Feeds:
Posts
Comments

Archive for the ‘Budaya & Adat Batak’ Category

BE.334 “Nasa jolma ingkon mate”

Nasa jolma ingkon mate. Ingkon mago sibuk i. Na mangolu ingkon mate Asa tung denggan muse.
Daging on do gabe bangke jala ingkon do malangke.
Asa sogot bangkit i
Tu hasangaponna i

Molo sian hakristenon, di hita naporsea di Jesus Kristus, dos do hamatean i, jala ingkon sude do mamolus i. Parhitean do hamatean laho mandapothon Tuhanta.

Tutu sian habatakhonta marimbar do hamatean, alani i hombar tu panuturion ni angka natuatua, dison pinaandar pangantusion taringot tu hamatean diangka naung hot ripe (berumah tangga):

MATE PURPUR
Monding baoa manang borua naung hot ripe alai ndang mardakdanak dope di goari ma i mate purpur .

Mate purpur ma na humansit di parmate ni jolma di ngolu ni halak Batak. Mate Purpur digoari do di halak Batak songon “siranggapuri” siborgat hau na somardangka so marranting so marbulung, ndang adong be sihirimon, soadong be sitatapon manang sipaimaon. Na marlapatan ndang adong tubuna anak manang boru.(tidak memiliki keturunan)

Tung hira na so dapot do apulan na matean i alani balga ni arsak i. Asa molo tung masa pe si songon i, holan angka hata apul-apul do disi lumobi sian Hulahula dohot Tulang.

MATE PUNU
Mate Punu didok ma i tu ama manang ina na monding so marindang anak baoa, holan boru do ianakhonna.
Songon i do huroha pangalahona. Ai so adong na manorushon dohot manguduti goarna (gotap tarombo i).
Hansit do si songon on molo sian adat-paradaton ni hita Batak. Molo najolo jala masa dope i di tingki on, ndang boi dope dibahen maralaman si songon on. Asa holan angka hata apul-apul do panghataion di si, lumobi sian angka horong ni hula-hula dohot horong ni tulang.

MATE MANGKAR
Mate Mangkar (Makkar) didok ma i tu na monding nunga marindang anak dohot boru (sudah memiliki putra dan putri) alai ndang adong dope ianakhonna i naung hot ripe. (Diantara anak-anaknya BELUM ADA ada yang berkeluarga).

MATE HATUNGGANEON
Mate Hatungganeon didok ma i tu na monding marindang anak dohot boru (sudah memiliki putra dan putri), ianakhonna i nunga adong na hot ripe alai ndang adong dope pahompuna. (Diantara anak-anak sudah ada yang menikah, namun belum memiliki cucu).

PhotoGrid_1500554864542

MATE SARIMATUA
Mate Sarimatua didok ma i tu na monding marindang anak dohot boru, ianakhonna i nunga adong na hot ripe jala nunga marpahompu alai tutu ndang dope sude singhop marhasohotan ianakhonna i (adong dope sisarihononhon)

MATE SAURMATUA
Mate Saurmatua didok ma i tu na monding marindang anak dohot boru, ianakhonna i nunga singhop sude hot ripe jala nunga marpahompu sian anak, marpahompu sian boru.

MATE MAULIBULUNG
Mate Maulibulung didok ma i tu namonding naung marnini marnono (anak dohot boruna nunga marpahompu) jala ndang adong sian pinomparna i namanjoloi ibana (tidak ada diantara keturunannya yang lebih dahulu meninggal dunia).

Songon i ma goar ni hamatean ala ni nian unang ma masa hasuhuton mangidohon “nangkok” na so tartuhukna, (disada marga monding sada ama holon boru do ianakhinna, toho tutu nunga marhasohotan boruna i, dipangido asa SAUR MATUA ulaon partuatni namonding i. Molo di hita Sitorus ndang masa sisongoni ate 😀).

Tabe, St.Sampe Sitorus/br Sitanggang.

Berbagi pemahaman ini didukung oleh:

Lapo NATABOI
Kuliner Resep Warisan Leluhur di
Jl. Lingkar Palem Semi, Ruko CBD No 22 (Depan Giant) Palem Semi Karawaci-Tangerang-Banten.
HP 0813 9685 0000, 0812 9052 462
Buka setiap hari pkl 09.30 – 21.30 Wib.
https://goo.gl/maps/mMvnkJtydcq

Advertisements

Read Full Post »

PERINGATAN PENULIS.

Dilarang keras mengcopy posting tulisan ini ke blog, web site atau sosial media termasuk mendistribusikan untuk keperluan mendapatkan keuntungan material maupun non material. Kalaupun ingin berbagi pengetahuan, harap mencantumkan link. Hindari plagiat

AHA DO DENGKE SIUK, BOASA DIDOK DENGKE SIUK JALA ISE DO NATALUP PASAHATHON DENGKE SIUK ?
Disada ulaon unjuk naniadopan, haroroniba boru rap hundul dohot pigapiga halak natuatua(paramangtuaon dohot paramangudaon), topet nasida ninna piga-piga hali manjaha angka nahugurathon siala dicetak ianakahonna. Dinamarkombur hami taringot diangka nanigurathon i didok nasida mansai las rohana alai taruli angka sundut naumposo marhite nanigurathon i.
Tep… ditingki marsipanganon tarbege nasida protokol ni Parboru manggorahon dengke nasahat tu nasida. Tangkas digorahon parjolo Dengke Siuk sian nasida na samarga (namarhaha maranggi), laos diuduti Dengke Siuk sian horongni Hulahula dohot Tulangnasida (sude ma digorahon).
Ninna sahalak sian natuatuai na rap dohot au i mandok: asalma dipandokhi amanta Protokol i, ai nasodiboto do nuaeng aha nanidokna i ?
Tapaima ma jolo boha do annon gora gora ni Protokol ni Paranak ninna donganna natuatua nadilambunghu.
Manggora ma tutu Protokol ni Paranak, didok : hujalo hami do dengke siuk sian Hulahulanami Rajai Raja….., hujalo hami do dengke siuk sian Tulangnami Raja i Raja……. (dohot namangihut simpul panggoraon nasida).
Simpul marsipanganon disunghun nasida pandapothu taringot tu panggoraon ni Protokol di dengke napinasahat ni horongni Hulahula dohot Tulang nasida i. Mansai manat do ahu mangalusi, biar rohangku “namanguji” pangantusionhu do nuaeng natuatua on, ai tangkas do diboto nasida nahurang ampit panggoraon ni Protokol i, alai boasa ma pola tung  sunghunonna pandapothu taringot tusi.
Hupaandar pangantusionhu, hudok: Santabi di hamu angka natuatuaniba, molo hupaandar pe pangantusionhu ba idope nabinoto, alani i molo hurang dasip ma tuturi hamu annon au asa lam dasip pangantusionhu ninghu mangalusi.
Pos roham ndang namanguji langkam hami, asa rap mamora do hita dipangantusion ninna nasida huhut rap mengkel. Bah.. dicopy among ate pandohanhi ai somal do hugurathon i diujungni nahugurathon ninghu huhut mengkel.
Dungi hupaandar ma pangantusionhu taringot tu dengke siuk songon na hugurathon ditoru on:
Najolo ninna diangka namarhaha maranggi, jala sasiulaon molo masa ulaon unjuk (Pangolihon Anak manang Pahutahon Boru) sai masiurupan do nasida laho patupa nahombar tusi.
Molo Pangolihon Anak dipapungu ma indahan siuksiuk hombar tu naung ditolopi nasida isarana sapandahan.
Tingki somasa dope manghuhus partenda(molo di Porsea nahumaliangna gabe parkarejo ni partenda nama namangalompa indahan), indahan naung dilompa do dipasahat manogot niulaon i tu hasuhuton. Dipudian ni ari boras nama dipasahat alana parkarejoni partenda nama namanghuhus indahan, nunga ummaloan nasida.
Huingot dope tingki pesta unjuk pangoli ni abang Aller Sitorus dohot angkang boru Napitupulu, ro do pinomparni anggidolinami Op. Tumonggur sian Dolok Nagodang ima Op. Uluan dohot Amani Uluan rap dohot pinompar ni Op Paralatan- Lumban Tongatonga Silamosik mamboan boras siuksiuk jala denggan do disurathon i disada buhu laos dipasahat do tu amonghu. Boasa pola disurat di sada buhu ? Ai marpardomuan do i tu pandohan Sisolisoli Uhum, Siadapari Gogo. Haduan molo marulaon nasida tontu patupaon ni amonghu ma songon napinatupani nasida i.
Nuaeng on gabe Partumpak di jabu nama digoari, alana ndang dialaman nasida pasahat tumpak alai dijabu do ndung mulak sian gedung laos udurma tu jabu laho manjanghon parumaen. Hami pe pinomparni ompunta Raja Mandidang Sitorus na di Jabodetabek on, somal do huulahon hami i. Molo pe ndang apal boi ampit sude manjanghon parumaen di jabu, ba sipareahan ma i tujoloanni ari asa lam tu singhopna.
Molo Pahutahon Boru (somal dihamian -Porsea nahumaliangna ulaon sai ditaruhon jual do) dipapungu ma dengke siuk laho boanon jala pasahaton ni Parboru tu Paranak. Di Jabodetabek on di hami pinomparni ompunta Raja Mandidang Sitorus hupatupa hami dope papungu dengke siuk, tutu nunga dos rohanami marhite uang rupiah disurat be ma di buhu dengke siuk laos dipasahat ma tu suhut. Huingot dope pamuli boru hami ima Christina br Sitorus tu helanami marga Sihombing tangkas dope hupadalan hami buhu dengke siuk.
Dengke napinasahat ni Parboru i ma Ulu ni Dengke sihasagathonon ni Paranak, ido asa masa tabege manghasagathon Ulu ni dengke.
Juhut napinatupa ni Paranak i sasintongna sihasagathonon ni Parboru do i, ido asa somal didok manganhon juhut ni boru.
Laos hupaandar ma pangantusion taringot tu Panjuhuti songon naung ginurathon di blog tanggal 28/05/2009 naung salpu, nion ma parhitean tusi:
Pangantusionhi ditolopi nasida jala dituturi au taringot tu Panjuhuti, Dengke Siuk dohot Dengke nabinoan ni Hulahula, tamba ma parbinotoan laos nigurathon ma ditoru on.
DIULAON UNJUK ISE DO NAMAMBOAN DENGKE  ?
Ninna sasintongna namamboan dengke tu ulaon unjuk holan 3 horong do ima:
1. Parboru (dengke nabinoanna dipasahat tu paranak ima nagabe Ulu ni dengke, alus ni Panjuhuti)
2. Hulahula ni Parboru(Tulang ni siboru namuli, sijalo Upa Tulang), dengke nabinoanna dipasahat tu na marhasohotan (bere dohot ibeberena i -pengantin). Tarajumi dengke upa do i, ai namangupa na hot ripe i do nasida.
3. Hulahula ni Paranak(Tulang ni Pangoli), dengke nabinoanna i dipasahat tu bere dohot nagabe boruna i- penganten). Tarajumi dengke upa do i, ai namangupa na hot ripe i do nasida.
Tolunsa namamboan dengke on tangkas do pasahathon dengkena. Dihita halak Batak Toba di Jabodetabek on ndang dipamasa be pasahathon dengke. Gabe taringot au tutu didonganta Batak Simalungun adong do pulik partingkian pasahat dengke tu penganten.
Nuaeng on nunga sude horong ni Hulahula dohot Tulang mamboan dengke, natape toropan hasuhuton na patupahon. Ai tingki mangontang (pasahathon Gonghon dohot Joujou) pe nunga laos didok: unang pola loja nantulang/inangbao mangalompa, nunga hupatupa hami dengke siboanon muna, dipasahat parhobas nami pe annon di gedung, ninna).
Toho do tutu diparade do dengke i jala dipasahat laho boanon ni boruni Hulahula/Tulang alai ndang adong sian nasida na tangkas pasahathon dengke i tu hasahatanna. Gabe dos do songon parbue  nabinoanna i parsahat ni dengke i ndang diupahon tu naimbaru hot ripe i.
PhotoGrid_1500554864542
Mulak ma muse tu dengke siuk.
Molo boti napasahathon dengke siuk holan Parboru namarhahamaranggi do.
Onma deba imbarta tu halak Batak Simalungun, alai pinarrohahon namasa di Medan tangkas dope Tulang ni Pangoli dohot Tulang ni Siboru Muli pasahat dengke nabinoanna i. Mangoli berenami Faldo Hasian Gultom tu borunami boru Pasaribu, dipangido Protokol do asa borhat hami pasahathon dengke nabinoannami, suang songoni nang Tulang ni borunami (Hulahula ni Pasaribu marga Nainggolan).
Jadi tingki dinamanggora dengke  siuk Parboru holan dengke ni nasida namarhaha maranggi do digorahon dengke siuk.
Paranak pe ndang adong manggorahon dengke siuk.
Mangihuthon Panuturion ni natuatua dohot naniparrohahon ulaon di Medan, porlu sulingkitonta namasa di Jabodetabek on:
  1. Dang gorahononhon dengke  nabinoan ni Hulahulanta dengke siuk. Ai ndang siuksiuk ni nasida i tu hita, tarlumobi molo Parboru hita ndang na mangurupi hita nasida laho patupa ulu ni dengke. Boha ia tauhal jala dos ma rohanta mambuhai asa holan 3 horong i ma namboan dengke jala tangkas ma dipasahat tu hasahatanna.
  2. Molo ndang boi dope tabuhai jala songon sinuaengon dope sude horong ni Hulahula dohot Tulang mamboan dengke jala ndang pulik partingkian pasahathon i, holan digorahon ma ba  denggan ma tadok: Hujalo hami do dengke nabinoanni Hulahulanami Rajai Raja…., Hujalo hami do dengke nabinoanni Tulangnami Rajai Raja… (dohot udutna).

Dihorongni Paranak pe nian dos ma songon na di Parboru.

Namangihut dihita suhut Paranak, molo pajagarhon laos rap manghasagathon dengke ditingki marsipanganon hita namarhaha maranggi, boru/bere, dongan sahuta, naeng ma nian tangkas dihatahon Ulu ni dengke. Ai na rap manghasagathon do hita di Ulu ni dengke napinasahat ni Parboru (nasida manghasagathon juhut na tapatupa, hita manghasagathon Ulu ni dengke napinasahat nasida).
Molo pe tapajagar dengke tu Hulahula dohot Tulangnta ba nadenggan ma molo tadok dengke lompan.
Tarsongon ima pangantusion na boi pinaardar tu tongatongata, atik tung adong pangantusion namarimbar denggan ma tapaandar asa rap mamora jala lam dasip pangantusionta taringot tu Panjuhuti, Dengke Siuk, Dengke Binoan ni Hulahula.

Tulisan ini saya posting menjawab pertanyaan dari sekian banyak pembaca yang bertanya kenapa sekian lama belum ada postingan baru ?

Sebenarnya banyak hal yang ingin kutuliskan, namun saya punya kelemahan dalam mengetik agak lambat, ditambah waktu luang untuk menulis terbatas. Hampir setiap mempersiapkan postingan saya harus begadang mengetik hingga diatas pukul 00.00 Wib. Kebayang kan kesalnya ketika Plagiator dengan seenaknya hanya copy paste edit sedikit dan tidak malu posting lagi seolah tulisannya.

Kalau mau jujur , apa sih susahnya mencantumkan link ? Semoga tumbuh kesadarannya.

 

Tabe mardongan olopolop.

St. Sampe Sitorus/br Sitanggang(A.Hitado Managam)

Read Full Post »

Somalna diparmonding ni natuatua dipatupa Parrapoton laho mangido panuturion sian angka raja nahombar tu partuatni natuatua na Sarimatua manang Saurmatua digoari ma i Tonggo Raja. Martonggo jala mangalehon panuturion ma di si angka Raja, jala ditontuhon ma angka ise namangulahon ulaon i.
Di Tonggo Raja i ma ditimbangi jala ditontuhon:
1. Rumangni ulaon (sarimatua/saurmatua) hombar tu hagabeon ni natuatuai.
2. Boanna (ola) hombar tu rumang ni ulaon dohot “haradeon”(kemampuan) ni hasuhuton, ai ndang sai pangidoon ni raja boanna lombu manang horbo hape ndang tartuhuk ni suhut.
3. Mamalu Ogung Sabangunan do manang uning-uningan.
4. Angka nahombar isarana Sijagaron, Dondon tua dohot lan naasing.

Ulaon Marria Raja ima mangontang jala pabotohon tu angka Raja asa ria laho mangadopi ulaon. Somalna Marria Raja dipatupa Parboru molo pamuli boru ulaoan ditaruhon jual(dialaman ni Paranak), asa udur jala ria ma nasida borhat tu huta ni Paranak. Baliksa molo ulaon dialap jual (dialaman ni Parboru) tontu Paranak ma na Marria Raja.

Panuturion nahea nijalo sian natuatua, dihasuhuton nanaeng borhat mangudurhon uduranna do masa dipatupa Ria Raja, asa ria nasida mangadopi ulaon i.

Nanaeng hudok, “hurang ondol” (kurang tepat) do hata Marria Raja diparmonding ni natuatua.

Catatan: hentikan plagiat, silahkan baca, sebarluaskan namun jangan akui sebagai tulisan anda. Adong dihita ila ate, unang sai copy paste alai taokuhon hita pangguratna.

 

Tabe mardongan olopolop

St. Sampe Sitorus/br Sitanggang (A.Managam).

08129052462

Read Full Post »

Boasa nuaeng on diparadatonni PARSIBONA (Parsadaan Raja Sitorus Dohot Boruna) Jabodetabek ndang dipamasa be ulos holong tu angka pinompar na so marhasohotan dope ?

Mangalusi sunghunsunghun i, jumolo ma jo pinaandar hata ni ompunta sijolojolo tubu na mandok :

Pitu batu martindi, sada do sitaon nadokdok.

Laos ihut tusi adong muse pandohan:

Molo balga dengkena tontu binanga na pe balga ma.

Dia ma lapatanni ?

Manang boha pe ninna hasuhuton do hapeahan ni saluhutna, molo torop ulos dijalo hasuhuton tontu ganjang ma nang pisopiso sipasahaton nasida tu horong ni Hulahula dohot Tulang.

Mangihuthon pangantusion i dohot mamparrohahon namasa diangka ulaon Sarimatua suang songoni nang ulaon Saurmatua, sipata tubu ungutungut sian horong ni Hulahula dohot Tulang siala dihilala pisopiso napinasahat ni hasuhuton hurang ganjang tu toropni ulos najinalo nasida.

Hinorhon i mangaranap angka natuatua dohot bidang Adat diparadaton ni PARSIBONA Jabodetabek asa unang pola mardalan ulos holong tu pinompar na so marhasohotan dope, tarlumobi ma i tu horong ni pahompu. Pangaranapion i dipaandar ma i diparrapoton jala ditolopi laos dipamasa ma i diparadaton ni  PARSIBONA Jabodetabek.

Namamungka uhum naimbaru do hita PARSIBONA Jabodetabek?

Mangihuthon panuturion ni angka natuatua, najolo ninna molo ulaon Sarimatua holan 2 bulung do mardalan ulos, ima Ulos Saput ni namonding dohot Ulos Tujung ni namabalu.

Diulaon Saurmatua dohot Maulibulung marimbar ma antong jala tarsongon on ma pardalanna:

  1. Ulos Saput sian Tulang ni namonding.

Dung simpul pasahat Ulos Saput borhat ma hasuhuton pinomparni namonding i pasahathon Pisopiso naganjang.

  1. Ulos Sampe Tua sian Hulahula tu namabalu.

Dung simpul pasahat Ulos Sampe Tua borhat ma hasuhuton pinomparni namonding i pasahathon Pisopiso naganjang.

  1. Ulos Panggabei dipasahat ndung maralaman ima sada bulung sian Bona Tulang dohot sada bulung sian Bonaniari, lompit do ulos i dipeakhon diginjang ni tutup batang.

Ulos Panggabei marlapatan do i patuduhon naung gabe do na monding i jala songon dalan parhitean mangido tu Amanta Debata asa anggiat umgabean pinompar ni natuatua i tu joloan ni arion. Laos di tingki na pasahat ulos i ma didok umpasa :

        Balga ninna tiang ni ruma Umbalgaan tiang ni sopo

        Nunga gabe antong natuutua on sai umgabean ma angka na sundut naumposo.

Ulos na pinasahat ni Bona Tulang dohot Bonaniari  molo dibuat pomparan ni na monding i di goari ma i ulos sahat, alai boi do tong mulak muse tu Bona Tulang/Bonaniari jala digoari ma i ulos mulak.

Molo gabe ulos sahat (dibuat) tontu gumanjang ma pisopiso sipasahaton (pinomat dos dohot tuhor ni ulos i). Molo tung pe gabe ulos mulak tong do mardalan pisopiso alai tutu moru ma ganjang ni pisopiso i (sadia nataronjar sian roha ni hasuhuton nasa i ma dilehon tu napasahathon ulos i).

Ia na masa nuaeng on di tano parserahan di pangarantoan on, ulaon Sarimatua pe nunga sude horong ni Hulahula dohot horong ni Tulang, pasahathon ulos tu pinompar ni na monding i. Digoari ma ulos napinasahatna i ulos holong, ninna parbue ni holong ma ulos i.

Molo pinarateatehon do pardalan ni ulos on, nunga tung malobihu. Sude do horong ni Hulahula songoni nang Hulahula ni na martinodohon (marhahamaranggi), Hulahula ni anak manjae, horong ni Tulang (sian Tulang, Tulang Robobot, Bona Tulang) sahat tu Bonaniari pasahathon ulos. Sipata do pinarrohahon Hulahula dohot Tulang i pasahathon ulos, ris tu sude pomparan ni na monding i.

Alai adong do tong namambahen ulos i di pasahat tu perwakilan pomparan ni namonding (ndang tangkas songon dia ruhut dohot parture ni hasahatan ni ulos i, sipata dipangido tu hasuhuton asa nasida ma mangaturhon hasahatanna). Olo do sipata torop ni ulos i lobi sian 10 pola sahat tu 17 ulos.

Alus ni i rontu pasahaton ni pomparan ni namonding i ma muse pisopiso tu ganup horong Hulahula dohot Tulang na pasahathon ulos i, olo ma godang ni pisopiso i pinomat ratusan ribu sahat tu jutaan rupiah.

Mardomu tusi tubu ma “kesan na bersifat negatif” isarana :

  1. Ndang marlapatan ulos i (terkesan diumbar) ai hira songon namanjalo kado manang manuhor ulos nama
  2. Suda partingkian, olo sipata sahat tu pukul 16.00 asa borhat tu udean.
  3. Gabe manambai boban / nadokdok situhukhon ni pomparan ni na monding i.

Sipata ndang haru diantusi pinompar ni na monding i paradaton, sai diunduhi songon dia panghataion ni natuatua di tingki na martonggo raja, hape Pitu batu martindi sada do sitaon nadokdok ima pinomparni namonding i.

  1. Boi do tubu hansit ni roha di pomparan ni na monding i, isarana :
  2. Molo ulos i dipasahat tu perwakilan. Tu ise do hasahatan ni ulos i ? tu sihahaan, tu siampudan manang tu nagumodang mangharugihon ulaon i do?.
  • Olo do sipata adong pinompar ni na monding ndang mandapot ulos holong i, ala dao huta ni Hulahula na gabe ndang boi ro, ia so i, Hulahulana sian suku na asing na so mangantusi adat ni halak Batak (angka Hulahula ni anak manjae ma on).
  • Ndang sai do uli ni ulos i, sian Hulahula ni anak sihahaan ala paradongan dipatupa ulos na arga, sian Hulahula ni si anggian ala pogos gabe roa, ala ni i tong do manghorhon tu na hurang denggan panghilalaanni si anggian i.
  • Molo hurang ganjang pisopiso i sipata adong ma ungutungut ni Hulahula dohot Tulang.

Ninna, sahat tu partingkian on di horong ni pomparanni Sipaettua suang songon i di pomparan ni PANGULU PONGGOK NAIBORNGIN, nangpe naung sarimatua manang saurmatua namonding i ndang masa mardalan ulos  tu pinomparna, alai ianggo ulos saput dohot ulos tujung/sampetua ingkon mardalan do i.

Molo boti, mangalusi sunghunsunghun na di ginjang i, ndang namamungka uhum naimbaru hape hita PARSIBONA Jabodetabek.

Tabe mardongan tangiang.

St. Sampe Sitorus /br Sitanggang (A. Hitado Managam Sitorus)

Read Full Post »

Mandar Hela.

Tudia do pangheon mandar hela ?
Mandar.jpg
Jotjot tabege ndung sahat diampehon Parboru Ulos Hela (najolo digoari Ulos Sampe Tua) laos diuduti mangampehon Mandar Hela tu helana laos didok: amang hela ringgas hamu marhobas molo adong namasa dihami   Hulahula muna.
Molo huingot di haetehonhu, somalna di Toba Uluan, angka ama na laho maradat (mangadopi ulaon adat) sai dihadang do mandarna. Holan Suhut tangkas dohot Hulahula/Tulang tangkas do namamboan jala manghadang Ulos diganup ulaon.
Hasuhuton namarhaha maranggi dohot namardongan tubu, somalna marhandehon mandar do, lam ma horong ni Pamoruon (Boru dohot Bere) tangkas ma antong nasida marmandar ai parhobas do nasida jala mandarhononna do mandar i, pinomat dililithon di gontingna.
Boasa namarhahamaranggi dohot namardongan tubu manghadang mandar ?
Dirajumi do haroro nasida nalaho manghobasi ulaon naniadopanna. Ai manang boha pe ninna hahaangggi dohot dongan tubu do namanghobasi ulaon.
Tarsongon i ma filosopi ni manghadang mandar hela.
Promo Merdeka Pesanan
Jadi molo tung huhadang pe mandar hela on diulaon paborhathon natuatuai DR. Sutan Raja DL Sitorus, hurajumi namangarade do au laho marhobas asa une jala tiur mardalan ulaon i. Molo tung pe ndang ampit iba marhobas, mauliate ma ala naung denggan diaturhon angka natuatua angka  parhobas laho manghobasi ulaon i.
Boha hita di tano parserahan ? Sipareahan ma on tujoloan ni ari
Tabe mardongan olopolop.
St. Sampe Sitorus/br Sitanggang(A.Hitado Managam)

Read Full Post »

Pertanyaan

Di pesta Unjuk adat Batak Toba sai parjolo do dipasahat Ulos Pansamot ipe asa ulos hela, hape na binereng di adat Batak Simalungun sai parjolo do dipasahat nasida Ulos Hela ipe asa Ulos Pansamot. Dia do sasintongna na tingkos jala boasa songon i ?

Jawaban

Mangalusi sunghun sunghun i laos pinaandar ma hatorangan namarpardomuan tu ulos sipasahaton ni Parboru diulaon parunjuhan (pesta unjuk).

Ulos Hela najolo digoari do on Ulos Sampetua, ima ulos napinasahat ni natoras (pangintubu) ni boru tu boru dohot helana ditingki parunjuhan paboahon naung ditolopi parboru parsaripeon nasida i. (Tanda sah naung dijangkon nasida helana i – sebagai akte tanda sah menikah sesuai adat Batak).

Ulos Pansamot lapatanna ali/balen ni sinamot. Molo godang sinamot boi ma paranak mangido Ulos Pansamot saguru tinodo ni rohana.

Aut sura maiturun/mangalua sian dos ni roha ni Parboru dohot Paranak jala ndang pola adat nabalga, boi do holan boru dohot hela diulosi. Marlapatan boi do ndang mangalean Ulos Pansamot parboru ala ndang manggarar sinamot paranak.

Molo MARTINASAK (ADAT NA GOK) jala dialaman ni parboru pesta (Ulaon Dialap Jual), horbo parjuhut jala lombu singkat ni dengke, sian horbo ma jambar ni Parboru jala sian lombu ma jambar ni Paranak, ingkon jumolo ma pasahaton ULOS PANSAMOT ai nunga jumolo dipasahat SINAMOT himpal. Mangihuthon sian i ma gabe dihasomalhon angka natuatua sijolojolo tubu ma jumolo pasahat Ulos Pansamot sian Ulos Sampe Tua (Ulos Hela nuaeng on didok).

Panuturion ni natuatua sasintongna tarsongon on ma parsahat ni ulos:

  1. Molo Ulaon Ditaruhon Jual (Paranak bolahan amak), jumolo do pasahaton ni Parboru Ulos Sampetua (Ulos Hela) i pe asa diuduti Ulos Pansamot.
  2. Molo Ulaon Dialap Jual (Parboru suhut Naniambangan), jumolo ma Ulos Pansamot ipe asa diuduti Ulos Sampetua (Ulos Hela). Jala ido umbahen digoari parboru suhut Naniambangan.

Catatan: Nuaeng on rumang ni ulaon Ditaruhon Jual do, alai sai adong dope namandok Parboru suhut Naniambangan. Ndang tingkos pandohan i. Suhut Naniambangan Parboru molo ulaon parunjuhan i dialaman nasida (Parboru “Bolahan amak”).

Najolo tarlumobi di Toba Uluan, sai Paranak do bolahan amak, jala sada hailaon do di Paranak molo pesta unjuk di huta ni Parboru. Laos boha pe pogos ni Paranak, laos boha pe mora ni Parboru sai umsangapan do dirajumi molo Pesta Unjuk di huta ni Paranak.

Najolo ninna ia ulos siparadeon ni Parboru ima nadigoari ulos “si tot ni pansa “ ima:

  • Ulos Sampetua (Ulos Hela).
  • Ulos Pansamot dohot Ulos Pargomgom.  Ulos Pargomgom ima dipudian niari sihadangon ni inanta i diangka ulaon namangihut. Sian i ma botoon ni halak naung adong ianakhonna naung hot ripe.

Di napasahat Ulos Pansamot dohot Pargomgom Parboru tu Paranak tangkas do pulik jala ondol hatana. Isarana molo tu ama asa margogo nasida mangalului pansamotan laho marmudu-mudu Hela dohot Parumaenna (pintor boi dipajae). Isarana molo tu ina asa digonggom Parumaenna gabe Ina siboan las ni roha dohot dame ibana ditonga-tonga ni horong ni paranak. Nang pe 2 bulung ulos napinasahat ni Parboru i, alai dietong 1 bulung do i ai sada do goarna ima Ulos Pansamot Ulos Pargonggom.

  • Ulos Pamarai dipasahat tu Pangabarai (Nadohot manuhuk) nadokdok somalna Haha/Anggi ni Paranak tangkas (Amangtua/amanguda ni Pangoli).
  • Ulos Simanggokhon dipasahat tu namanggohi pangidoan ni Parboru. Ninna najolo molo “alot panghataion taringot tu sinamot”, didok horongni Parboru ma: Tole ma pos do roha nami nagohan ni berenami on pangidoannami i. Somalna Simanggokhon on ma na mangelekhon pasahathon sadia godang ma sinamot naboi pasahaton nasida.

Dihorong ni Parboru pe adong ma nadigoari Simolohon ima namangolohon elek-elek pangidoan ni Paranak. Ninna didok inong ni Pangoli ima tu Simolohon, Among ndang paurahonmu au namborum dihapogosonhi, olohon damang ma elek-elek nami i among. Molo nunga digabehon simolohon nunga simpul marhata sinamot.

Taringot tu Ulos Sihunti Ampang ima Ulos Tutup Ampang, sasintongna dipasahat  ulos i holan molo rumang ni ulaon i Dialap Jual.  Molo Ulaon Ditaruhon Jual, ndang pasahaton ni Parboru Ulos Sihunti Ampang.

Molo tung adong pe ulos imbar ni si tot ni pansa i (isarana molo di Parsadaan Raja Sitorus Dohot Boruna Se JABODETABEK godang ni ulos sijaloon/sipasahathon ima 11 bulung), imbar ni na 5 bulung i digoari ma i ragi-ragi ni sinamot.

Hombar tu panuturion ni natuatua panuturi i, adat na masa di donganta halak Simalungun do na hot (tingkos) ai goarna pe Pesta Parunjuhan, sintuhu ni ulaon i ma na hot ripe anak ni paranak dohot boru ni parboru. Tanda naung hot ripe nasida diadat Batak ba diampehon Parboru ma Ulos Sampe Tua (ima nadigoari nuaeng on Ulos Hela) tu boru dohot helana. Ndung ampe Ulos Hela tontu natoras ni pangoli i ulosan ni Parboru ma dohot tangiang pangidoan tu Tuhan i asa margogo Paranak mansamoti ripe naimbaru i. Mansamoti marlapatan do i manogu, pajaehon laos mamodai asa hot jala togu parsaripeon ni anak dohot parumaen i.

Songon tudos tudos tarhira dos ma molo marujung sahalak naung hot ripe sai parjolo do dipasahat Ulos Saput sian Ulos Tujung. Boasa ? Ala Ulos Saput i do napatuduhon na adong naung onding sian tongatonga ni hasuhuton. Ndung i pe tontu adongma namabalu, pasahathon ma Ulos Tujung.

Tarsongon i ma filosopi dohot makna ni pasahat Ulos Sampe Tua (Ulos Hela) dohot Ulos Pansamot. Molo pe nuaeng di hita halak Batak Toba ndang apala songon i be taulahon ba sipareakhan ma i.

Songon i ma na boi pinaandar ditonga tonganta, botima.   

Tabe mardongan olop olop, pinaandar sian

NATABOI Kuliner Resep Warisan Leluhur

Jl. Lingkar Palem Semi, Ruko CBD No 22 (Depan Giant) Palem Semi Karawaci-Tangerang. HP 085211990551, 08129052462
Buka setiap hari pkl 09.30 – 21.30 Wib.
https://goo.gl/maps/mMvnkJtydcq
Akses tol keluar gerbang tol Karawaci, mudah dijangkau dari segala penjuruNATABOI Kuliner Resep Warisan Leluhur

Ahli BPK Tombur.png

St. Sampe Sitorus/br Sitanggang (A.Hitado Managam Sitorus)

 

Panuturi:

  • Tulang Bonar Siahaan (Op.Titang Siahaan)
  • Angka natua tua panuturi.

Read Full Post »

Di grup Facebook Partungkoan, adong sunghun sunghun sian dongan sapartungkoan amang Ruhut Hartono Sinaga :

Horas amang… Martukkar pikkiran ake…. Dia do bedana Pamakkean Ulos di Siamun dohot Dihambirang mauliate.

https://www.facebook.com/groups/1683519571867516/

Hombar tu sunghun sunghun i di son pinaandar ma pangantusionhu marhite naniadopan jala dituturi natuatua :

St. Sampe Sitorus /br Sitanggang (A. Hitado Managam Sitorus)

St. Sampe Sitorus /br Sitanggang (A. Hitado Managam Sitorus)

Disada tingki hea ma au ro mangadopi gonghon ulaon Pesta Unjuk, haroronghu aleale ni paranak. Huhasomalhon do manang tudia au laho ingkon do tamba parbinotoan.

Topet hatiha i andorang so masuk tu gedung huida sian suhut parboru manghadang ulos diabarana parhambirang. Ala huida sahalak ama natuatua jonok tu ingananhu jongjong antar hupagogo soaranghu mandok: “Ai songon na so somal do niida hasuhuton di Pesta Unjuk manghadang ulos dihambirang” ninghu. Pintor mardalan natuatua i mandapothon amanta namanghadang ulos dihambirang i laos dipadenggan natuatua i gabe disiamun ulos i. Ndung i didapothon au jala didok: mauliate amang, ai marga aha hamu tahe ? Ninna. Hualusi Sitorus amang.
Didok natuatua i, poso dope hamu alai tung tangkas do diparrohahon hamu angka ruhut-ruhut paradaton i ninna.
Hudok santabi amang au pe parsiajar do jala ala so somal do huida asa pola hudok songon i jala huida pardompahan ni amang tongam jala pos rohanghu na tuturan ni amang hami angka sundut naumposo. Mengkel amang i huhut dipatorang ma songon on:
Ia ulos somalna dihadang di abara parsiamun. Molo pola dihadang di abara parhambirang napatuduhon na tung dokdok do parungkilan/sitaonon ni namanghadang ulos i siala namasa niadopanna. Isarana molo tilahaon manang mate purpur rodi mate punu, ndang sala molo dihambirang dihadang ulosna. Sandok diulaon habot ni roha na tung mansai dokdok do masa manghadang ulos dihambirang, ninna.
Sian panuturion ni natuatua i gabe tamba parbinotoanhu.

Nian somal do ra tabege jala taparrohahon halak mandok asa di abara parsiamun ulos dihadang, alai ndang hea dope napatoranghon boasa songon i.

Laos ima nahupaandar di partungkoan on. Alani i molo tabereng halak manghadang ulos di abarana parhambirang hape ndang ulaon habot ni roha nadokdok, denggan ma tapaingot asa dihadang ulosna i diabarana parsiamun.

Ambal ni hata molo naeng marulaon hamu, unang lupa manuhor tigatiganami on ate.

Promo Merdeka Pesanan

Tabe mardongan olop-olop

St. Sampe Sitorus/br Sitanggang (A.Hitado Managam Sitorus).

Read Full Post »

Older Posts »

%d bloggers like this: