hundul diamak tiar ma ate amangboru ? (Alusni Raja Parhata Sitorus: Nauli Tulang)

Ia ndung hundul hita nuaeng di amak tiar di inganan namarampang namarjual sigomggom pangisina, sai tiar ma antong parhorasan panggabean di hita tu angka ari nanaeng ro.

Nuaeng pe Raja ni Boru, bangkona do i sai jolo ninangnang do ninna asa ninungnung, sai jolo pinangan do asa sinunghun.  Ia nunga huhabosurhon hami sipanganon naung pinatupamu, sagat hami marlompan juhut dohot minum aek sitio-tio, asa dohonon ma:

Bagot namarhalto niagatan ndung marmeang. 
Horas ma hami namanghasagathon martamba tamba ma pansamotan dihamu namangalean.

Amangboru didok natuatua, dia ma laklakna, dia ma unokna. Dia ma hatana jala dia ma nanidokna, tangkas ma dipaboa amangboru sintuhu ni indahan masak, lompan na tabo dohot aek sitiotio naung huparsaulihon hami boti ma.

RAJA PARHATA NI SITORUS (SAMPE SITORUS)(mangalusi dung dijalo Pinggan Pangalusi)
Mauliate ma Tulang, las ma rohanami, di son nunga hujalo hami pinggan pangalusi. Didok natu-tua ni durung situma laos dapot porapora, molo pinajolo sada Raja sai adong do antong upa ni naloja, dihita namarhaha maranggi… dos ma rohanta upa loja ni raja napinatujolo ma on ate, jadi dos ma rohanta sada ma hita laho mangalusi sise dohot sunghunsunghun ni Rajai, molo on pinamasuk majo tu hajut niba, mauliate ma.

On pe antong Rajanami, songon nanidokmunai ma tutu, sai tu tiarna ma parhorasan panggabean, sai lam tu tiona angka pansamotan dihita tu angka ari namangihut.

Manungkun ma tutu Raja i di sintuhu ni sipanganon na so sadia i, jala dohononnami ma:

Asa sitiktik mar sigompa, golang-golang pangarahutna.                                                      
Otik so sadia pe na tupa, sai godang ma pinasuna.

Hinarat pangkal ni tobu lam tu tonggina, ndada namangholit hami Rajanami tung sibahenon do na so sadia, molo tung namangholit pe hami Rajanami, siala ni tangiangmu tu Amanta Debata sai tu tambana ma naniholit asa boi tarpatupa hami nadumenggen tu joloan on laho pasangaphon hamu Hulahulanami.

Asa bagot na marhalto ma naniagatan di robean,
Horas ma di hamu na manghasagathon,mandok mauliate ma hami na patupahon.

Taringot tu sungkun-sungkun ni Raja i, alusannami ma tutu: Panggabean Parhorasan do nidokna, boti ma Rajanami

RAJA PARHATA NI SITANGGANG :

Horas ma jala gabe Amangboru dialusmunai, ia didok hamu panggabean parhorasan do hape nanidokna, ba mauliate ma tadok tu Amanta Pardenggan Basa i, tutuma songon nanidokmuna i:
Timbo dolok martimbang panatapan tu pangaloan, Sai manumpak ma Amanta Debata nadiginjang, sai ro ma dihamu angka pansamotan singkat ni i marlipat ganda.

Amangboru… didok natuatua: Marangkup do nauli mardongan do na denggan, siangkupna songon nahundul, siudurna songon namardalan. Asa tangkas ma uju purba, tumangkasan uju angkola. Asa tangkas hita Maduma, tumangkasan ma antong Mamora, angkup ni panggabean parhorasan i haru tangkas ma dipaboa Raja ni Boru, asa tangkas dibege angka Amanta Raja, dohot Inanta Soripada tarlobi angka Raja ni Hula-Hulanta, botima da Raja ni Boru.

RAJA PARHATA NI SITORUS (SAMPE SITORUS) :

I ma tutu Rajanami, mansai las situtu rohanami umbege sungkun-sungkun ni Raja i, tutu ma hamu sisuan bulu jala si panjala, siboto uhum do hamu jala angka anak ni Raja.
Songon nanidok ni Raja i,  Asa tangkas ma uju purba tangkas ma uju angkola, tangkas ma hita maduma, tangkasan ma na mamora, paboaonnami ma rajanami angkup ni panggabean parhorasan i:
Rajanami… didok natuatua:

Denggan bulu godang, denggan bahen hitehite. Molo magodang ianakhon denggan ma hot ripe. Ia anaknami beremuna nunga magodang jala lao mardalani tu huta ni Raja i laos pajunpang dohot boru ni Raja i laos ditogihon tu jabu. Nunga hatahon ananami holong ni rohana laos diundukhon boru ni Raja i. Laos i do umbahen na ro hami ditingki na salpu mandapothon Raja i laho patua hata.

Sian dos ni rohanta Rajanami, na sogot rap taudurhon nasida laho manjalo Pasupasu Pardongansaripeon sian Tuhanta marhite naposona dibagas joro.

Alani i Rajanami namangelek ma hami asa laos di partingkian on ma hupasahat hami somba ni adat somba ni uhum tu hamu Hulahulanami, songon i ma pangidoan nami Rajanami.

RAJA PARHATA NI SITANGGANG :

Mauliate ma amangboru, nunga tangkas dijalo borunami na gabe parumaenmuna anakmuna na gabe helanami pasupasu pardongansaripeon sian Tuhanta marhite naposona. Anggiat antong rongkap na gabe i rongkapna saur matua.

On pe didok amangboru asa di partingkian on pasahaton muna somba ni adat somba ni uhum, jadi namarhata sinamot ma hita saonari amangboru ? (somalna dialusi Raja Parhata ni Paranak: nauli Rajanami)

Diuduti Raja Parhata ni Parboru:

Antong molo songoni dohonon nami ma antong:

Pat ni gaja tu pat ni hora. Angka pomparan ni Raja do hamu jala angka namamora.

Asa nunga pitu lilinami paualu jugia nami. Nunga tung uli nipinami ai ro Raja Sitorus manggohi hajutnami.

Dibahen i godang ma pasahat hamu jala jojor di hatahon Raja ni Boru, piga bara ma horbo dohot lombu, piga rantiti ma sere nang perak, hatahon hamu ma, rade ma hami manjalo.

RAJA PARHATA NI SITORUS (SAMPE SITORUS) :Mauliate ma Rajanami, tutu do nanidokmunai Pat ni gaja tu pat ni hora angka anak ni Raja do hita jala angka pahompu ni namora, alai tumangkas do Rajanami dohononnami rap Anak ni Raja do hita naburju marroha.

Tangkas do hutanda hami burju ni rohamu mar-Boru dohot mar- Bere:

Ai songon nidok ni umpama i Rajanami

Urat ni Singkoru, dihunghupi bulung bira, haburjuon ni hamu Raja Sitanggang marboru dohot marbere nunga tarbarita sahat ro didia. Mangingot i do Rajanami umbahen nabarani hami ro tu adopanmu : ai ida-ida do nabutong jora-jora do namale. Jadi namarsomba ma hami tu hamu Rajanami, taringot tu sinamot ni anaknami boli ni boruni Raja i  tarsongon on ma nian Rajanami elek-eleknami: asa si sahali mangelekhon sisahali manombahon ma hami Rajanami, parsinamot na hibul laos hupasada hami ma i marhite uang rupiah natinopa ni pamarentanta.

Songoni ma pangidoannami tu hamu Rajanami.

RAJA PARHATA NI SITORUS:

Horas ma jala gabe Raja ni Boru, pangidoanmu asa sahali mangelekhon sahali manombahon, nauli ma i Amangboru, on pe gollit hamu ma Amangboru asa tung tangkas botoon ni angka Amanta Raja dohot Inanta Soripada, Botima.

RAJA PARHATA NI SITORUS (SAMPE SITORUS) :Mauliate ma Rajanami, malambok pusu hami hata ni Raja i, andorang so hu gollit hami, namangelek ma hami Rajanami asa tangkas di ida Rajai naung sahata hami, mangido partingkian hami asa mardos ni tahi hami namarhahamaranggi suang songon hupasahat hami jambar hata tu boru dohot berenami tarlobi mangido panuturion hami sian saluhut Hulahula dohot Tulangnami, lehon hamu ma jolo partingkian dihami Rajanami.

Parjolo ma tu Boru/Bere, didok ma hatana songon on: Di hamu Boru dohot Berenami, hamu do nahupangasahon hami di ulaon on, asa pos roha ni Hula-Hulanami Raja i Sitanggang naung sisada hata sisada tahi hita dihata ni Sinamot sisombahononta tu Hula-Hula i Raja Sitanggang, on pe jambar hata hupasahat hami tu hamu Raja ni Boru dohot Berenami.

Hata sian Boru dohot Bere:

Mauliate ma dihamu hula-hulanami, molo sian hami Rajanami, songon dia pe na naeng hatahononmu taringot Sinamot sipasahaton muna tu hula-hula ni hula-hulanami, rade ma hami Boru dohot Beremu laho manungkoli hamu di gogo dohot sipatupaon, sipanumpahi ma hami Rajanami. Mauliate ma.

Raja parhata ni Sitorus (Sampe Sitorus):

Mauliate ma di hamu boru dohot berenami. Nuaeng pe dihamu saluhutna nahuparsangapi hami Raja ni Hula-Hulanami dohot Tulang nami (didok ma susunan ni Hula-Hula suang songoni dohot Marga nasida) nunga tangkas di paihutihut hamu panghataion nami di namarpangidoan hami tu Raja ni Hula-Hulanami asa sahali manombahon nian hami di Sinamot ni anaknami boli ni Boru ni Hulahulanami Raja Sitanggang, andorang so husombahon hami Rajanami, nuaeng pe mangido panuturion ma hami sian hamu saluhut Hulahula dohot Tulangnami, ai hula-hula naburju do hamu narade manuturi hami angka Pamoruonmu, songon na nidok ni Ompunta naparjoloi do dohononnami: dijolo hamu siaduon Rajanami, dipudi hamu sipaimaon, sihorus na gok do hamu Rajanami, sigohi nalonga, antong hupasahat hami ma panghataion on tu hamu, botima.
(huhut dijou Boruna laho pasahathon Microphone)

Hata sian Hula-Hula ni Raja Sitorus:

Dung marsiaturan nasida somalna Hula-hula ma na pasahathon panuturion. Tarsongon on ma:

Mauliate ma di hamu Raja ni Borunami, tangkas do hupaihut ihut hami hamu di panghataionmu dohot Hulahulamu dongan parhundul nami tung mansai denggan marsipaolo oloan. Las bahen hamu roha ni hulahulamu, ai molo las roha nasida hami pe antong las ma roha nami. Asa dohonon nami ma antong Balintang ma pagabe tumandanghon sitadoan, arimuna ma gabe molo dung masipaolooloan. Songoni ma hata panuturion sian hami sude horong ni Hula-Hula dohot Tulangmuna.

RAJA PARHATA NI SITORUS (SAMPE SITORUS) :

Mauliatema Rajanami di panuturion ni Raja i nunga pos be rohanami laho manghatahon Sinamot sipasahathon nami tu Hulahulanami Raja i Raja Sitanggang.

Songon i nang di hita namarhaha maranggi, nunga tangkas dituturi Hulahula dohot Tulangta hita, jadi  sada ma hatanta ate, naung dos ni rohanta i ma huhatahon ate ? Mauliate ma.

Rajanami, Hula-Hulanami nunga tangkas dipaihutihut hamu naung sahata do hami namardongan tubu, borunami, tarlobi nunga mangido panuturion hami sian Hula-hula dohot Tulangnami.
Antong Rajanami, hatahonon nami ma Sinamot ni anaknami boli ni boru ni Raja i, godangna Rp. 35.000.000,-

Pos roha ni Raja i, taringot tu Suhi ni ampang naopat dohot todoan panandaion tangkas do pasahatonnami di tonga ni mangajana.

Uli ma roha ni Raja i, mangelek hami digabehon Raja i ma.

RAJA PARHATA NI SITANGGANG :

Dihita namardongan tubu, songon i nang Boru dohot Berenami, tarlumobi di hamu sude nahuparsangapi hami Raja ni Hula-Hulanami, nunga rap umbegesa hita dinaung dihatahon Raja ni Parboruonta godang ni Sinamot  sipasahaton nasida, boha alusta:
Songon on ma pangatur ni panungkunan: (ndang pola be tinaringotan Horbo, Lombu d.n.a.)
Parjolo dipasahat ma tu Boru dohot bere:

BORU :

Mauliate ma Rajanami, dipasahat hamu jambar hata tu hami Borumuna. Antong sian hami Borumu, alusnami sipangihut do anggo hami, songon dia pe dos ni roha mu di angka panghataion ni Raja i dohot Raja ni Paribannami, namangihuthon ma hami, botima hatanami Rajanami.

Songoni ma alus sian Borunta, nuaeng pinangido ma panuturion sian Hulahulanami dohot horong ni Tulangnami.

Di hamu saluhutna Hula-Hula dohot Tulangnami; (unang lupa manjouhon Marga ni Hula-Hulai) nunga rap umbegesa hita Rajanami di pangidoan ni Pamoruonnami di Somba ni Uhum, Somba ni Adat di hata ni Sinamot sipasahaton nasida jala nunga tung tangkas dihatahon nasida godangna Rp. 35.000.000,-. Andorang so hugabehon hami asa pos rohanami Rajanami, mangido panuturion ma hami sian saluhut hamu horong Hula-Hulanami dohot Tulangnami, ai songon nidok ni Ompunta sijolo-jolo tubu : Ranting ni Bulu Duri, sanjongkal dua jari, Hula-hula dohot Tulang naburju do hamu na rade manuturi suang songon i mangajarajari (laos digora ma Boruna laho pasahathon Microphone tu Hula-Hula)

Hata sian Hula-Hula: (Hula-Hula manungkun donganna sahundulan = somalna satolop do nasida Tulang ni Boru Muli ma mangalusi)

Horas ma jala gabe dihamu Raja ni Borunami, Taringot ni pangidoanmu tu hami hula-hulamu, nunga satahi hami, ahu ma na pasahathon panuturion:

Mansai las rohanami umbege panghataionmuna hamu namarhula-marboru di na naung masipaolooloan: on pe sian hami Hula-hulamu sidohononnami tu hamu  Balintang ma pagabe tumandanghon sitadoan, sai Asi ma roha ni Tuhanta, ba arimuna ma gabe ala nunga tangkas hamu masipaolooloan.
Songoni ma hata sian hami Hulahula dohot Tulangmuna.

RAJA PARHATA NI SITANGGANG :

Mauliate godang ma hupasahat hami Rajanami di hata panuturionmuna.

Dihamu bona ni hasuhuton,

Lata pe na rata duhutduhut do sibutbuton,
Hata pe hata ni Raja tong do hasuhuton si sungkunon.

Andorang so hugabehon hami partingkian on hupasahat hami ma tu hamu.

BONA NI HASUHUTON (PAIDUA NI SUHUT) Mauliate ma Hahadoli, Raja do hamu raja naung pinatujolo, Tandokmu do tandokhu, Pandok mu do pandokhu, molo nunga uli didok roha ni Raja i, nunga uli i tong di hami Bona ni Hasuhuton, on pe gabehon hamu ma, Botima.

RAJA PARHATA NI SITORUS :

Songoni ma dihamu Raja ni Pamoruonnami, nunga dibege hamu panghataion nami na mar Dongan tubu, Borunami, tarlumobi panuturion ni Hulahulanami, alai nang pe songoni taringot Suhi ni Ampang na opat dohot angka todoan panandaion tangkas do pasahoton muna di tonga ni mangajana  ate Amangboru ? Mauliate ma, on pe amang boru taringot tu sinamot si sombahonon muna hugabehon hami ma i, borhat ma hamu pasahathon.

RAJA PARHATA NI SITORUS (SAMPE SITORUS):

Gabe ma jala horas Rajanami, Mauliate ma dipangoloionmuna dielek-eleknami.

Laos digora ma Suhut Sihabolonan mandok songon on:

Di hamu Suhut Sihabolonan nunga tangkas digabehon Hulahulanta pangidoanta taringot sinamot si pasahatonta, asa borhat ma hamu laho pasahathon tu Raja i.

Parmusik nami ala naeng pasahat Sinamot ma hami tu Raja i Raja Sitaanggang, asa bahen hamu ma nahombar tusi, mauliate ma.

Dung ditortorhon, dipatedek Parboru ma ulosna jala dipasahat Paranak ma sinamot i.

Ihut ma muse pasahat:

*Surungsurung tu Suhi ni Ampang Naopat

* Upa Tulang tu Tulang ni boru muli, laos dison ma Parboru pasahathon Pinggan Panganan tu sude horong ni Hulahula dohot Tulang nasida.

* Todoan dohot panandaion, (hombar tu daftar ni Suhi ni Ampang Naopat dohot Panandaion).

• Pinggan Panganan : tu Raja parhata ni Sitanggang upa ni natorop (somalna Parboru do naparadehon pinggan panganan alai dipasahat ma jolo tu Protokol ni Sitorus laos Protokol i ma napasahathon tu Raja Parhata ni Parboru, on ma nanidokna masinangkohi tanggani balatukna alai masitariparan).

• Tintin Marangkup: Tulang ni hela,  Sijalo Upa Tintin Marangkup (napasahathon Suhut Parboru Sitanggang nidonganan ni Suhut Paranak). Dijalo Suhut Parboru ma amplop namarisi hepeng sian Paranak laos dipasada tu amplop nanaeng sipasahatonna tu Tulang ni Hela i.

Laos di son ma suhut Paranak pasahathon Pinggan Panganan tu saluhut horong ni Hulahula dohot Tulang. Dung i di uduti ma muse.

RAJA PARHATA NI SITANGGANG:

Amangboru, mauliate ma dohononnami tu hamu Pamoruonnami, nunga sude hami marlas ni roha, nunga tangkas hujalo hami angka napinasahatmuna. Ba didok rohanami Amangboru, asa dos nangkokna dohot tuatna, atik adong sipangidoonmu sian hami hula-hulamuna, dok hamu ma, olat ni natolap gogonami oloannami do pangidoanmu.

RAJA PARHATA NI SITORUS (SAMPE SITORUS) :

Horas ma jala gabe Rajanami, mansai las rohanami diboa-boamunai, asa pasahatonnami ma pangidoannami tu hamu Rajanami: Anggo pangidoan Rajanami asa Ulosi hamu ma hami sude dohot Ulos Herbang didongani tangiangmuna mangido pasu-pasu sian Amanta Pardenggan Basa i, Songoni ma pangidoannami Rajanami, mauliate ma.

(Ala naung adong hian panghataion taringot tu godang ni Ulos Herbang sipasahaton Parboru  tu Paranak didok Raja parhata ni SITANGGANG ma:

RAJA PARHATA NI SITANGGGANG: Mauliate ma Amangboru, sintong do pangidoanmunai, alai songon naung hudok hami dihatanami naparjolo, olat ni na boi tarbahen hami Ulosannami do hamu dohot Ulos Herbang, alai molo tung so sude pe hamu annon na boi huulosi hami marhite Ulos Herbang, pasahaton nami ma tu nasida Ulos na tinonun sadari, songoni ma Amangboru, mangarade ma hamu:

Raja parhata ni Sitorus (Sampe Sitorus)

Mauliate ma rajanmi jala pasahat hamu ma (di jahahon ma sada-sada hombar tu daftar sijalo ulos)

1         Ulos Pansamot

2         Ulos hela

3         Ulos tu pamarai

4         Ulos tu simanggokhon

5         Ulus tu sihunti ampang

6         Ulos tu bapa tua na

7         Ulos tu bapa udana

8         Ulos tu namboruna

9         Ulos tu ibotona

10     Ulos tu parompuon

11     Ulos tu Parsadaan .

Laos dipasahat Protokol ni Sitanggang ma ulos tinonun sadari. Digorahon Raja Parhata ni Sitorus ma naung dijalo ulos-ulos songon ulos tinonun sadari, laos dibagihon ma tu saluhut horong ni Sitorus dohot Boruna na ro mangadopi ulaon i.

RAJA PARHATA NI SITORUS (SAMPE SITORUS):

Rajanami… nda tung so tagamon adong parbue ni holong si pasahathon mu tu anak dohot parumaennami, partingkian on hupasahat hami ma tu Raja i.

Raja parhata ni SITANGGGANG

Pos rohamu amangboru, jou hamu asa mangarade ma helanami dohot borunami.

RAJA PARHATA NI SITORUS (SAMPE SITORUS):

Songoni ma di anak dohot parumaenniba, ala naeng pasahat ulos holong ma Hulahulanta Raja i Sitanggang asa mangarade ma hamu.

Diuduti ma pasahat ulos holong dimulai sian hasuhuton parboru, na mardongan tubu dohot na marpariban, dongan sahuta sahat tu Parsadaan .

Raja parhata ni SITANGGANG

Songon ima amang boru nunga ris hami pasahat ulos , ipe asa hupasahat hami tu hula hula nami tingkion laho pasahat tangiang hata pasu gabe suang songon i parbue ni holong tu boru dohot hela nami, asa hundul ma nasida tu jolo on .

RAJA PARHATA NI SITORUS (SAMPE SITORUS):

Mauliate ma rajanami, nunga managarade nasida.

Raja parhata ni SITANGGANG

Dihamu horong ni hula hula dohot tulang nami, atik tung adong parbue ni holong sipasahaton mu tu boru dohot hela nami, partingkian on hupasahat hami ma tu hamu. Rajanami… molo siat pangidoannami laos dipartingkian on ma pasahat hamu hata pasu gabe tu boru dohot helanami. Molo siat pangidoan nami, hamu hula hula ma na gabe pargomgom. Botima di hamu hula hula dohot tulang nami .

Dialusi hula hula laos di jou ma sada sada ,dimulai sian hula hula anak manjae.

Dung sidung horong ni hula hula dohot tulang ni Parboru, didok Raja Parhata ni Sitanggang ma ma:

Mauliate ma di hamu hula hula dohot tulang nami ,nunga dipasahat hamu ulos holong dohot pasu pasu tu beremu ima hela dohot boru nami sai anggiat dipasaut Debata angka tangiang dohot pasu pasu mu i. Asa dohonon ma songon hata ni si tua tua ,

tingko ma inggir inggir ,bulung nai rata rata , 
hata pasu pasu mu i sai pasauthon ma amanta Debata ”
Asa mangerbang bunga bunga toho di parnakhok ni mata ni ari ,
Molo tung parjolo pe hamu hulahula nami marhehe nauli tangiang nami tu Amanta Debata Horas hamu dipardalan, horas ma hami na tading manguduti ulaon on.

Songon ima amang boru nunga sidung sian hami dohot hula hula nang tulang nami,  on pe hupasahat hami ma partingkian on tu hamu ,

RAJA PARHATA NI SITORUS (SAMPE SITORUS):

Mauliate ma rajanami, Dihamu horong ni hula hula dohot tulang nami didok natua tua:

Obuk do jambulan ni dandan baen samara.
Pasupasu marhite tangiang ni Hulahula dohot Tulang padao sahit padao mara.

Alani i Rajanami atik tung adong sipasahaton mu tu anak  dohot parumaennami, partingkian on hupasahat hami ma tu hamu, laos molo siat pangidoan nami asa dipartingkian on ma pasahat hamu hata pasu pasu tu anak dohot parumaen nami . Udut tusi Rajanami dang na mangajari hami, molo siat pangidoan hamu hula hula ………….. ma na gabe pargomgom asa marsiaturan ma hamu .Botima di hamu hula hula dohot tulang nami. Boru nami pasahat hamu microphone on tu Raja i.

Dialusi hula hula laos di jou ma sada sada, dimulai sian hula hula anak manjae.

Dung sidung horong ni hula hula dohot tulang ni Paranak mangulosi ,

RAJA PARHATA NI SITORUS (SAMPE SITORUS):

Mauliate ma di hamu hula hula dohot tulang nami, nunga dipasahat hamu ulos holong dohot pasu pasu tu beremu ima anak dohot parumaen  nami sai anggiat dipasaut Debata angka tangiang dohot pasu pasu mu i. Asa dohonon ma songon hata ni si tua tua ,

“ tingko ma inggir inggir ,bulung na i rata rata , 
hata pasu pasu mu i sai pasauthon ma amanta Debata ”

“Asa naung sampulu pitu ma jumani sampulu ualu .
Hata pasu pasu mu i ampuonnami ma i antong martonga ni jabu “

Molo tung parjolo pe hamu hulahula nami marhehe nauli tangiang nami tu Amanta Debata

“ Asa mangerbang bunga bunga toho di parnakhok ni mata ni ari , 
Horas hamu na parjolo marhehe nauli, horas ma hami na par pudi.

Jadi songon ima di hamu hula hula nami ala nunga singkop ulaon ta ninna roha nami ta uduti ma marhata si gabe gabe sian hamu, mangampu ma sian hami. Dung i ta ulahon ma Upa manggabei.

Ndung i taulahon ma Paulak Une dohot Tingkir Tataring (ulaon sadari) laos pasahathon nami ma Pasituak Natonggi.

Simpul i tapaujung ma ulaonta marhite tangiang sian hamu hulahula nami. Botima Rajanami.

Raja parhata ni Sitanggang

Nauli mai amang boru .

Dungi marhata si gabe gabe sian horong ni Parboru Sitanggang, di pasahat Raja Parhata ma tu Bona ni Hasuhuton.

Simpul marhata sigabegabe, dipasahat Raja Parhata ni Sitanggang ma partingkian tu Raja Parhata ni Sitoru

RAJA PARHATA NI SITORUS (SAMPE SITORUS):

Mauliate ma Raja nami, songon patujolo ni pangampuion nami, molo tung sahalak pe hami mangampu Rajanami naung sude ma hami Parboruonmuna Raja Sitorus dohot Boruna mangampu, uli ma roha ni Raja i.

Asa dohonon nami ma antong:

Aek marjullakjullak sian tongatonga ni batu,
jullak jullak na i pamasuhon tu tabu tabu laho bohanon tu jabu.

Saluhut hata nauli hata pasu gabe naung pinasahat ni hamu nahuparsangapi hami tarlumobi ma i Hulahulanami Tampubolon, ampuon nami ma i antong martonga ni jabu.

Songon i ma dihamu Bona ni hasuhuton nami sahat ma tingkina di hita mangampu nauli mangampu nadenggan hata pasu gabe naung pinasahat ni saluhut na taparsangapi tarlumobi ma i sian Hulahulanta Raja Tampubolon. Antong pangampuion on pinsahat ma tu hamu, botima.

Dung sidung mangampu di uduti ma dohot upa manggabei, borhat ma Raja Parhata Sitorus tu adopan ni Raja Parhata Sitanggang.

Raja parhata ni SITANGGANG

Hata di tingki ulaon olop olop sian Raja parhata ni Tampubolon .

“ Silallan uruk uruk silallan aek toba , na metmet dang marungut ungut , na magodang pe marlas ni roha ”

Ta olophon ma: Horas, Horas, Horas.

Laos dipamasuk Raja Parhata ni Sitorus ma hepeng indukna i (Seratus Ribuan) tu hajut ni jas ni Raja Parhata ni SITANGGANG songoni nang baliksa (sebaliknya), laos didok Raja Parhata ni Paranak ma: boras na i ma di hami Tulang, jumolo ma dibuat Raja Parhata ni SITANGGANG manang piga lembar uang i jala mulak ma Raja Parhata ni Paranak tu hundulanna laos dibuatma 2 lembar dungi di bagi-bagi ma tu angka namarhaha maranggi Sitorus dohot Boruna.

Mardalan ma ulaon sadari (Paulak Une dohot Tingkir Tataring).

Dipasahat ma pasituak natonggi ni angka hulahula.

Dungi ditutup hulahula ma marhite ende dohot tangiang .

Marsijalangan ma laos marhehe nauli.

Tarsongon i ma naniingot ulaon unjuk ni anakniba Fredi Sitorus br Sitanggang.

Pinadomuni (dirangkum oleh) :

Sampe Sitorus, SE  (A. Hitado Managam Sitorus)  08129052462

Referensi dan Daftar Pustaka :

  1. Jambar Hata, T.M Sihombing, CV Tulus Jaya
  2. Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
  3. Masyarakat dan hukum adat Batak Toba Oleh J C Vergouwen, Fuad Mustafid, T. O. Ihromi,
  4. BUKU PARSADAAN RAJA SITORUS DOHOT BORUNA SEJABODETABEK
  5. St. DP Tampubolon (Op ni Salomo) http://purbatondangmargana.blogspot.com
  6. RIM NI TAHI Pasaribu Parlintong, posted by Advendes Pasaribu http://ultopultop.wordpress.com/
  7. Partungkoan Tano Batak http://tanobatak.wordpress.com
  8. Simanjuntak Sitolu Sada Ina : http://simanjuntak.or.id
  9. Panuturion ni angka natua-tua.

Horbo Sitingko tanduk.

Hira sude do horbo didok Sitingko tanduk, ala hata ni raja (arti kiasan do Sitingko tanduk i).

20190710_233916

Horbo Sitingko tanduk = horbo partanduk na hintung.

Horbo Sisapang naualu

Mangihuthon panuturion ni Tulang Op.Mikhael Tamba, dison pinaandar taringot tu horbo Sisapang naualu.

Molo didok horbo sisapang naualu indada ala ni bolonna.
Molo ala ni bolonna do “Silima Haehae” do goarna.

Molo Sisapang naualu najolo horbo pelean do on didok goarna.
Indada ala ni bolonna alai ingkon gok suhat suhatna ima:

Tanduk ranga

Rukkung mokmok

Ihur diginjang ni dugulna otik

Pisoran Somba guru (Ualu marsitorus). Pisoran Somba guru:
1. Di osang dua paipar ipar
2. Dirungkung dua paipar ipar
3. Di tanggurung dua paipar ipar
4. Di butuha dua paipar ipar.
Dangboi pisoran i mansijoloi, ingkon searah, sejajar dohot sarupa balgana.

Mokmok dang martihas.

Igungna dang rungapon alani sungil sungil.

Sisilonna danghea baroon

Sisikna horbo gunung (birong otik)

Onma sada gombar ni horbo sisapang naualu.

FB_IMG_1562773929164

Tagellengpe horbo i molo hot do di suhat suhatna, ima nanidokna Sisapang Naualu.

Jotjot tabege angka Raja Parhata manghatahon:

Horbo sitingko tanduk tu horbo si sapang naualu, parbutuha mangalilit parmata mangalu alu, marjampal di balian, di huta marngalu ngalu.

Hata nauli hata nadenggan, hata pasu gabe naung pinasahat mu tu hami tangkasma i ampuon nami martonga ni jabu.

Mangihuthon hatorangan sian Tulang Patuan Raja Bonar Siahaan (OP. Tumitang), ia horbo sitingko tanduk molo pajumpang dohot horbo sisapang naualu pintor mardugu do i.

Molo parbutuha mangalilit parmata mangalualu, ima na anturaparon, dang holan na male.

Molo boti hurang ampit do pandohan umpasa on tu pangampuon.

FB_IMG_1551655078510.jpg

Horbo Silimahae

FB_IMG_1562775692705

Nigurithon hombar tu panuturion ni angka natuatua.

Tangerang 10 Juli 2019

St. Sampe Sitorus/br. Sitanggang (A.Hitado Managam Sitorus).

Screenshot_20190704-204946_Chrome

LAPATAN NI ANGKA SUANSUANAN NA BINAHEN TU SIJAGARON

Sijagaron ima songon tanda manang patuduhon naung marpahompu na monding i.

Molo holan marpahompu sian anak dope, dipeakhon ma di sabola siamun ni simanjujung ni na monding i.

Molo holan marpahompu sian boru dope, disabola hambirang ma.

Molo dung marpahompu sian anak dohot sian boru di peakhon ma di ujung ni simanjujungna.

Hata ni sijagaron:

Ampang dohot Jual

Ampang do jual, binahen panuhatan, asi ma antong roha ni Tuhan, nunga gabe natuatuaon umgabean ma angka pinomparna sundut naumposo.

Eme
Eme sitambatua ma parlinggoman ni siborok.
Debata do silehon tua, luhut ma hamu pinompar ni natuatua on diparorot.

Hariara

Tubu hariara di holangholang ni huta
Tubu ma anak namarsangap dohot boru namartua.

Baringin

Martantan ma baringin, marurat hariara.
Horas ma tondi muna madingin, tumpahon ni Amanta Namartua Debata.

Sanggar

Asa Binanga ni siporing binongkak ni Tarabunga. Muli tu sanggar ma amporik, muli tu ruang ma satua,
Sinur na pinahan gabe na niula.
Simbur magodang ma dakdanak
songon ulluson pura-pura.
Horas ma angka naung ma godang,
penggeng sahat rodi na saur matua.

Silinjuang

Asa lomak ma Silinjuang
Lomak so binaboan
Tu dia pe mangalangka pomparan ni natuatua on , di si ma dapot parsaulian.

Ompuompu

On ma raja ni duhutduhut di halak Batak, mangido tu Amanta Debata asa dilehon habisuhon dohot hapistaran tu angka pomparan ni natuatua on.

Gambiri simiakmiak

Mangido tu Amanta Debata asa dimiahi (dipasupasu) sude ulaon ni angka pomparan ni natuatua on.

Si Hilap

Asa manghilap sian na dao
Manjou sian na jonok,
Asa dapot sirongkap ni tondi ni angka pomparan na so marhasohotan dope.

Pira ni manuk

Mangidohon hagabeon jala torop ni pinompar.

FB_IMG_1551655078510

Hatorangan taringot tu sijagaron boi ma tajaha di blog ni amang Monang Naipospos:

https://tanobatak.wordpress.com/2009/02/19/sijagaron/

PhotoGrid_1568641494670Tangerang, ari Kamis 04 Juli 2019

Tabe mardongan olopolop.

St. Sampe Sitorus/br Sitanggang (A. Hitado Managam Sitorus).

%d bloggers like this: