Feeds:
Posts
Comments

Archive for May 28th, 2009

Maralaman ulaon di jolo ni parboru alai paranak do paradehon parjuhutna, di parboru ma tanda hasuhuton (ima ihur-ihur) ala nasida bolahan amak, parboru do manjangkon sude sipir ni tondi na ro. Di manogot nai andorang so borhat tu gareja ro ma suhut paranak tu bagas ni parboru mamboan sipanganon (namargoar) jala didok ma gaor ni i ulaon Marsibuha-buhai.

Mamboan jual ma mulak paranak jala diborhati dohot sian sipir ni tondi na ro. Di parboru malobi ni boras na ro songon singkat ni indahan pinaradena. Didok natuatua, tarsongon i do hasomalan ni adat najolo jala sumangap do ninna boru molo alap jual. Hea do hubege sada ina marbada dohot tungga ni dolina, didok; “tangkas do boruadi da dialap jual sian huta ni damang”, ninna.

Tar songon on ma pardalan ni ulaon Alap Jual.

Dung sahat di ari nabinuhul ni Paranak dohot Parboru di ari Pamasu-masuon Parbagason di Bagas Gareja songonon ma pardalan ni ulaon:
A. SIBUHABUHAI
PARANAK.
Sogot manogoti di parnangkok ni mata ni ari, borhat ma rombongan ni Paranak dohot Pangoli sian hutana laho mandapothon Parboru dihuta ni Parboru.
Siboanon ni Paranak ima Namargoar (Pinahan Lobu) ndang pola balga i, dibagasan Ampang doi dibahen, jala biasana mangisi Ampang i, Boru ni Suhut Paranak. On ma na digoari si Hunti Ampang jala sijalo Ulos si Hunti Ampang ma nasida.
Diboan Pangoli ma Bunga Tangan laos disi ma dipasada Bunga sipasahaton ni Boru Muli tu Anak Pangoli.
Dung sahat dihuta/dialaman ni Parboru i, dijolo ma Ampang i jala ihutma Pangoli dipudina, dungi Suhut Paranak diihuthon angka dongan sauduran
PARBORU.
Nunga mangarade parboru, dibagas dohot sude angka dngan tubuna dohot angka boruna. Sipatupaon nasida pe manjalo paranak ima dengke simudur-udur nunga diparade hian, songoni nang boras sipir ni tondi di bagas pinggan.

Andorang so ro dope paranak di upa nasida ma jolo boruna naneng pamulioni, jala namboruna mandongani i di kamar penganten huhut mangalehon angka poda.

Pelaksanaan ni Ulaon na Mar-Sibuhabuhai:
Manggora ma sahalak sian Parboru manggokkon Rombongan ni Paranak asa masuk nasida tubagas, jala hira-hira manang napiga langkanai sian pintu masuk migor ma ditaburhon sahalak ina sian parboru boras si pir ni tondi tu rombongan ni paranak 3 X huhut di dok Horas, Horas, Horas tong 3X songon panaburhon ni boras i.
Dijalo Boru Muli ma Anak Pangoli dipintu. Dilehon Pangoli ma bunga tangan i tu Boru Muli jala di semathon Boru Muli ma Bunga (kembang semat)  di jas ni Pangoli (nunga adong hian ingananna). Masuk ma Pangoli dohot Boru Muli dohot angka pandongani tu ruangan terpisah /kamar paima borhat tu Gareja.

Ia ampang nabinoan ni paranak dipeakhon ma jolo ditonga-tonga ni punguan i, jala dung sidung masijalangan, jongjong ma parboru dohot paranak masiadop-adopan.Di sigati parboru ma ampang na marisi  tudu-tudu ni sipanganon dohot sitonggi-tonggi, jala di pasahat ma tu parboruon nasida asa dipature, dungi di persilahkan ma paranak hundul. (Laos di pature boruni paranak ma tudutudu ni sipanganon i/di susun diatas talam(baki).

Parboru : Beha Raja ni Boru, mamereng tu tingki hita asa tapungka ma nian ulaonta
Paranak : Nauli Rajanami; huhut digora boruna asa diparade (di boan) tudu-tudu ni sipanganon i.

PARANAK:

Pasahat tudu-tudu ni sipanganon. Di hamu Rajanami, Hula-Hulanami, parjolo ma hita mandok mauliate tu Amanta Debata Pardenggan Basai ala asi dohot holong ni rohaNa dapot di hita nuaeng ari nauli ari nadenggan on di sangkap ni rohanta laho mangudurhon anakhonta tu jolo ni Debata di Bagas JoroNai asa laho manjalo pasu-pasu parbagason.
Siala ni sangkaptai Rajanami, dison ro do hami tu adopanmu Hula-Hulanami pasahathon tudu-tudu ni sipanganon Sibuha-buhai dohot pangidoannami tuadopan ni Debata Pardenggan Basai asa mambuhai parhorason panggabean ma on Rajanami dihita saluhutna tarlobi di anakhonta nanaeng mamungka parbagason sadarion. Tung songon on dope naboi tarpatupa hami Rajanami, las ma rohamuna manjalo. Botima.
Catatan : Dung pe dipasahat hula-hula Dengke simudur-uduri asa marsijalangan

PARBORU
Di hita napunguon Amanta Raja dohot Inanta Soripada Suhut Parboru: dison nunga tajalo tudu-tudu ni sipanganon sibuha-buhai sian Pamoruonta, ba tung dijolo ni Hasuhuton Bolon pe nuaeng tudu-tudu ni sipanganon on naung rap manjalo mahita disi. Botima da.
Huhut migor ro ma Boru ni Parboru mamboan Dengke sipasahaton nasida tu Paranak.

PARBORU Pasahat Dengke:
Di hamu Raja ni Borunami, nunga di pasahat hamu tu hami Hula-Hulamu tudu-tudu ni sipanganon sibuha-buhai, dison hupasahat hami ma tu hamu Dengke simudur-udur, Dengke sitio, Dengke Sahat, dohot pangidoan tu Tuhanta Pardenggan Basai asa mudur-udur ma antong parhorason panggabeani di hita tujoloanon, Tio ma nang parngoluonta dohot pancamotani, sai sahat ma angka nasininta ni rohanta tarlobi di anakhonta nanaeng manjalo pasu-pasu parbagason on. Songoni ma jolo hatanami.

Dungi udutan ma laho marsipanganon.
Martangiang sian Paranak. Dung Amen laos didok hata ni sipanganon.

Sitiktik marsigompa golang-golang pangarahutna

Otik so sadia na boi hupatupa hami parboruonmuna sai godangma pinasuna, marjomuk ma hita.
Dung sidung marsipanganon: dijou parboru ma penganten asa rap pungu martangiang laho borhat tu Gareja. Martangiang laho borhat: sian Parboru. Borhat tu Gareja, parjolo ma penganten haruar sian bagas, baru ma udur angka suhut- paraboru dohot paranak (kedua orang tua) diuduti naasing.

B. DI GAREJA:
Dung sidung Ulaon Pamasu-masuon di Gareja : mandok hata ma sian Paranak dohot Parboru:
mandok mauliate laos manggokkon na ro i, asa rap udur tu bagas parpestaan.

C. DI INGANAN PARPESTAAN

1. ULAON NI PROTOKOL
Dung sahat sude Rombongan: (Penganten, Suhut Paranak, Suhut Parboru) tu Bagas Parpestaan, migor ma mangarade parjongjongna be di Pintu Masuk tu Gedung i, asa tipak sude masuk molo dung ro gora sian Protokol.

Protokol Parboru: Dihamu Pamoruonnami, huparade hami di hamu inganan di sabola hambirang molo masuk hita tu bagasan gedungon, songoni ma boa-boanami tu hamu

Protokol Paranak: Mauliate ma Rajanami; laos ditariashon ma:
songoni ma dihita na mar-Dongan Tubu, Boru, Bere, Dongan Sahuta, Aleale, nunga dipasahat Hulahulanta di hita inganan: disabola hambirang dung masuk tu gedung on, masuk ma hita tabuat be ma ingananta..

Protokol Parboru: Dihamu Borunami; ida hamu ma jolo manang naung sude sahat Suhut Sihabolonan nadua dohot Penganten. Molo dung sahat nasida paboa hamuma……(dialusi Boru: dibahen Jari Jempol paboa naung rade)

Protokol:

  1. Di Amanta Raja dohot Inanta Soripada naung masuk tubagasan Gedung on, ala naeng masuk  ma rombongan ni Penganten, songon namanomu-nomu nasida, mangido hami gomos di haradeonmu asa rap jongjong ma hita.
  2. Di hamu parmusiknami, asa mangarade ma hamu mambahen musik panomunomuon.
  3. Di hamu rombongan ni Penganten: Masuk ma hamu
  4. Manungkun Boru nabertugas manang naung lengkap Hula-Hula dohot Tulang (Ok)
  5. Di jou ma Suhut Sihabolonan laho manjalo haroro ni Hulahula dohot Tulang
  6. Boru sijalo Siuk dohot si Parbue Pir (boras) nabinoan ni Hula-Hula, mangarade hian.
  7. Di hamu nahuparsangapi hami Raja ni Hula-Hula dohot Tulangnami: (didok Marga ni angka Hula-Hula dohot Tulang alai unang lupa mandok hata Raja i (…….margana)) sahali manjanghon ma hami di haroromuna, dijolo ma Hula-Hulanami Tulang ni Boru Muli ihut ma Tulang …… Hula-Hula namarhaha maranggi, Hiula-hula ni Anak Manjae dst..
  8. Musik : manjanghon hula-hula dohot Tulang.
  9. Manjalo haroro ni Hula-Hula: Dijolo Suhut Sihabolonan, Paidua, dst. sambil mundur sahat dijolo ni podium. migor ma jongjong suhut dibarisan parsiamun mangadophon hulahula dihambirangna ma angka suhut martinodohon mangihuthon tingkatanna be
    Mangarade ma Boru manjalo dengke dohot sipir ni tondi nabinoan ni hulahula

Protokol Parboru : Horas ma di hamu sude Hula-Hulanami, nunga huparade hami inganan di hamu disabola siamunnami, hundul ma hamu Rajanami. (Borunami: Patuduhon hamu inganan/hundulan ni sude hulahulanta)

Protokol Parboru : Didok tu Protokol Paranak  Amangboru ala naung tipak do sude parhundul ni hulahula dohot tulangnami, hupasahat hami ma partingkian on tu hamu, botima.

Protokol Paranak : Mauliate ma Rajanami;
(tata cara ni Paranak manggora huhut manjalo hulahula nasida dos do songon tata cara ni Parboru; alai parjongjong ni Suhut Paranak dihambirang ma asa ditingki na namanjalang hulahulai denggan ma mardalan mandapothon inganan di nasida naung pinarade ni Paranak.

2. MAMUNGKA ULAON UNJUK :
Protokol Parboru : Manungkun Paranak asa mamungka ulaon
Protokol Paranak : Manggora Suhut Sihabolonan laho pasahat tudu-tudu ni sipanganon
Protokol Parboru : Manggora Suhut Sihabolonan + Dongan Tubu manjalo tudu-tudu ni sipanganon.

3. PASAHAT TUDU-TUDU NI SIPANGANON
Hata ni Paranak (Protokol): Dihamu Raja ni Hulahulanami, parjolo ma hami mandok mauliate tu Tuhanta Pardenggan Basai namangalehon ari nauli ari las ni roha on di hita ima naung manjalo pasu-pasu parbagason anakhonta sadarion di bagas joro ni Tuhanta i; dison ro do hami tuadopanmu Hula-hulanami, pasahathon tudu-tudu ni sipanganon tu hamu, tudutudu ni sipanganon di las ni rohanta sadarion, jala hatana Rajanami dohononnami ma:
Godang sibutong-butong, otik sipir ni tondi, tung songon on pe sipanganon na boi hupatupa hami, tangiangnami Rajanami sai pamurnas ma on tu daging saudara tu bohi, horas ma hamu Hula-hulanami namanjalo horas ma nang hami Borumu napatupahon. Botima .
(ndang pola jolo masijalangan)

4. PASAHAT DENGKE SIMUDUR-UDUR
Hata ni Parboru
 (Protokol): Di hamu Raja ni Borunami: Nunga dipasahat hamu tu hami tudutudu ni sipanganon di ulaonta on, dison ro do hami pasahathon tu hamu Dengke Simudurudur, Dengke sitio, dengke sahat, dohot tangiangnami mangido tu Tuhanta Parasirohai, asa mudurudur ma antong parhorason panggabeani jaloonmu tujoloanon, dengke sitio ma on: sai tio ma nang angka hangoluan dohot pansamotani jala dengke sahat ma on sai sahat ma sude angka nasininta ni rohanta lehonon ni Tuhanta hombar tu lomo ni rohaNa. Las ma rohamu manjalo, botima. (baru ma masijalangan)

Protokol Parboru:  Dihita namardongan tubu, Boru, Bere, dongan sahuta, aleale tarlobi ma dihamu Raja ni Hulahulanami, dison nunga dipasahat Pamoruonta Tudu-tudu ni Sipanganon tu hita, molo tung di jolo ni hasuhuton pe hasahatanna naung rap manjalo ma hita disi. Botima

Protokol Paranak : Songoni ma dihita namardongan tubu, Boru, Bere, dongan sahuta, aleale dison nunga dipasahat Hula-hulanta Dengke Simudurudur, Dengke sitio, dengke sahat tu hita, molo tung di jolo ni hasuhuton pe hasahatanna naung rap manjalo ma hita disi. Botima.

Protokol Parboru : Amang boru: asa tapungka marsipanganon, ala hamu do napatupa sipanganon on laos hamu ma namamilang tangiang marsipanganon.

Protokol Paranak : Nauli Rajanami. Martangiang ma hita – Amen – didok ma hata sidumaduma mangan :di hamu hulahulanami dohot disude Amanta raja dohot Inanta soripada, sude hita napunguon, hata ni sipanganon dohononnami ma: sitiktik marsigompa golang-golang pangaruhutna, tung songoni pe sipanganoni natarpatupa hami, sai godang ma pinasuna, marjomuk ma hita.

Protokol Paranak : Rajanami, Hulahulanami naeng ro ma hami pasahathon sulangsulang natabo tu hamu rade ma hamu manjalo , jala hata ni sulangsulang Rajanami laos sian on ma dohononanmi: husulangi hami ma hamu Rajanami dohot sulangsulang natabo on, sulang-sulang pangidoan di hagabean ditubu ni Anak disorangni Boru ala naung hualap hami Borumu gabe Parumaennami, las ma rohamu manjalo, botima.

Parjolo do tu ina pangintubu pasahaton sulang-sulang ipe asa tu ama parsinuan, nang pe mangolu ompunga, ima apala ompung ni namuli. Hot do ingkon parjolo ina pangintubu manang ina panoroni pei dohot ama pangintubu agia pe ama pangkampi simatua doli i. Ndang jadi ngap-ngap roha ni (ina) pangintubu manjalo parjolo sulang-sulang i, nunga adat naung sinaktihon ni sijolo-jolo tubu i na gabe tungko siingoton jala tuhe sigaton sahat tu pagian ni ari.
Manulang suhut parboru sian dongan tubu paranak ma i, alai boi doi sian boruna. Dipillit do jolma na raja. Na maniop pinggan inganan ni sulang-sulang pe, dipillit jolma na hormat asa marhantus (khidmad) siulaon, ai bona ni siulaon do i, jala manghirim sahala hatuaon di anak dohot boru do i.  Di na marunjuk rap disulang do parboru dohot paranak, alai sian boru ni paranak ma dipillit gabe panulang tu paranak. Hot do boru na raja jala na hormat dipillit, ai so adong inganan ni jolma sijekjek di ulaon Batak.

Note: napasahat sulang-sulang natabo ingkon sian dongan sapanganon (sisolhot ni suhut paranak), jala sa boi-boi na unang ma nian sian boru na laho pasahat sulang-sulang  tu hula-hula i (pangitubu/parsinuan ni parumaen).

5. MARBAGI TUDU-TUDU NI SIPANGANON: PARJAMBARAN JUHUT

Protokol Parboru : Amangboru, ta uduti ma ulaonta, diangka nasosimpul dope marsipanganon denggan diuduti, mardomu tu tingki tauduti ma ulaonta.
Tangkas do dipasahat hamu tu hami tudutudu ni sipanganon on, namanungkun ma hami Amangboru taringot tu tudutudu ni sipanganon naung pinasahatmuna on, tarsongon dia ma partordingna, asa hatahon hamu ma amangboru.

Protokol Paranak: Horas ma jala gabe Rajanami; taringot tu tudutudu ni sipanganon naung
hupasahat hami tu hamu, ba songon dia ma pangatur ni Rajai. Sidapot solup ma hami, botima

Note: didok protokol paranak sidapot solup ma hami alana paranak do na ro tu huta ni parboru.

Protokol Parboru : Andorang so di seat raut parjolo ma di seat hata; Ala dison do huida hami Hula-Hulamu – haha parhundulnami, songoni nang dongan tubumu- berenami, dohot borumu- ibeberenami, dison pasahatonnami ma Parjambaran Taripar tu nasida : (dijahahon ma sesuai tu naung di sepakati tingki ulaon marhusip nagogo), hamu ma namangatur parjambarani tu nasida.
Note: mengenai parjambaran ingkon hataan jala hasil kesepakatanta do on tingki marhusip na gogo.

Protokol Paranak:. Songon naung hudok hami i do Rajanami, sidapot solup ma hami, songon dia ma na dipasahat raja i hami, las ma rohanami manjalo. .Mauliate ma
Dung dipasahat Parboru Jambar Taripar tu Paranak mangido tingki ma Paranak.

Protokol Paranak : Rajanami, mangido hami tu hamu, asa hupangke hami jolo tingkion laho mangido tumpak pangurupion sian angka namanghaholongi hami, beha Rajanami

Protokol Parboru :. Nauli Amangboru, ulahon hamu ma

Protokol Paranak: manjou  PAMARAI asa mandok hata patujolo ni na mangido pangurupion, tar songonon ma hata si dohonon ni pamarai:
Di hamu haha angginami, dongan sahuta, aleale, lumobi ma dihamu borunami dohot berenami, napangolihon Anak do hita sadarion: songon nidok ni umpama: sisolisoli uhum siadapari gogo, nunga rade hami di son laho manjalo tumpak, panungkolionmu di pangolion ni anakta on, ro ma hamu godang godang ma pasahat hamu.
Songoni ma di hamu nang horong ni “Tulangnami” songon nidok ni umpama ma dohonon nami: Dangka do dupang, Amak do rere, Amang do Tulang, Anak do ia Bere. Molo tung uli rohamu Rajanami naeng manumpahi di napangolihon Beremuna on hami, las ma rohanami manjalo. Mauliate ma hupasahat hami. (langsung dipangido Musik)

Catatan: Ingkon PAMARAI do sijalo tumpak (namanggora) alana PAMARAI ima Suhut Paranak, na manjalo Tumpak sian angka Sisolhotna, molo tumpak ringgit di pamasuk ma i tu Puro, molo tumpak dorbia dipamasuk ma tu Lobu. Ibana do melapor tu Suhut Sihabolonan taringot tu jumlah ni Ringgit dohot Dorbia sian Tumpak ni angka Sisolhot.

Jadi laos PAMARAI do annon na mangalehon kesempatan tu parumaen laho sahali manjomput amplop tu nasida, dungi pasahathon ni pamarai ma tumpak i tu inanta hasuhuton.

Ditingki namanjalo tumpak Paranak,  mardalan ma parbagi ni Parjambaran Juhut.

Protokol Parboru : Dihita namardongan tubu, Borunami, ro ma hamu tu son asa rap hita paturehon parjambaran on. (dos ma tahinta parjolo ma tapasahat jambar ni Hulahulanta) – dialusi dongan: tubu : (denggan ma i tutu)
Catatan: napasahathon jambar juhut tu Horong Hula-Hula naeng ma sian dongan tubu.

Jot-jot ni parrohahon di ulaon sai holan boru do dipatujolo. Hape sasintongna ianggo napasahat jambar ingkon namardongan tubu do.

6. PARBAGI NI PARJAMBARAN JUHUT
Protokol Parboru:
Jambar ni hula-hulanami : Parsanggulan Parsiamun ma jambarmu Rajanami
Jambar ni Tulangnami : Somba-Somba ma jambarmu Rajanami
Jambar ni Bona Tulang, Bona ni Ari, Tulang rorobot, Hulahula namarhaha maranggi sahat tu hulahula ni anak manjae : sude ma sombasomba napinonggolan.
– Soit na bolon di : hahadolinami
– Soit na bolon di : anggidolinami:
– Osang Parsiamun : jambar ni Boru dohot Berenami
– Soit : di Punguan
– Soit : jambar ni pariban Dongan Sahuta Ale-ale.
– Jambar di Tulang ni Hela.
– Pangula ni Huria.
Sian Ihur-Ihur: dipasahat ma jambar ni na sa-Tulang: ima Dongan Sabutuha:
Na sapanganan : suhut marhaha-maranggi na sapanganan, Ihur-Ihur na tinggal : jambar ni Suhut Sihabolonan

Note: ihur-ihur di parboru ala nasida do bolahan amak, ai sasintongna ise nadapot ihur-ihur ido suhut na bolahan amak.

Suang songoni ma nang pambagian ni parjambaron di paranak

Protokol Paranak:
Jambar ni hula-hulanami : Parsanggulan Parhambirang jambarmu Rajanami
Jambar ni Tulangnami : Somba-Somba ma jambarmu Rajanami
Jambar ni Bona Tulang, Bona ni Ari, Tulang rorobot, Hulahula namarhaha maranggi sahat tu hulahula ni anak manjae : sude ma sombasomba napinonggolan (naung somba-somba goar ni i)
– Soit na bolon di : hahadolinami
– Soit na bolon di : anggidolinami:
– Osang Parhambaring : jambar ni Boru dohot Berenami
– Soit : di Punguan (molo tung so soit pe dialap hata ma naung soit ma i)
– Soit : jambar ni pariban Dongan Sahuta Ale-ale.

Ulaon na mangihut nunga dos songon na somal, ima marhata sinamot dan seterusnya.

Catatan: nasomal di Jabotabek on marhata sinamot laos di mata ni ulaon ido. Molo “aslina” di hitaan, ulaon tersendiri do i.

Pinadomuni (dirangkum oleh) :

Sampe Sitorus, SE  (A. Hitado Managam Sitorus)

Medang Lestari B3/K11 08129052462

Referensi dan Daftar Pustaka :

  1. Partungkoan Tano Batak http://tanobatak.wordpress.com
  2. Simanjuntak Sitolu Sada Ina : http://simanjuntak.or.id
  3. St. DP Hutagalung (Op ni Salomo) http://purbatondangmargana.blogspot.com
  4. Jambar Hata, T.M Sihombing, CV Tulus Jaya
  5. Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
  6. Literatur lain dan angka panuturion ni angka natua-tua.

Read Full Post »

Angka on ma Ragam Ni Ulaon Pangolihon Anak/Pahutahon(pamuli) Boru na denggan diadopi parboru dohot paranak :

( Note: molo mangalua dang di adopi parboru i – jala cenderung tu na so di restui do i).

A. Mangembalhon Gajut :

Di dok ma i tu na di restui perkawinanna alai dang adong dope adat diulahon. Diborhati do i denggan sian sisolhot ni parboru jala dialap denggan dohot sisolhot ni paranak. Diupa paranak ma i muse dijabuna. Mebat ma muse nasida tu bagas ni parboru, jala boi ma mangihuthon paradaton, alai tong dope marutang adat ibana.

B. Manurun :

Dang sai sude pangoli namora jala dang tuk patupahon adat nabalga tu na naeng simatuana. Ala lomo do roha ni parboru di nanaeng helana ujungna dijabuna ma dibaen adat. Gok do adat i alai holan tutur nasumolhot ma dijou tarmasuk tulang. Diulosi do i denggan jala adong do hata ni sinamot. Dang maralaman ulaon i. Diboan nasida do jual tu hutana jala horong alap jual do goarna.

C. Alap jual (Ulaon di parboru):

Maralaman ulaon di jolo ni parboru alai paranak do paradehon parjuhutna, di parboru ma tanda hasuhuton (ima ihur-ihur) ala nasida bolahan amak, parboru do manjangkon sude sipir ni tondi na ro.  (lebih detil baca tulisan Pangantusion Ulaon Alap Jual)

D. Taruhon jual (ulaon di paranak)

Somalna ninna najolo naung dihuta ni paranak do boruna ala naung mangalua manang mangembalhon gajut. Dibahen paranak ma ulaon adatna jala ro ma uduran ni parboru dohot sude sisolhotna tu huta ni Paranak mamboan sipirni tondi dohot dengke dibagas jual. Mardalan ma sisongon i tu angka na mangalua dohot na mangembalhon gajut.

Molo tar dao do huta ni Parboru tu huta ni Paranak, paradeon ni Paranak ma Jabu parbornginan di nasida. Molo adong do Jabu ni Dongan Sabutuha ni Parboru di huta i, tarjumolo doi dihubungi Parboru asa adong inganan haborhatan nasida di huta i.

Ia adat pamuli boru Taruhon Jual manang didok doi RAMBU PINUDUN, namarlapatan doi sude: inganan, sipanganon, dohot sude haporluan ni pesta unjuk gabe tanggung jawab ni paranak. Ia parboru holan mamboan Dengke Simudur-udur dohot Ulos Herbang sipasahaton tu paranak. Paranak ma paradehon sude natupa di ulaon i jala sasintong na di nasida ma tanda hasuhuton (ima ihur-ihur).

Dialap manang ditaruhon jual, sipatupaon ni paranak do sibuhabuhai, alai molo naung hea muli do boru na marunjuk i, ndang sipatupaon be sibuhabuhai, ai tung na maiturun pe boru i, gabe sirang nunga naung dijalo huta ihur-ihur siboaboai. Molo adong pe na masa ditingki saonari on na so patupa sibuhabuhai ala na so haru diantusi be lapatan ni ulaon UNJUK (pataridahon/paunjukhon) (lebih detil baca tulisan Pangantusion Ulaon Taruhon Jual)

Pinadomuni (dirangkum oleh) :

Sampe Sitorus, SE  (A. Hitado Managam Sitorus)

Medang Lestari B3/K11 08129052462

Referensi dan Daftar Pustaka :

  1. Partungkoan Tano Batak http://tanobatak.wordpress.com
  2. Simanjuntak Sitolu Sada Ina : http://simanjuntak.or.id
  3. St. DP Hutagalung (Op ni Salomo) http://purbatondangmargana.blogspot.com
  4. Jambar Hata, T.M Sihombing, CV Tulus Jaya
  5. Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
  6. Angka panuturion ni angka natua-tua.

Read Full Post »

Juhut, ima na ginoaran angkup ni sipanganon. Alai holan di pesta unjuk do digoari juhut manang parjuhut, ai molo ulaon saur matua dohot sarimatua digoari do i ola manang boan. Pesta parunjuhon digoari do i martinasak. Naro do i sian hata tasak, lapatanna tangkas di haboion. Dua bagian do parunjuhon, sabagian dialap jual sabagian ditaruhon jual.

Dialap jual martinasak, dihuta ni parboru ma i, ditaruhon jual martinasak di huta ni paranak ma i. Di pesta parujuhon di angka na tuk, dibuat paranak ma sitingko tanduk (horbo) gabe parjuhut dohot sada lomuk (babi). Sulang-sulang parborupe dibuat ma sisemet imbulu na gabe singkat ni dengkena. Sude nasa na margoar ni sitingko tanduk di pasahat paranak ma i tu parboru gabe jambarna dohot jambar ni tinogihonna. Sude nasa na margoar ni sesemet imbulu, dipasahat parboru ma i tu paranak gabe jambarna dohot naniontangna. Ima, ginoaranna adat na marpanggohi.

Molo laos sian parjuhut i do ulu ni dengke ni parboru, rap manggarar ma paranak dohot parboru di parjuhut i. Dua partolu ma gararon ni paranak, jala sapartolu ma gararon ni parboru. Ianggo lomuk sulangsulang ampe tu paranak do i.

Note: Nuaeng on nunga masa “sitombol” rambu pinudun jadi nunga “all in” sinamot i jadi dang adong be “rap manggarar” i.

Goarni PinahanMangihuthon hatorangan ni Guru Pitara Siahaan, dung pe tubu Raja Bond Vreeniging, masa ma hata; “Ise Mangorai”, gabe masiboan nabinotona ma olat ni i, jala jambar ungkapan pe ndang tu siunghap hata be dipasahat. Gabe hurang masiantusan be aha tujuan ni siulaon, margundongpong ma na mangantusi ruhut.Manambol sitingko tanduk manang sisemet imbulu diorai angka raja do i najolo, molo sohea dope ibana manambol lomuk (siparmiak-miak). Ndada ala ni kasta i manang tingkatan. Na dihabiari angka raja-raja do, atik beha so tasak dope hasuhuton mangulahonsa unang sega adat i sosa nang uhum. Haru nangkok tu jabu ninna jolo degehonon do tangga parjolo paduahon dohot satorusna i pe asa masuk tu bagas.

PASAHAT SULANG-SULANG (Nuaeng on tarlumobi di Jakarta di dok ma on pasahat sulang-sulang na tabo)

Di angka tingki naparjolo i molo martogi (manggonghon) parboru tu pesta parunjuhon ni boruna songon on do hatana. Di ari adui mahita manjalo sulang-sulang ni borunta rap marnatampak ma hita manjalosa. Ala sulang-sulang bona ni siulaon do i di parunjuhan, hasangapon ni adat batak do i jala habolonon ni uhum na, jala hasurungan laho umpungka partuturan.

Nuaeng on ndang apala arga be idaon pasahat sulang-sulang ditingki parunjuhon, molo tung adong pe hata begeon mandok “sulang-sulang”, digorahon nama di tingki namarbagi lompan.

Molo di Jakarta pasahat sulang-sulang na tabo ma on di goari ima na borhat paidua ni hasuhutuhon paranak (nasida na marhaha maranggi) maboan lompan na tabo ima lompan di piring jala di sendokhi tu piring panganan ni hula-hula.

Nunga disi lompanna laos disi ma sulang-sulangna. Molo pinaihut-ihut hata i nunga gabe sude tutur na ro i dohot painondur na hona sulang, ai dohot do nasida manjalo lompan.

Hata najempek: mambahen marsuhar aek tu julu. Nang najolo, ndang apala sai sude tinogi ni parboru disulang alai dipasahat ma juhut sulang-sulang panggonopi (satonga ampang) tu tinogi ni parboru.

PATURE SULANG-SULANG

Pature sipanganon sulang-sulang, ndang sumbarang parhobas palolo i. Dipillit do napantas jala natobok marroha, asa mararur jinamana hasomalan ni namaganhon maralatan sorimatandang. Di tingki manganhon sulang-sulang, panulang pe ingkon dipillit do halak napantas jala naung tang diruhut, ai na pailahon suhut do panulang i molo so suman panulangna, gabe hona toru parhobas dohot huta.

Boa do nuaeng on di Jakarta ? Pinarrohahon na pature sulang-sulang ima par catering.

Napasathon sulang-sulang ima paidua ni hasuhuton paranak manang nasida na marhaha maranggi.

MANAKSANG SULANG-SULANG

Manaksang sulang-sulang, tongka bolon do masuk holi-holi, unang amporotan namaganhon. Sangkalan pe ingkon dipillit do hau, ndang dipangke hau namura malamot, ai gabe sampur dohot saksang. Remet situtu do i disaksang, ima ginoaranna : saksang sibahue, boi bonduton nangpe soapala lamot hinilhil. Molo dibursikhon na manganhon sulang-sulang i alatan bursik-bursik tu raja ni huta do. Ido umbahen dipillit natua-tua na pantas, na tang jala tobok marroha, na manghobasi (marmasak). Molo pasiakhu manang paansimhu pe sulang-sulang i tong do na paurak raja i.

Ndang pola sibahenon namargoar ni lomuk sulang-sulang alai, sai dipasinok do utok-utok ondolan pusu-pusu, dohot hodong-hodong ni ihur-ihur. Limpa dohot do i di saksang, jala ndang masuk bagian butuha agiape butuha raja. Ditingki martuahon indahan nalas parboru dohot paranak, pintor dipasahat do tudu-tudu ni sulang-sulang, jolo dipaandar nasida do i, asa diboto rumangna. Tu parboru dibahen ma di ginjang ni saksang ondolan dohot sada pia. Tu paranak di ginjang ni saksang dibahen ma pusu-pusu dohot sada pia, jala pintor didai parboru dohot paranak do i, ala i do bona ni siulaon. Adat do i dohot uhum. Ima nuaeng on toropan diagohon sian tonga-tonga ni adat parunjuhon.

Boa do nuaeng on di Jakarta ? Pinarrohahon na manaksang sulang-sulang ima par catering.

RUHUT MANULANG

Parjolo do tu ina pangintubu pasahaton sulang-sulang ipe asa tu ama parsinuan, nang pe mangolu ompunga, ima apala ompung ni namuli. Hot do ingkon parjolo ina pangintubu manang ina panoroni pei dohot ama pangintubu agia pe ama pangkampi simatua doli i. Ndang jadi ngap-ngap roha ni (ina) pangintubu manjalo parjolo sulang-sulang i, nunga adat naung sinaktihon ni sijolo-jolo tubu i na gabe tungko siingoton jala tuhe sigaton sahat tu pagian ni ari. Manulang suhut parboru sian dongan tubu paranak ma i, alai boi doi sian boruna.

Dipillit do jolma na raja. Na maniop pinggan inganan ni sulang-sulang pe, dipillit jolma na hormat asa marhantus (khidmad) siulaon, ai bona ni siulaon do i, jala manghirim sahala hatuaon di anak dohot boru do i.

Di na marunjuk rap disulang do parboru dohot paranak, alai sian boru ni paranak ma dipillit gabe panulang tu paranak. Hot do boru na raja jala na hormat dipillit, ai so adong inganan ni jolma sijekjek di ulaon Batak.

Jot-jot do sulang-sulang, ndang boi dipangan na sinulang, ala so diboto panulang ruhutna, jala nunga jot-jot panulang diasupi na sinulang, ala margulu-gulu simangkudap ni na sinulang i dibahen, gabe manghorhon guntur siulaon uju pasahat sulang-sulang. Porlu ingoton; tiniop ma juhut sulang-sulang i dohot dua tangan, niantan ma sir-sir siat tu simangkudap ni sisulangon, dung i pinatoho ma jari-jari naualu tu simangkudap ni sisulangon. Ina ni tangan naduanai ma mangonjar juhut sulang-sulang i pamasukhon tu simangkudap ni na sinulang, gabe ndang margulu be osang manang hurum ni na sinulang asal ma marrumanghon sendok binahen jari-jari naualu i.

Molo manulang parboru huhutma didok: Martua ma husulang nantulangnami on, tumpak ma tondina jala tumpak nang sahalana, sai gabe ma boru nasida i tumpahon ni tondina jala tumpahon ni sahalana pasauton ni Ompunta Namartua Debata. (Ala naung kristen hita gabe tadokma Amanta Debata).

Binuat ma muse juhut i nasa godang ni naparjolo jala ni udutan nidok: Hupatangkas hupaduahalihami, asa tangkas gabe jala tangkas horas boru nasida i. Binuat muse ma juhut i hot nasa godang ni naparjolo huhut nidok; pinatangkas pinatolu hali, asa tung tangkas panggabean i dohot pardinginan i di boru ni nasida dohot di hami saluhutna.

Sarupa do pambahenanna dohot tu simatua doli, holan sigontion hata nantulang gabe hata tulang, songon i nang tu ompungna gontion hata boru gabe pahompu, tu tulangna gontion hata boru gabe hata ibere. Ganup sijalo todoan hot do tolu hali sulangon. Angka suhu ni partubu ni parboru sisulangon do nasida asa nunga sisoli-soli ni uhum i. Ala sisada boru nasida alai ndada pola ingkon tolu hali, tuk manang holan sahali, huhut ma nidok: martua ma husulang hami nantulang nami/tulang nami on tumpak ma tondina tumpak ma sahalana sai gabe jala madingin boru nasida i. Dung ris marsuhu suhu, dijojori ma huhut didok; nion sulang-sulang tu hamu.

Manjalo adat Raja Baso (upa panulang) do na manulang parboru. Dos do balgana dohot olop-olop huta jala polin do i holan jambar ni raja panulang dohot raja panampin sulang-sulang, ndang sibagion ni huta i manang horja.

Boa do nuaeng on di Jakarta ? Pinarrohahon sulang-sulang natabo di pasahat tu horong ni parboru suang songoni nang Hula-hula nang Tulang jala jala hata-hata na pe holang sulang-sulang na tabo Tulang laos di sendohi ma tu pring panganan ni na sinulang i. Justru sipata suhut parboru (na hundul di panggung) dang adong panulang  na loho tusi hape tu nasida do sasintongna na umporlu (ingkon jolo tunasida do baru pe tui haha-anggina).

Hot do tolu hali paranak sulangon jala songon ruhut na di ginjang i do pambahenna.

Asing do  ianggo hatana jala boru tubu ma na pasahat sulang-sulang tu paranak , songon on do pandohanna : Martua ma husulang dainangon tumpak ma tondina tumpak ma sahalana sai tu gabena ma hami angka iananghonna on tumpahon ni tondina dohot tumpahon ni sahalana. Pinatangkas pinadua hali asa tangkas hami gabe jala tangkas horas. Pinatangkas pinatoluhali asa tung tangkas panggabean pandinginan i di hami saluhutna anakhonna. Holan paranak dohot ompung ni na marunjuk do sisulangon, sidung i panjornihononhon nama tu dongan tubu dohot tu hulahula ni paranak.

Ndang jadi sarita i, ai na pasahat sulang-sulang do nasida saluhutna tu parboru. Unang hapispisan, pagar do umbahen disulang paranak dohot ompung na, jala ndang manjalo adat raja baso disi na manulang paranak, ai manangkas ianakhonna do na manulang. Adat nasomal do i.

Jadi molo taparrohahon nuaeng on nunga godang pergeseran ni adat i.

Taparate-atehon jala jujur ma ta akkui nuaeng on pasahat sulang-sulang na tabo di pesta unjuk tarlumobi di Jakarta on holan seremonial nama i jala ra dang taboto makna (filosofi) na. Anggiat ma marhite tulisan na pinadomu-domu on lam hantus parbinotoannta. Setidaknya kita tahu makna (filosofi) dari pasahat sulang-sulang natabo di tingki pesta unjuk.

Pinadomuni (dirangkum oleh) :

Sampe Sitorus, SE  (A. Hitado Managam Sitorus)

Medang Lestari B3/K11 08129052462

Referensi dan Daftar Pustaka :

  1. Partungkoan Tano Batak http://tanobatak.wordpress.com
  2. Simanjuntak Sitolu Sada Ina : http://simanjuntak.or.id
  3. St. DP Hutagalung (Op ni Salomo) http://purbatondangmargana.blogspot.com
  4. Jambar Hata, T.M Sihombing, CV Tulus Jaya
  5. Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
  6. 6. Literatur lain dan angka panuturion nu angka natua-tua.

Read Full Post »

%d bloggers like this: