Feeds:
Posts
Comments

Archive for December, 2016

Di grup Facebook Partungkoan, adong sunghun sunghun sian dongan sapartungkoan amang Ruhut Hartono Sinaga :

Horas amang… Martukkar pikkiran ake…. Dia do bedana Pamakkean Ulos di Siamun dohot Dihambirang mauliate.

https://www.facebook.com/groups/1683519571867516/

Hombar tu sunghun sunghun i di son pinaandar ma pangantusionhu marhite naniadopan jala dituturi natuatua :

St. Sampe Sitorus /br Sitanggang (A. Hitado Managam Sitorus)

St. Sampe Sitorus /br Sitanggang (A. Hitado Managam Sitorus)

Disada tingki hea ma au ro mangadopi gonghon ulaon Pesta Unjuk, haroronghu aleale ni paranak. Huhasomalhon do manang tudia au laho ingkon do tamba parbinotoan.

Topet hatiha i andorang so masuk tu gedung huida sian suhut parboru manghadang ulos diabarana parhambirang. Ala huida sahalak ama natuatua jonok tu ingananhu jongjong antar hupagogo soaranghu mandok: “Ai songon na so somal do niida hasuhuton di Pesta Unjuk manghadang ulos dihambirang” ninghu. Pintor mardalan natuatua i mandapothon amanta namanghadang ulos dihambirang i laos dipadenggan natuatua i gabe disiamun ulos i. Ndung i didapothon au jala didok: mauliate amang, ai marga aha hamu tahe ? Ninna. Hualusi Sitorus amang.
Didok natuatua i, poso dope hamu alai tung tangkas do diparrohahon hamu angka ruhut-ruhut paradaton i ninna.
Hudok santabi amang au pe parsiajar do jala ala so somal do huida asa pola hudok songon i jala huida pardompahan ni amang tongam jala pos rohanghu na tuturan ni amang hami angka sundut naumposo. Mengkel amang i huhut dipatorang ma songon on:
Ia ulos somalna dihadang di abara parsiamun. Molo pola dihadang di abara parhambirang napatuduhon na tung dokdok do parungkilan/sitaonon ni namanghadang ulos i siala namasa niadopanna. Isarana molo tilahaon manang mate purpur rodi mate punu, ndang sala molo dihambirang dihadang ulosna. Sandok diulaon habot ni roha na tung mansai dokdok do masa manghadang ulos dihambirang, ninna.
Sian panuturion ni natuatua i gabe tamba parbinotoanhu.

Nian somal do ra tabege jala taparrohahon halak mandok asa di abara parsiamun ulos dihadang, alai ndang hea dope napatoranghon boasa songon i.

Laos ima nahupaandar di partungkoan on. Alani i molo tabereng halak manghadang ulos di abarana parhambirang hape ndang ulaon habot ni roha nadokdok, denggan ma tapaingot asa dihadang ulosna i diabarana parsiamun.

Ambal ni hata molo naeng marulaon hamu, unang lupa manuhor tigatiganami on ate.

Sedulur Fresh Juice

Sedulur Fresh Juice (aneka jus buah segar tanpa bahan pengawet)

Tabe mardongan olop-olop

St. Sampe Sitorus/br Sitanggang (A.Hitado Managam Sitorus).

Read Full Post »

Paniaran, isarana Paniaran ni Sitorus, mandok nialap ni marga Sitorus. Boasa didok paniaran?

Paniaran = isteri, wanita yang melahirkan anak bagi marga tersebut. Asal kata “siar” yang artinya masuk, hinggap/berdiam di. Sehingga paniaran berarti wanita yang melahirkan anak bagi marga tersebut dan berdiam di marga tersebut.

Ninna najolo didok Paniaran molo nunga tubu anak(baoa) sian bortianna. Laos domu tusi na boi mandohoti Tortor ni Paniaran holan angka inanta ni marga hasuhuton naung marindang anak(baoa) do. Molo holan boru dope ianakhonna ndang talup dope i dohot Manortor Paniaran, panondur(penonton) dope nasida.

Najolo molo holan boru do ianakhonna masa do disiranghon, dipaulak. Alai molo nunga manubuhon anak ndang masa maniranghon (tidak ada alasan menceraikan), jala “sah” ma inanta i gabe paniaran (masuk kelompok istri marga tersebut).
Ido asa adong hata molo ndang tangkas dope ditanda isara pajumpa diluat nadao, ai ise tahe nasida ? Paniaranta do i nialap ni amani adui.

Napinaadar diginjang i ma pangantusion najolo, molo sinuaeng on ala nunga ta jalo barita nauli jala tangkas tajalo holong na sian TUHAN  marhite AnakNa Jesus Kristus, margogo ma hita mangulahon holong, laos holong i ma mangarahut jala manghophop saluhutna. Tarajumi ma sandok dongan saripenta nunga paniaranta i (begitu kita dipersatukan dalam ikatan pernikahan kudus, maka istri tersebut sah menjadi paniaran kita).

Tabe mardongan olop olop.

St. Sampe Sitorus/br Sitanggang (A.Hitado Managam Sitorus)

Read Full Post »

Molo marujung ngolu sahalak natuatua, somal dipatupa do Sijagaron. Sian angka raja ni duhut duhut i boi ma tarida hagabeon ni natuatua namarujung ngolu i.

Molo adong disi ranting dohot bulung ni hariara rap dohot baringin, botoonta ma naung marpahompu sian anak dohot marpahompu sian boru natuatua namarujung ngolu i. Alai molo holan hariara dope na tarida di sijagaron i, marlapatan ma i holan marpahompu sian anak dope, baliksa molo holan baringin do marlapatan ma i holan marpahompu sian boru dope namonding i.

Taringot tu sijagaron, nunga apala tangkas digurathon amanta Monang Naipospos diblog nasida :  https://tanobatak.wordpress.com/2009/02/19/sijagaron/

Asa tangkas taboto imbar ni Hariara maradophon Baringin, di son pinaandar gombarna. Tung mansai maol do laho mandapot gombar ni Hariara on, pola do pinangido pangurupion sian angka sisolhot di bona pasogit alai ndang na marna dapot. Ndung pe ni pangido pangurupion sian lae amang Pdt. Rickson Liranto Nainggolan na manghobasi di huria HKBP Ressort Ambarita, ipe asa adong gombar on. Ipe loja do lae i laho mangalului alana ndang piga hariara di Samosir. Mauliate ma diharadeon nasida.

15203385_1206031449451495_7934305674386933543_n

Bona ni hariara, gombar on bona ni hariara di Ambarita na digombar lae amang Pdt. Rickson Liranto Nainggolan hombar tu pangidoanhu.

15171284_1206031799451460_4282244753368009490_n

On ma tangkas na bulung ni hariara

15134735_1206031882784785_6326282582803276882_n

Adong do pigapiga umpasa na pinungka ni ompunta sijolojolo tubu taringot tu hagabeon marharoroan sian Hariarara.

Hariara bonana,hariara rantingna,rugun bulungna.
Gabe ma hahana, gabe anggina torop dohot boruna.

 

Asa hariara ma bonana, hariara nang bulungna.
Gabe jala horas hula-hulana, songoni nang boruna

 

Songoni do tong adong do pigapiga umpasa na pinungka ni ompunta sijolojolo tubu na marharoroan sian Baringin.

Martantan ma baringin, Mardangka hariara.
Horasma tondi madingin, Matangkang ma manjuara.
baringin

Baringin di alun-alun Jogjakarta

beringin

20161202_142708

Pohon beringin di lokasi parkir karyawan  PT. Multi Bintang Indonesia.Tbk –  Tangerang

Najolo ninna molo manortor angka namarbaju jala ro angka dolidoli sian horong ni paribanna (anak ni pamoruonni huta na patupa ulaon i), molo nunga lomo roha ni si doli jala ditodo rohana siboruadi gabe dongan saripena dibaringini ma siboruadi.

Disolothon ma bulung ni baringin tu samara (obuk na nidandan – nuaeng on didok sasak).

Molo nunga di baringini siboruadi pintor udutan ni natuatua nama angka nahombar tu pardongansaripeon ni ianakhon.

Tarsongon i ma jolo na boi pinaandar taringot tu Hariara dohot Baringin.

Tabe mardongan olop olop.

St. Sampe Sitorus/br Sitanggang (A. Hitado Managam Sitorus).

Read Full Post »

%d bloggers like this: