Di tingki ulaon parunjuhan diboan parboru do dengkena dipasahat ma i tu paranak ima na digaori Ulu Ni Dengke (molo paranak patupa Panjuhuti). Sian dengke napinasahat ni parboru tu paranak dipasuhi ma i manang piga-piga dengke, i ma annon laho siupahonon ni paranak tu parumaen dohot anakna ndung sidung ulaon parunjuhan (pesta unjuk) i, Sahat tu partingkian on di piga-piga luat (huta) adong diope na mangulahon on i ma na nidokna manjanghon parumaen.
Diadopi angka dongan tubu (dongan sabutuha), dongan saripe ni hasuhuton do ulaon manjanghon parumaen i. Ido umbahen adong umpama: Tua ni salaon, salaon situa-tua, Tua ni halak natorop sabutuha, Molo adong sibagion godang dongan marpardua, Molo adong sijuaon torop dongan manjua. Di hami Pomparan ni Raja Mandidang Sitorus na di Jabodetabek sahat tu taon 2015 diulahon hami dope Ulaon Manjanghon Parumaen, mulak sian gedung parpestaan rap udur dope hami pinompar ni Raja Mandidang tu jabu ni suhut sihabolonan laho patupa Ulaon Manjanghon Parumaen.
Ndung sahat di jabu jumolo ma mangarade Paranak tangkas (amanta i dohot inanta) i maima anak dohot parumaenna bongot tu jabu, dijolo ni pintu pintor dijomput inanta i ma parbue pir tu simanjujung ni parumaen dohot anakna laos dihatahon :
Pir ma tondi ni parumaen dohot anakhu hujanghon hami dibagas na mar ampang na marjual on, sigomgom pangisina.
Ndung i dipahundul ma laos pintor dihobasi boru ma laho marsipanganon. Ndung singhop sude dibilang ma tangiang laos diuduti ma mangupa.
Dihatahon na mangupa ma songon on hatana (amanta i ma mandok hatana, inantai mangupahon) : Nuaeng pe dianakhu dohot parumaenhu nunga hundul hamu diatas lage tiar. Sai tiar ma panggabean, tiar ma parhorasan sipadopadoponmuna tu angka ari na naeng ro. Dison dengke sitio-tio dohot indahan na las peak diatas pinggan puti: asa puti so haliapan, puti so hapurpuran panggabean dohot parhorasan sahat tu pagian ni ari. Dison indahan nalas, las ma rohamuna, dengke simudurudur, sai siripe na rap mudurudur ma hamu tu joloan on mangudurhon anak ma hamu dohot mangudurhon boru tupagian ni ari, asa songon nidok ni sijolojolo tubu ma dohonon:
Pir ma toras ni pongki bahul-bahul pansalongan Pir ma tondi ni parumaen siboan tua ma marangkup sinadongan Bintang narumiris ombun na sumorop Maranak pe hamu riris marboru antong torop Andor halumpang ma togu-togu ni lombu Na rap nang saur matua hamu pairingiring pahompu, botima.
Panuturion na jinalo sian angka natuatua, ninna ndang sidohonon ni na mangupahon hata umpasa: Sahat saha ni solu. Alana ingkon raja panggohi do natalup manghatahon i (manggohi), annon pe i dihatahon dipangujungi ni ulaon i. Dung sidung diupahon jumolo ma na niupa i manganhon ipe asa rap mangan ma natorop na mangadopi ulaon pangupaon i.
Dung simpul marsipanganon, marhaliang ma angka natuatua, mangalehon hata pasupasuan tu na niupa i, manggohi adat pasupasu naung dihatahon di tingki pesta unjuk di arianna i. Ima ninna na ginoaran ni angka ompu na parjoloi panggohi ni ulaon,
Mangampu pasupasu i tangkas do ingkon na ni upa i do (parumaen dohot anak), ipe asa dipasinghop natutua di na saompu i (yang dituakan dikelompok suhut) ulaon i marhite hata umpasa:
Sahat saha ni solu, sahat ma tu bontean. Leleng ma hita mangolu jala tongtong diramoti Tuhan, Ima tutu. Laos dipaujung ma marhite tangiang.
Catatan:
Molo nadiulahon hami pinompar ni Raja Mandidang Sitorus, sidung marsipanganon andorang so mandok hata, jumolo ma pasahat tumpak angka na martumpak di jabu, ndungi dipasahat ma ulos sorpi tu angka na so dapotan ulos herbang di alaman (ulaon parunjuhan) nangkin arian. Ipe asa diuduti na mandok hata.
Sada ruhut na mansai uli do nian i alai boha ma bahenon ndang tarulahon be i, sian dos ni roha dipudian ni ari mamungka taon 2016 ndang rap udur be hami patupa i alai holan Paranak na satampuk (suhut na marhahamaranggi tangkas) na ma mangulahon i (mulak sian gedung tu jabu). Molo disunghun boasa ? Ndang tarbahen be rap mangulahon ala ni dao ni gedung tu jabu jala nunga mangarerak be angka parjabuan ni hami pinompar ni ompui Raja Mandidang sipata suhut di Tangerang, hape angka hami namarhaha maranggi di Jakarta dohot Bekasi.
Songon i ma pinaadar ruhut Manjanghon laos Mangupa Parumaen, pangidoan dohot sosososo tapatupa ma Ulaon Manjanghon laos Mangupa Parumaen i, molo so tarbahen sa parompuon ba pinomat na satampuk (saompu).
Tarsongon dia do pasinghophon adat na hombar tu parmonding ni natuatua siala tingki parmondingna ndang tarbahen mangulahon adat ? Ima pigapiga suhunan na ro tu iba.
Alus hombar tu na masa di Bona Pasogit di Silamosik Porsea ningon ma jolo, masa do Ulaon Pasidung Ariari ni Natuatua dipatupa tu partingkian na mangihut ndung tu udean na monding i jala ndang na imbaru be siala pigapiga pinompar ni ompui Raja Silamosik marugamo Islam (malay ninna di huta). Molo di donganta Muslim ndung monding sasahalak ba ingkon pintor tu udean do andorang so bot ari. Alani i Ulaon Adat na hombar tu parmonding ni namonding i dipatupa ma tu ari mangihut hombar tu haradeon jala dos ni roha ni pinomparni natuatua i.
Tarsongon dia ma pardalan ni Ulaon i ? Dos do songon ulaon nasomal alai tutu ndang disi be bangke ni namonding i. Molo pangulahon ni adat i ndang marimbar.
Di tano parserahan Jabodetabek pe nunga diulahon pigapiga keluarga on, na dohot iba manghobasi i ma Ulaon Pasahat Adat Saur Matua Pasidung Ariari ni Dr. Ir. Tarmiden Sitorus, MSc, Phd (Op Panangian doli) dipatupa diari Minggu 24 September 2023 na salpu maringanan di Grand Ballroom Lumire Hotel & Convention Center, Senen Jakarta Pusat.
Siala nunga mago sorimago Covid i, nunga geas be partingkian laho patupa Ulaon Pasidung Ariari. Botima
Jotjot do ro suhunan taringot tu ise do na talup manghadang Ulos Ragi Idup manang sipata digoari Pinunsaan. Pigapiga dongan mandok ingkon naung hea pangolihon anak alana dapotna Ulos Pinunsaan siala ali ni na pasahat sinamot do. Pandohan nasida molo so hea do pe pasahat Sinamot ndang talup sasahalak manghadang Ulos Ragi Idup. Mangihuthon pandohan i molo holan boru do tubuna ndang talup sasahalak manghadang Ulos Pinunsaan ?
Hombar tu angka panuturion na jinalo sian angka natuatua sasintongna Ulos Pinunsaan patuduhon hatuaon ni na manghadang i do. Molo dihadang sahalak ama Ulos Pinunsaan naung marganti goar ma i sian Ama /Amani adui gabe Ompu /Ompu Ni manang Ompu Si adui. Laos adong do tong pigapiga natuatua panuturi mandok nang pe so marpahompu dope, boi do sasahalak manghadang Ulos Pinunsaan siala : 1. Ulaon Sarimatua manang Saurmatua, ibana anak sihahaan ni na monding i. Gariada abitna pe Ulos Pinunsaan do. 2. Ulaon Pangoli Anak manang Pahutahon Boru, ibana Suhut Bolon (Paranak manang Parboru tangkas).
Panuturion na jinalo i ombuk do tu Garis Besar Ruhut-ruhut Paradaton PARSIBONA JABODETABEK naung digurithon di Buku Parsadaan Raja Sitorus dohot Boruna se Jabodetabek taon 2019 laos dison pinaandar ma gombar ni na tarsurat di buku i.
Nirajuman mansai ringkot paandarhon pangantusion on asa unang be adong “perdebatan” taringot tu ise do na talup manghadang Ulos Ragi Idup manang Pinunsaan. Pusuk jambuna na talup manghadang Ulos Ragi Idup di ulaon adat Batak (NDANG HOLAN DI SITORUS JABODETABEK) ingkon naung marpahompu, manang ibana Suhut Bolon (manang diulaon partuatni natuatua pinomat Sarimatua,ibana anak sihahaan ni na monding i).
Tangerang 23 September 2023
Tabe mardongan olopolop St. Sampe Sitorus/br Sitanggang (A.Hitado Managam)
Panuturion na jinalo sian angka natuatua taringot Raja Naniambangan (Suhut Naniambangan), sasintongna masa HOLAN di ulaon Pesta Parunjuhan Ditaruhon Jual do (Paranak Suhut Bolahan Amak, Parboru ma Suhut Naniambangan).
Parboru Raja Na Ro tu alaman ni Paranak, ndang sude boi pangidoan ni Hulahulana (Parboru) “dipenuhi” Paranak ala mangihuthon adat na masa di huta ni Paranak.
Alani ndung pigapiga ari sidung Ulaon Parunjuhan, borhat do Paranak manopot Hulahulana (Parboru) laho Manggohi las ni roha ni Parboru molo tung pe di Parunjuhan ndang apala singhop songon na di roha ni Parboru. Haroro ni Paranak i digoari ma i Mebat (Marebatebat). Mandok mauliate ma Paranak tu Hulahulana (Parboru) ala une do mardalan Ulaon Parunjuhan i. Dipudian ni ari didok halak ma on MARUNE. Laos dipudian ni ari “berkembang” ma pandohan PAULAK UNE.
Jadi sasintongna PAULAK UNE na taulahon sinuaeng secara philosofis ima mandok mauliate tu Hulahula (Parboru) ala une do sude mardalan ulaon parunjuhan i nang pe Parboru gabe Suhut Naniambangan (yang datang mengikuti ruhut paradaton na masa di huta ni Paranak). Contoh: molo di par Samosir, Osang i sai himpal do i tu Parboru jala ido pasahaton nasida tu Hulahulana (Tulang ni boru muli). Hape secara umum di par Toba sai jambar ni Boru ni Paranak do Osang. Ala ndang apala songon na masa di huta ni Parboru i na sahat tu nasida, on ma asa tubu pandohan : Marsolu ni hundulan, manang Sidapot solup na ro (jala tarjalo roha ni Parboru do i ala Ulaon Ditaruhon Jual, aut sugari Dialap Jual ba solup na masa di huta nasida ma na masa).
Marhite Panuturion na jinalo i, holan di Ulaon Sidua Hasuhuton ima Ulaon Parunjuhan (Pesta Unjuk) rumang ni ulaon Ditaruhon Jual do adong pandohan Hulahula/Raja Naniambangan Molo didok di ulaon na asing Hulahula Naniambangan, na asal dipandok na ma i. Dirimpu molo Hulahula ba Naniambangan ma.
Jadi molo ulaon na monding songon dia do ? NDANG adong Naniambangan disi alana sisada hasuhuton do i. Jadi boha do posisi ni Hulahula dohot Tulang ? Alani i andorang so mangido panuturion Raja Parhata ni Suhut, tangkas ma di hatahon: Namasa di hami pamoruonmuna Raja Sitorus, di namanariashon sanghap nami laos mangido panuturion sian saluhut hamu horong ni Hulahula dohot Tulang nami, ULUAN NI PANGHATAION (namanguluhon saluhut horong ni Hulahula dohot Tulang/lawan bicaranya Raja Parhata Suhut) ampe tu …… (nuang on taon 2023 tu Hulahula do naung dihasomalhon), alai nang pe songon i mardos ni roha ma hamu Hulahula dohot Tulangnami.
Note: Mangihuthon filosofi nian molo Ama do na monding ba Tulang ma Uluan Ni Panghataion, molo Ina na monding Hulahula ma Uluan Ni Panghataion. Asa domu ma i tu hata tingki Tintin Maranghup (sada ma hita maradophon borunta on, Molo hamu di jolo hami ma di pudi, baliksa molo hami di jolo hamu ma di pudi). Huingot di periode kepengurusan ni mendiang Tubu Bonar Sitorus (Op Halomoan) tarsongon on dope na masa di hita.
Songon i ma pinaandar asa rap mamora hita dipangantusion jala lam tu dasipna panghobasionta tu pomparan ni ompunta Raja Sitorus dohot Boruna di Jabodetabek.
Tabe mardongan tangiang. St. Sampe Sitorus/br Sitanggang (A.Hitado Managam)
Disada tingki manghatai angka ama andorang so Tonggo Raja parmonding ni sahalak ina naung Sari Matua. Tongon hundul ahu tarjonok tu nasida, haroroniba pariban (sian horong ni boru ni Hulahula ni namonding i). Diparrohahon nasida hutangi panghataion nasida laos ditogihon asa rap hundul dohot nasida, marsitandaan binoto ma nasida dongan sahuta ni namonding i. On ma sada sian topik panghataion nasida : Nuaeng on di tano parserahan pamasuk bangke ni na mate mangkar dohot na mate Sari Matua dohot Saur Matua tu batangna nunga gabe dos jala di dok mompo laos dipaima haroro ni Hulahula dohot Tulang jala somal diulahon ndung sidung Tonggo Raja.
Didok sahalak ama na rap hundul i ma : Nahuboto marimbar do i, alai ndang huboto patoranghon dia imbarna, tasunghun ma jolo amanta Sintua Sitorus ai hupaihutihut naginurathon ni amang Sitorus di blog sai dipatorang amang on do philosofi namanghorhonsa gabe boi dapot roha. On pe rade ma jolo amang paandarhon tarsongon dia do pangantusion taringot tusi, ninna.
Ala nirajuman parsiajar dope iba, nialusan mandok ai rap marsiajar do hita diangka pangantusion taringot tu adat Batak i, ai olo do diboto dongan hape ndang binoto, nabinoto niba i ndang dope diparsiajari dongan, alani i nadenggan do molo rap rade hita marsiajar asa lam dasip jala rap mamora hita diangka pangantusion.
Jadi molo dipangido hamu ahu patoranghon taringot tusi, ba na huboto do na naeng dohononhu, olo do marimbar na huboto tu na binotomuna. Tarsongon on ma:
Mompo tu rumarumana
Namargoar mompo ima pamasuk natuatua tu rumarumana. Ise do na tardok natuatua ? Ima naung marpahompu. Ai molo marujung ngolu sahalak ama naung marpahompu didok ma i : nunga matua daba among Op si adonan. Alai molo na so marpahompu dope na monding i, somal didok ma i: 1. Molo dakdanak sahat tu na so marianakhon dope di dok ma: nunga mate daba si adui (goarna). 2. Molo ama/ina naung marianakhon di dok ma: nunga monding/marujung ngolu daba Ama/Nai adui (panggoaranna). Jadi dohonon mompo molo nunga digabehon angka Raja partuat ni na monding i pinomat Sarimatua, jala ingkon paimaon do haroro ni Hulahula i pe asa Mompo.
Bongot tu jabujabu(batang)na
Molo tirket parmonding ni na monding i ndang dope pinomat Sarimatua, hasuhuton namardongan tubu do pamasuk na monding i tu jabujabuna (batang/peti jenazah) ndang pola paimaon haroro ni Hulahula dohot Tulang asa pamasuk tu jabujabua (batangna) i, tung so jadi goaran i Mompo. Jadi andorang so patolhashon habot ni roha dohot mangido panuturion pe nunga bongot na monding i tu jabujabuna (batangna). Jala ndung sidung mangido panuturion ndang pola tangkasan ni Hulahula dohot Tulang parpeak ni na monding i di batangna. Molo pe patupa acara pangapulion nasida ba nadenggan ma i alai ndang na mangulahon ulaon mompo nasida.
Songon i ma na boi pinaandar hombar tu panuturion na hea jinalo sian angka natuatua.
Umbegesa na pinaandar i laos dihatahon amanta na mandok nangkin: i do, songon i do nanaeng hu dok na so hu boto do manghatahon.
Lam mamora ma tutu hita diangka pangantusion asa lam dasip angka panghobasionta mangulahon adat Batak na mansai uli i.
Tabe mardongan tangiang.
St. Sampe Sitorus/br Sitanggang (A. Hitado Managam)
Ompung (kakeknya) ayahku bergelar Ompu Gani tercatat dan diakui oleh Pemerintah Hindia Belanda sebagai Kepala Kampoeng dan Radjapadoea Silamosik.
Bukti asli surat Bisluit pengakuannya bisa saja hilang namun surat lain yang dikeluarkan Pemerintah Hindia Belanda dengan jelas mencantumkan bahwa O.Gani sebagai Kepala Kampoeng dan Radjapadoea Silamosik. Terlampir adalah surat keterangan tertanggal 7 Desember 1938 mengenai pembentukan kampung baru (Sosor Matio) yang masuk ke wilayah pemerintahan O.Gani selaku Kepala Kampoeng dan Radjapadoea Silamosik.
Surat keterangan tertera diatas membuktikan sekaligus mematahkan argumen bila ada orang yang mengklaim bahwa kakek mereka yang menjadi Kepala Kampoeng dan Radjapadoea pada masa lampau.
Generasi ke 12 Sangkar (Op Gani) Sitorus, masa hidup 1895-1944
Belakangan Jepang mengalahkan Belanda hingga kemudian Jepang menyerah kepada Sekutu dan Indonesia merdeka. Sistem pemerintahan desa (kampung) tidak lagi mengenal Radjapadoea hingga kini tinggal sebutan Kepala Desa.
Semoga mencerahkan.
St. Sampe Sitorus/br Sitanggang (A.Hitado Managam)
Disada tingki adong ma suhunan ro sian dongan tarsongon on:
Molo ro pamoruon tu bagasta mamboan sipanganon namarsaudara, di na laho mulak nasida boha do uhum na ?
Mangalusi suhunan i niuji paandarhon pangantusion, diharoro ni pamoruon tontu adong ma nanihatahon ni nasida. Hombar tusi pasahaton ma angka hata nauli nadenggan. Ndung simpul i mangampu ma nasida jala naeng marhehe nauli ma laho muli (mulak) tu huta nasida. Poda na tangkas ni jalo sian angka natuatua suang songon i natoras niba, INGKON paborhaton do boru marhite parbue pir, parbue gabe jala dumenggan do ninna inanta parjabu i (nyonya tuan rumah) manghehei inganan ni boanboan nasida naung diisi parbue pir, parbue gabe tu simanjujung ni edana manang boruna na ro i (menaikkan perkakas tempat mereka membawa makanan yang telah diisi beras ke atas kepala istri dari tamunya).
Molo di Bonapasogit suang songon i nang di tano parserahan, angka ina na tangkas manjalo poda tontu denggan do diulahon songon na pinaandar i, alai olo do sipata ndang dipaborhat pamoruonna ala hurang pangantusion taringot tu uhum paborhat boru marhehe nauli sian bagasna.
Di tano parserahan Jabodetabek, marpigapigahali pinarrohahon tingki ro pamoruon Patua Hata mamboan sipanganon namarsaudara, sidung ulaon laos mulak songon i inganan ni sipanganon i (ndang maralus, ndang dipaborhat). Ise do sasintongna na ingkon paingothon suhut ? Nian angka ina do na ingkon mangharinghothon on. Alai ndang sala angka ama namarhahamaranggi masipaingotan jala denggan do simpul marsipanganon Protokol manangkasi hasuhuton marhite hata na lambok paingothon asa unang lupa mangisi parbue pir, parbue gabe tu inganan boanboan ni pamoruon na ro i (unang pos roha hape ndang dipatupa). Marhite na pinaingot ni Protokol, ndang mulak sambing (kosong) inganan boanboan ni pamoruon i.
Songon parsiajar iba, sai niuji do mangulahon napinarsiajaran. Alani i molo ditodo ahu gabe Protokol, sai pinaingot do angka ina (namarhahamaranggi ni suhut tangkas) asa dipaborhat annon pamoruon marhite mangisi parbue pir, parbue gabe tu inganan boanboan nasida nangkin.
Molo diontang hita mangadopi haroro ni pamoruon denggan ma tasosoi hasuhuton asa diparade hian parbue pir, parbue gabe laho paborhat pamoruonna i di na laho mulak tu bagas nasida.
Asa rap tapaandar ma angka hasomalan namasa di luatta be, dalanta laho manambori asa lam tu dasipna pangantusionta taringot tu adat Batak na mansai uli i.
Tabe mardongan tangiang.
St. Sampe Sitorus/br Sitanggang (A.Hitado Managam Sitorus).
Di tano parserahan masa do dipatupa Ulaon Mangido Tangiang Paborhathon (sipata binege adong mandok tangiang borhatborhat). Boasa ? Siala naeng borhat ma Parboru pahutahon boruna tu huta ni Paranak (rumang ni ulaon DITARUHON JUAL) jala ndang saluat nasida. Isarana Parboru di Jakarta, Paranak di Pontianak manang Bonapasogit. Somalna ulaon mangido tangiang paborhathon i dipatupa ndung sidung Partumpolon manang molo ndang masa di huria nasida Partumpolon ba ndung sidung ulaon Patua Hata dohot Marhusip Nagogo ma dipatupa.
Suhunanan, boha molo Paranak do na borhat tu huta ni Parboru (rumang ni ulaon DIALAP JUAL) ? Dumenggan ma nian ndung mulak Paranak mamboan anak dohot parumaenna dipatupa ma ulaon PATANDAHON PARUMAEN di huta nasida (isarana pesta unjuk di Siantar, ala Paranak par Cilegon dipatupa ma patandahon parumaen di Cilegon). Ima dalan ni Paranak patandahon parumaenna tu situan natorop. Tarajumi ma i dalanta rap manghalashon naung tipak hot ripe anak dohot parumaen i. Ulaon i ulaon ni Paranak (sisada hasuhuton) ndang parsidohot be Parboru di ulaon i alana nunga singhop adat di huta nasida, holan Paranak na ma na patandahon parumaenna tu angka dongan tubu, boru, bere, dongan sahuta aleale dohot angka punguan nanidohotanna. Angka naniontangna pe dipartingkian on ma pasahat parbue ni holongna, dipatupa ma i marhite Rupiah na tinopa ni pamarentanta dohot nahombar tu AD/ART ni punguan.
Andorang so hari H (ari naung dibuhul) dipatupa ma ulaon Pasada Tahi angka namardongan tubu dohot boru/bere nasida. Disima ma dihatai partording ni ulaon, sipatupaon dohot angka parhobas laho manghobasi ulaon i.
Dison pinaandar ruhut (garis besar) ni Ulaon Patandahon Parumaen tarsongon on ma :
Denggan do molo dipatupa Partangiangan na hinobasan ni pangula ni huria. Angka namandohoti partangiangan i hasuhuton, dongan sahuria, dongan sahuta (undangan umum tontu ndang ro dope)
Simpul partangiangan diuduti ma Ulaon Patandahon Parumaen. Ndung jumpa tingkina marhuhuasi ma Protokol laos manggorahon asa masuk ma sude angka naniontang laos rade ma jongjong ala naeng udur ma Paranak mangudurhon anak dohot parumaen nasida.
Suhut Paranak mangudurhon anak dohot parumaen masuk tu inganan naung diparade laos hundul ma di hundulan naung di parade (aula, gedung tarsongon inganan mangido tangiang paborhathon Parboru pahuta boruna).
Protokol mamungka ulaon marhite Tangiang Pamuhai ndung i patariashon partording ni Ulaon Patandahon Parumaen.
PATORTORHON PARUMAEN, on do dalan ni Paranak patandahon parumaenna tu situan natorop. Manortor ma Paranak (among dohot inong) rap dohot anak dohot parumaen naimbaru marhasohotan i. Tontu dipinta ma gondang, mangaliat ma nasida, dinamangaliat i ro ma angka amangtua, amanguda, hahadoli, anggidoli dohot ompungna pe, namboru dohot ibotoni ripe naimbaru i mangolopolopi nasida. Suang songon i ma nang angka horong ni namardongan tubu, boru dohot bere na denggan ma molo dohot nasida manghalashon laos mangolopolopi.
Sidung patortorhon parumaen, diuduti ma marsipanganon. Nunga somal prasmanan songon resepsi nasional parmanganon, molo pe ndang prasmanan ba tong ma tahalashon.
Sidung parmanganon diuduti ma tu pasahat partingkian mandok hata laos pasahat parbue ni holong tu ripe naimbaru i. Denggan ma diaturhon protokol hombar tu naung ditolopi di ulaon pasada tahi (termasuk ma mangelehon partingkian tu angka undangan nasional, termasuk rekan sejawat/undangan ni ripe naimbaru. Molo adong do Hulahula tangkas ni Paranak manang Punguan ni Hulahula ni Paranak, denggan ma nasida na paampuhon tu Paranak laos ndung sidung mangampu, Hulahula i ma paujunghon marhite tangiang.
Tarsongon i ma Ulaon Patandahon Parumaen ni dahahang Aller Sitorus/br Napitupulu (A.Tamado) naung hupatupa hami diari Sabtu 02 Juli 2022 na salpu di Bintang Laguna Convention Hall, Cilegon Banten.
Denggan ma tatambori asa lam tu dasipna pangantusionta laho patandahon parumaen molo rumang ni ulaon dialap jual diluat nadao.
Tabe mardongan tangiang.
St. Sampe Sitorus/br Sitanggang (A.Hitado Managam Sitorus)
Partording ni Ulaon Mangain (Paampehon Marga) Hasuhuton Kel. Drs. Jansen Sitorus/br Napitupulu (Op. Ando), Jakarta 08 Juli 2022.
Catatan:
Holan Sitorus dohot Boruna dope namangulahon Mangain (ndang masuk dope Hulahula, annon pe pabotohon jala tangkas janghonon haroro nasida)
Pamuhai a. Paidua ni hasuhuton (Protokol) manangkasi haroro ni Raja Natinonggo (manggora angka Raja Natinonggo asa rap marnatampak di inganan naung diparade). b. Tangiang pamuhai.
Huhuasi sian Paidua ni hasuhuton (mandok mauliate di haroro ni angka Raja Natinonggo, Boru/bere/ibebere dohot Raja ni Dongan Sahuta) laos manunghun boha nunga mangarade Raja Natinonggo laho mambuhai ulaon hombar tu Gonghon dohot Joujou.
Raja Natinonggo pasada tahi pajolohon na patut sipatujolohonon.
Hasuhuton pasahat singkat ni tudutudu ni sipanganon marhite Ringgit Sitio Soara (11 lembar par 50.000 an).
Napinatujolo ni Raja Natinonggo mangaliathon singkat ni tudutudu ni sipanganon laos pasahathon parjambaron Ringgit Sitio Soara tu ondolan hasahatanna.
Napinatujolo ni Raja Natinonggo manise laos manunghun Hasuhuton taringot tu sintuhu ni ulaon. Hasuhuton patolhashon sanghap dohot pangidoan nasida tu Raja Natinonggo.
Napinatujolo ni Raja Natinonggo mangaliathon panghataion andorang so manggabehon pangidoan ni Hasuhuton.
Mangulahon Mangain (Paampehon Marga): a. Napinatujolo ni Raja Natinonggo manangkasi suhut tangkas na gabe Paranak ima amanta Drs. Jansen Sitorus/br Napitupulu (Op. Ando), diuduti manangkasi ianakhon tubu nasida (anak dohot boru). b. Napinatujolo ni Raja Natinonggo manangkasi Parompuon Raja Sibaruang, na rade nasida Mampe Marga (tamba bilangbilang nasida) c. Napinatujolo ni Raja Natinonggo manangkasi natoras (Parsinuan dohot Pangintubu) na rade do nasida anakna diain marhite mampe marga. d. Napinatujolo ni Raja Natinonggo manangkasi anak na naeng siainon (ampehonon marga), na rade ibana diain amanta Drs. Jansen Sitorus/br Napitupulu (Op. Ando). e. Mandok hata Natuatua ni Sitorus. (Mandok mauliate naung tangkas ditangkasi Napinatujolo ni Raja Natinonggo jala nunga tangkas maralus, alani i asa diuduti ma mangulahon Mangain Anak (Mampe Marga). f. Napinatujolo ni Raja Natinonggo manjomput parbue pir laho mangulahon/ patupahon ulaon mampe marga laos mangaliathon Parbue Pir, Parbue Gabe, Parbue Siribur-ribur). Manjahahon Surat Keterangan Mampe Marga na dipatupa PARSIBONA JABODETABEK. g. Amanta Drs. Jansen Sitorus/br Napitupulu (Op. Ando) Pasahat Ulos Lampin ni anak na tubu magodang, ndung i diuduti marmeme, painumhon aek sitiotio, ndung i manjomput Parbue Pir, ndung i diuduti mangompa anak na tubu magodang. h. Parompuon Raja Sibaruang pasahat ulos laos mandok hata (tanda pengesahan) i. Pengurus PARSIBONA JABODETABEK (mewakili Pane, Dori, Boltok) pasahat ulos laos mandok hata (tanda pengesahan). Catatan: ulos ni Punguan Parompuon dohot PARSIBONA JABODETABEK dipatupa hasuhuton amanta Jansen Sitorus/br Napitupulu.
Hasuhuton pasahat Pagopago tu: Parompuon ni hasuhuton i ma Raja Sibaruang, Raja Boltok, Raja Dori, Raja Pane, Boru Sitorus (boru do sipudun rambu).
Pabotohon tu Hulahula. a. Napinatujolo ni Raja Natinonggo marboaboa tu Hulahula Napitupulu naung tubu magodang pahompu/bere nasida di amanta Drs.Jansen Sitorus/br Napitupulu (Op. Ando). Dipasahat partingkian tu Hulahula laho manghalashon. Mangarade ma Raja Sitorus manjanghon haroro ni Hulahula Raja Napitupulu laos dison ma diboan Hulahula tandok nasida, laos udutanna ma pasahat ulos parompa ni berena. Sidung Hulahula pasahat ulos dipasahat ma muse tu Raja Natinonggo.
Marhata Sigabe-gabe a. Raja ni Dongan Sahuta. b. Natuatua ni Sitorus c. Hulahula, laos nasida ma paampuhon tu hasuhuton.
Hasuhuton Mangampu. -Andorang so mangampu hasuhuton, denggan ma nasida pasahat Pisopiso tu Hulahula.
Mangampu perwakilan ni boru ni suhut (boru tubu)
Mangampu Hasuhuton
13. Paujunghon Ulaon Mangain (Mampe Marga) marhite Tangiang niuluhon ni Natuatua ni Sitorus.
Songon i ma pinaandar naung huulahon hami ari Jumat 08/07 nasalpu.
Tabe mardongan tangiang.
Napinatujolo ni Raja Natinonggo St. Sampe Sitorus/br Sitanggang (A.Managam_ Raja Dori Parompuon Raja Mandidang).
Sampe Sitorus (A. Hitado Managam)
Sampe Sitorus 