Feeds:
Posts
Comments

Archive for June 14th, 2009

Aha do si boanonta molo mangadapi ontangan (gonghon dohot joujou) tu sada ulaon ? Na parjolo ingkon tangkas botoonta aha do haroronta (sebagai apa kita datang).

Dison pinaandar ragam ni angka ulaon:

1. Ulaon Las Ni Roha Di Jabu (Pasahat Ulos Mula Gabe, Mamoholi/Tardidi,Malua Sian Panghanghungi/Lepas Sidi).

Pasahat Ulos Mula Gabe

Hulahula tangkas (Parboru) mamboan : Parbue Gabe (tandok berisi beras), Dengke Sitio-tio/Simudur-udur/Sahat, Ulos Bintang Maratur.

Jala holan Hulahula tangkas (parboru) do napasahat ulos (uduranna dang pasahat ulos). Siboanon ni uduruan ni Parboru : Parbue Gabe Parbue Pir (tandok berisi beras).

Molo pihak paranak do hita ndang pola adong siboanonta ai namanjalo haroro ni Hula-hulado hita.

Mamoholi/Tardidi

Molo holan mamoholi do ndang adong ulaon tardidi somalna horong ni Parboru mamboan Parbue Gabe (tandok berisi beras) dohot manuk jambe (ayam jantan) na mangolu laos ima di lompa. Nasomal nuaeng on molo ulos parompa dipasahat tingki di ulaon tardidi.

Di ulaon tardidi, Hulahula tangkas (parboru) mamboan : Parbue Gabe (tandok berisi beras), Dengke Sitio-tio/Simudur-udur/Sahat,Ulos Mangiring. Jala holan Hulahula tangkas (parboru) do napasahat ulos (uduranna dang pasahat ulos). Siboanon ni uduruan ni Parboru (horong ni tulang ni na  tardidi): Parbue Gabe (tandok berisi beras), molo uli rohanta tapasahat ma singkat ni ulosta hepeng songon pasibaju ni berenta na tardidi i. Horong pariban ni natoras ni na tardidi i mamboan pasibadak ni na tardidi i.

Molo pihak paranak do hita siboanonta: Parbue Gabe, horong ni boru pasahat pasibadak ni na tardidi i. Dongan sahuta mamboan Parbue Gabe manang pasibadak ni na tardidi i.

_20180912_224341

Malua sian panghanghungi (lepas sidi)

Hulahula tangkas (parboru/tulang ni na lepas sidi) mamboan : Parbue Gabe (tandok berisi beras), Dengke Sitio-tio/Simudur-udur/Sahat, Ulos Sadum (lambang kecerian/suka cita). Siboanon ni uduruan ni Parboru (horong ni tulang ni na lepas sidi) : Parbue Gabe (tandok berisi beras), molo uli rohanta tapasahat ma singkat ni ulosta hepeng songon si palas roha ni berenta na lepas sidi i. Horong pariban ni natoras ni na tardidi i mamboan si palas roha ni na lepas sidi i (jala tu na lepas sidi ido i di tabehon). Dongan sahuta mamboan si palas roha ni lepas sidi i.

Molo horong ni parianakhon (dongan samarga ni suhut) do hita, siboanonta: Parbue Gabe, horong ni boru pasahat si palas roha nina lepas sidi i.

2. Ulaon Las Ni Roha Na Asing (HUT, Jubielum Pernikahan)

Somalna sai diboan Hulahula dohot Tulang do dengke. Boru sai tar dijalangkon do hepeng, dung i sude angka na asing mamboan boras manang hepeng.

PhotoGrid_1566908997101

3. Ulaon Manuruk / Mangompoi Jabu.

Hulahula tangkas (parboru) mamboan : Parbue Gabe (tandok berisi beras), Dengke Sitio-tio/Simudur-udur/Sahat, Ulos Sadum (lambang kecerian/suka cita). Tulang tangkas ni par jabu mamboan : Parbue Gabe (tandok berisi beras), Dengke Sitio-tio/Simudur-udur/Sahat, Ulos Sadum (lambang kecerian/suka cita). Jala holan Hulahula (parboru)  dohot Tulang tangkas do napasahat ulos (uduranna dang pasahat ulos).

Siboanon ni uduruan ni Parboru dohot Tulang  (horong ni hulahula dohot tulang ni na mamasuhi jabu) : Parbue Gabe (tandok berisi beras). Horong Pariban, Dongan Sabutuha, Dongan Sahuta dohot Ale-ale mamboan Parbue Gabe. Horong ni boru maboan hepeng (sampetua) manang pinahan lobu/lombu/horbo.

4. Ulaon Pamuli Boru.

Sude na niontang ni hasuhuton parboru (termasuk horong ni Hulahula & Tulang) mamboan Parbue Gabe (tandok berisi beras). Parboru namarhaha-maranggi (solhot) mamboan dengke siuk. Ido asa somal tabege di gorahon di ulaon unjuk : hujalo hami do dengke siuk sian kel. ……../br ………. (amangudana) dll. Alai di tano parserahan on ndang dengke be dipasahat, di tonggo saripe ma tangkas dihatai i (singkat ni dengke marhite hepeng ma dipapungu).

Taringot tu ulos holan hasuhuton namarhaha maranggi ma na pasahat ulos, molo olo a uduran dohot pariban di papungu ma hepeng songon singkat ni ulos jala dipasahat ma i tu penganten tingki mangulosi, ingkon denggan ma di hatahon tu penganten asa nasida ma manuhor ulos silomo ni rohana (dalam pengertian manfaatkanlah uang tersebut untuk keperluan berumah tangga, hal ini lebih baik sehingga tidak terkesan obral ulos dan acara bertele-tele).

Hulahula tangkas (tulang ni na muli), Horong Horong Hula-hula & Tulang mamboan : Parbue Gabe (tandok berisi beras), Dengke, Ulos Ragi Hotang (lambang pengikat kasih). Ido asa somal tabege di gorahon di ulaon unjuk : hujalo hami do dengke sahat sian Hula-hula nami (di dok margana)  ………………  sian ……………. dst.

Holan angka Hulahula tangkas dohot Tulang tangkas ma na pasahat ulos. Sude uduran ni Hulahula (tulang ni na muli), horong ni Tulang  dohot sude horong ni Hulahula, di papungu ma hepeng songon singkat ni ulos jala di pasahat ma i tu penganten tingki mangulosi, jala denggan ma di hatahon i tu penganten asa nasida ma manuhor ulos silomo ni roha na (dalam pengertian manfaatkanlah uang tersebut untuk keperluan berumah tangga, hal ini lebih baik sehingga tidak terkesan obral ulos dan acara bertele-tele).

Demikian halnya dengan punguan-punguan termasuk dongan sahuta cukuplah hanya ulos yang sesuai dengan AD/ART punguan, lainnya di papungu ma hepeng songon singkat ni ulos jala di pasahat ma i tu penganten tingki mangulosi, jala denggan ma di hatahon i tu penganten asa nasida ma manuhor ulos silomo ni rohana.

Tung na so jadi singkat ni ulos dipasahat tu suhut Parboru, ingkon tu penganten do, ai tarajumi namangulosi penganten do hita, ndang na manumpahi Parboru.

Di tano parserahan on, jotjot pinarrohahon gabe tu Parboru dipasahat, sipareahan ma i tu joloanon. Unang gabe taihuthon na so tingkos, unang tadok eme namasak digagat ursa, ia i namasa i ma taula. Sotung amporotan ursa  i laos mate, sotung sotung taihuthon na sala gabe sega adat i laos diihuthon sundut naumposo.

5. Ulaon Pangolihon Anak.

Hulahula tangkas (tulang ni namangoli), horong ni Tulang dohot horong Hulahula & Tulang mamboan : Parbue Gabe (tandok berisi beras), Dengke, Ulos Ragi Hotang (lambang pengikat kasih). Ido asa somal tabege di gorahon di ulaon unjuk : hujalo hami do dengke sahat sian Hulahula nami (di dok margana)  ………………  sian ……………. dst.

Holan angka Hulahula tangkas dohot Tulang tangkas ma  na pasahat ulos. Sude uduran ni Hulahula (tulang ni na mangoli), horong ni  Tulang  dohot horong Hulahula di papungu ma hepeng songon singkat ni ulos jala di pasahat ma i tu penganten tingki mangulosi, jala denggan ma di hatahon i tu penganten asa nasida ma manuhor ulos silomo ni rohana (dalam pengertian mamfaatkanlah uang tersebut untuk keperluan berumah tangga, hal ini lebih baik sehingga tidak terkesan obral ulos dan acara bertele-tele). Jala asa sesuai tu hata ni sijolo-jolo tubu ” amak do rere anak do bere”, dang sala molo tung manumpakhi pe angka horong ni Tulang dohot Hulahula.

Dongan Tubu, Boru /Bere , Dongan Sahuta, Ale-ale pasahat tumpak di alaman kecuali ”sapanganan” (na marhaha maranggi dohot boru na solhot ba martumpak di jabu ma nian tingki manjanghon parumaen di jabu dung mulak sian parpestaan/gedung).

Di Ulaon Pasahat Sulang-sulang pahompu(mangadati nunga adong ianakhonna) Batu ni Sulang (mangadati dang adong dope ianakhonna),  tar dos do boan boan dohot tingki pamuli boru / pangolihon anak. (tinggal kita datang dari pihak mana).

6. Parmonding ni  Natua-tua (Sarimatua/Saurmatua/Maulibulung).

Hulahula, Tulang dohot horongni Hulahula & Tulang mamboan : Parbue Gabe (tandok berisi beras), dohot ulos sesuai hasil parrapoton (tonggo raja)

Dongan Sabutuha, Dongan Sahuta dohot Ale-ale mamboan boras manang hepeng. Boru/Bere mamboan hepeng.

7. Pesta Manambakhon Ompu.

Hulahula, Tulang dohot horong ni Hulahula & Tulang mamboan : eme (tandok berisi padi), dohot Ulos (sesuai hasil parrapoton /tonggo raja).

Boru mamboan hepeng manang pinahan (lombu/horbo). Dongan Sabutuha, Dongan Sahuta dohot Ale-ale mamboan boras manang hepeng.

Pinadomuni (dirangkum oleh) :

Sampe Sitorus, SE  (A. Hitado Managam Sitorus)
Medang Lestari B3/K11  08129052462

  Referensi & Daftar Pustaka :

  1. Jambar Hata – Dongan Tu Ulaon Adat, T.M Sihombing, CV Tulus Jaya
  2. Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
  3. Garis Besar Ruhur-Ruhut Paradaton Sitorus, Buku Parsadaan Raja Sitorus Dohot Boruna (PARSIBONA) JABOTABED
  4. Literatur lain dohot panuturion ni natua-tua

Read Full Post »

%d bloggers like this: