Di tingki on nunga hira dipados halak be ulaon na mangompoi jabu dohot manuruk jabu. Sasintongna marimbar do nian ruhut ni ulaon i. Umbalga do ulaon mangompoi sian manuruk jabu
Hadosanna (Persamaannya)
1. Ima sama-sama masuk jabu naimbaru manang baru di ingani jabu i.
2. Hasasampe (hasahatan) ni tudu tudu sipanganon (namargoar) somalna tu hula-hula do alai adong do luat napasahathon i tu Tulang ni parjabu (Baoa) molo ulaon mangompoi.
Imbarna (Perbedaannya)
Manuruk Jabu
1. Boido sada keluarga mangulahon ulaon manuruk jabu marpiga-piga hali. Misalna dipukka ibana muse sada bagas/jabu nabaru
jala pinda tusi.
2. Somalna parjuhuti na dang sigagat duhut alai namarmiak-miak (pinahan lobu) na bolon.
3. Dang adong ulaon “mompo” tar dos songon na mangan sibuha-buhai di tingki ulaon pamuli boru.
4. Scope manang naniundang angka tutur manang tondong terbatas do cukup yang dekat-dekat saja.
Mangompoi Jabu
1. Holan sahali do boi sada keluarga mangulahon ulaon mangompoi jabu jala jabu naung ni ompoan si tongka do
gadison jala i nama jabu sahat tu na Sari Matua / Saur Matua.
2. Somalna parjuhut i na sigagat duhut (lombu/horbo).
3. Di manogot ni ulaon i mardalan do ulaon na margoar “mompo” tar dos songon na mangan sibuha-buhai di tingki ulaon pesta unjuk, jala na dohot di ulaon manogot i holan angka pamili na sumolhot jala di tingki on ma di ulosi hula-hulana boru na marpesta i.
4. Scope manang naniundang mangompoi jabu nunga luas dari segi undangan, molo tu tingkat ni Tulang nunga sampe tu Bona ni ari.
Angka na porlu ulahononhon di ulaon namanuruk jabu.
(Molo di angka ruhut ni panghataion hira dos do di na mangompoi jabu dohot na manuruk jabu)
Najolo somalna hula-hula mamboan eme. Adong doi namangkunti jala adong bagian na so mangkunti. Biasana na somangkunti di suru nasida ma anakkonna manghallung ranting ni jabi-jabi manang hariara jala di dok “ On eme 30 belek” (marguru tu godang ni eme sipasahaton nasida tu hasuhuton). Molo paradongan do bagian ni boru olo do sipata horbo siluana, holan batahi ma di boan jala didok “ Sada horbo do on, ingananna di……………” (ALAI NAJOLO NA MA MASA SONGON I NUAENG ON NDANG BE TARLUMOBI DI PANGARANTOAN)
Asa ummura antusanta binahen ma jolo songon simulasi, contoh skenario di keluarga nami, Godangma pasu-pasu dipasahat Tuhanta tu hami kel. S.Sitorus/br Sitanggang, boi ma hupungka hami bagas naimbaru jala naeng ma inganan nami bagas i.
Konsep nami goarni ni ulaon on hugoari hami Manuruk Jabu do.
Ala ulaon las ni roha do on hu gonghon hami ma angka tutur jala ingkon tangkas do paboan di gonghon dohot jou-jou i na Manuruk Jabu (somalna di undangan di surathon Partangiangan Manuruk Jabu). Angka on ma na hugonghon hami: Hula-hula Sitanggang dohot Tulang Bao Hutapea, Tulang Doloksaribu dohot Tulang Rorobot Sirait, Bona Tulang Sirait ala rosu do parsaoran jala nidohotan punguan, hu ontang hami Punguan Sitorus, Boru dohot bere “DAMENTA”,
Punguan Parompuon Raja Mandidang Sitorus, Punguan Raja Sitanggang dohot Boruna Sektor 1 Tangerang Kota, Punguan PARNA Medang Lestari, Dongan Sahuta (Pengurus Parsahutaon Dos Roha dohot angka hombar jabu).
Hasuhuton Keluarga Besar Pomparan Ompu Tamado Sitorus, Punguan Pomparan Ompu Paralat Sitorus (hami namarhaha maranggi Ompu martinodohon).
Somalna sai di parnangkok ni mataniari do dibahen ulaon adat na manuruk jabu (termasuk manang na mangompoi), dimulai pukul 10.00 wib marhite kebaktian singkat na niuluhon ni pangula ni huria asa lam gabe bagas partangiangan.
MANJALO HARORO NI HULA-HULA DOHOT TULANG
Paidua ni Suhut ( Protokol A. James)
Loloan namarlas ni roha, di hita namarhaha maranggi suang songon i nang dongan sahuta nami tarlumobi di Bona ni Hasuhuton anggi niba Amani Managam, ala naeng ro nama Hulahulanta Raja Sitanggang suang songoni nang Tulangta Raja Doloksaribu dohot uduran namangihut asa mangarade ma hita manomu-nomu nasida di joloni pintu ni bagasta on.
Dihamu Hula-hula nami Raja Sitanggang dohot uduranna, Tulangnami Raja Doloksaribu dohot uduranna,suang songoni nang Bona Tulang nami Raja Sirait, nunga mangarade hami jala tomu-tomuon nami do hamu di pintu ni bagasnami, asa bongot ma hamu Rajanami.
Masuk ma hula-hula tu jabu ni boruna. Dibahen hula-hula ma parbue na pir (boras) di simanjujung ni hela dohot boruna di pintu masuk. Didokma:
“ On ma upa-upa gabe, upa-upa horas. Pirma tondi muna jala horas-horas mangingani jabu sibaganding-tuamuna on. Hipas jala horas-horas ma hamu didongani asi hohot holong ni Tuhanta Debata ”.
PASAHAT TUDU-TUDU NI SIPANGANON
Note: Molo Manuruk Jabu do goarni ulaon i, Hula-hula ma hasahatan ni tudu-tudu sipanganon. Alai molo Mangompoi Jabu do di dok goarni ulaon i, ba Tulang ni amanta par jabu i ma (Tulang nya yg punya rumah) hasahatan ni tudu-tudu ni sipanganon. Asa ta ingot ido sada dasarna molo matua (wafat) sada Ama ingkon jolo ro do Tulangna baru pe asa boi dimulai ulaon mompu tu ruma-rumana (peti mati) jala ingkon Tulangna do na mamastihon naung denggan manang daong parpeakna. Dung hundul angka tutur dohot sude sisolhot, dipasahat suhut ma tudu-tudu ni si panganon tu hula-hula. Adong do muse versi: sai parjolo hula-hula dohot horong ni tulang pasahathon dekke upa-upa dohot ulos tu suhut. Dung sae i pe suhut pasahathon tudu-tudu ni sipangaon tu hula-hulana. Aek godang ma tu aek laut, dos ni roha sibahen na saut. Di napasahaton tudu-tudu ni sipanganon dumenggan do molo jolo marsantabi tu horong ni tulang ni suhut (mangalapik hata).
Hata ni napasahat tudu-tudu ni sipanganon:
“Di ari nauli di bulan na denggan on, hupasahat hami tu hamu Rajanami Hula-hula Sitanggang tudu-tudu ni sipanganon na marsaudara, tudu-tudu ni panggabean parhorasan ma on, molo songon on pe na boi hupatupa hami laho pasangaphon hamu, las ma rohamu Rajanami. Jala songon hata ni natua-tua ma dohononnami:
Huta tanobato parasaran ni leang-leang,
Horas ma di hamu Rajanami di na manjalo, Horas ma di hami borumu na pasahathon. Botima. (Diolophon natorop – Imma tutu, Olopolop)
Hula-hula pasahat Dengke
Dung i dipasahat hula-hula ma muse dekke tu pamoruonna i. Songon on ma hata sidohonan ni hula-hula di napasahat dekke dohot ulos.
Hata Tingki Pasahat Dekke:
“Di son hupasahat hami tu hamu dekke sitio-tio, sai tu tiona ma ngolu-ngolu di hamu. Dekke sahat, dekke na ganjang ma on, asa sahat ma angka nauli nadenggan jala ganjang ma umur-muna. Songon i dekke simudur-udur ma on, asa sai mudur-udur ma hamu tongtong rap tu dolok tu toruan mangalului angka naringkot i ditumpak asi dohot holong ni Tuhanta i.”
Hata Tingki Pasahat Ulos:
“Nuaeng pe hupasahat ma ulos na ganjang on. Parhitean ma on, sai dilehon Debata ma ganjang ni umur di hamu di na manuruk bagasmuna on. Hatubuan ni anak dohot boru ma jabu sibaganding tua on di hamu, lumobi gabe bagas pamujion di Tuhanta Pardenggan basa i.” Asa songon hata ni umpasa ma tutu dohonon nami:
Andor ras ma tu andor ris, tubu di Dolok Purbatua,
Sai horas-horas ma hamu mangingani bagasmuna on, ditumpak Tuhanta Pardenggan Basa i.Tubu ma simarlasuma di Dolok ni Lobutua
Sai ganjang ma antong umurmu mangingani sibaganding tua on, sahat hamu tu na saur matua.
Sahat-sahat ni solu sahat tu Tigaras,
Sahat leleng hamu mangolu, gabe jala horas. (Botima!)Udutan ni Tulang ma. Dung simpul na pasahat ulos (termasuk molo tung adong sian horong ni angka tulang napasahat dekke dohot ulos) diparade ma sipanganon jala martagiangma laho marsipanganon.
Note: angka dekke bimoan ni horong ni hula-hula dohot tulang na asing dengke sahat nama goar ni i.
MARSIPANGANON
Tangiang marsipanganon sian hasuhuton. Ndung amen dohonon ni Protokol ma dai sira ni sipanganon :
Sitiktik marsigompa, golang-golang pangarahutna
Otik so sadia pe napinatupa ni hasuhuton, sai godangma pinasuna
Marjomuk ma hita.
Somalna tingki marsipanganon boi ma boru maneati angka na so marpanggoari ima ate-ate, jantung, usus dohot aliang-aling sian tudutudu ni sipanganon i laos huhut dipadalan (dibagikan).
MARBAGI JAMBAR
Dung sidung marsipanganon sungkunon ni hula-hula Sitanggang ma boa do partording ni tudu-tudu sipanganon naung di pasahat tu nasida.
Taringot tu parjambaron, sai jumolo do suhut (marhite protokol) parsangaphon hula-hulana didok, “Ba nunga hupasahat hami tu hamu Rajanami, hamu ma namangaturhon. Namangulahon ma hami”. Molo songon i, pintor olo do sipata didok hula-hula i songon on: “Sidapot solup ma hami. Di boto hami, di antusi hamu ruhut-ruhut ni parjambaron.”
Jadi dohonon ni Protokol ma, mauliate ma di Raja i, alai rajanami ia parjambaron na somal hupadalan hami di Sitorus songonon do.
Catatan : Parjambaron ulaon dijabu di Sitorus se Jabotabed sesuai Garis Besar Ruhut Paradaton
(buku PARSIBONA, 2004 hal 368 +373) sbb:
1. Namarngingi parsiamun : Hula-hula
2. Namarngingi parhambirang : Tulang
3. Osang parsiamun : Pariban (boruni hula-hula)
4. Osang parhambirang : Sude boru
5. Somba-somba : Angka Tulang dohot Hula-Hula
6. Soit : Sihal-sihal (termasuk dongan sahuta)
7. Ihur-ihur : Hasuhoton(suhut dohot dongan tubu)
Boi do molo tu hula-hula pintor di pasahat namarngingi sambariba, osang sambariba, satonga somba-somba, dos ni roha do i. Nauli jala nadenggan ma saluhutna i. Dipature ma jambar i jala dipasahat tu angka tutur.
Note: Jotjot ni parrohahon didok Hula-hula “ nga pature hamu ma di dapur “, suang songoni suhut pintor di suru boruna paturehon di dapur. (sipata bingung ma boru songon dia bahenonna parbagianna). Sasintongna ingkon tangkas do bagion i di jolo ni hula-hula,pinomat tangkas dihatahon Hula-hula parjambaron na somal di hasuhuton.
MARHATA SIGABE-GABE
Dung sidung marbagi parjambaron udutan ma dohot ulaon na mangihut muse i ma angka panghataion. Molo tung boi sai jumolo ma sian dongan tubu ni hasuhuton manungkun sintuhu ni ulaon, sintuhu ni indahan masak tu hasuhuton.
Jolo mardos roha ma jolo Hahadoli Raja Pane dohot Anggidoli Raja Boltok dohot Dongan Sahuta ise na gabe panise. Somalna molo di ulaon sisongon on dongan tubu do panise jala molo di Sitorus ala Dori do hasuhuton, jadi Raja Pane ma nagabe Panise. Dung i mardos roha ma sian horong Raja Pane ise nagabe Panise, misal di dos ni roha nasida Hahadoli A. Helen Sitorus (Samasir Sitorus) ma na gabe panise.
Di hasuhuton pe nunga marsiaturan ise na mangalusi sungkun-sungkun ni dongan tubu, isarana nunga dos roha nami Anggidoli A. Martin Sitorus (Robinson Sitorus) ma na gabe pangalusi (Parsinabung).
Manise/Manungkun haha doli Raja Pane (Samsir Sitorus / A. Helen Sitorus)
Ba mangkatai ma hita anggi doli.
Gonghon sipaimaon jou-jou si alusan, nunga hujalo hami gonghon dohot jou-jou mu jala nunga ro hami antong jala sahat tu bagasta namrampang namarjual on jala nunga hundul iba antong di amak tiar ba sai tiar ma panggabean parhorasan tu hita tu joloansa on bahenon ni Amanta Debata Pardenggan Basa i. Ba nunga bosur hami mangan indahan na las, minum aek sitio-tio, sagat mar lompan juhut huhut sombu minum tuak tangkasan, ba nuaeng pe anggi doli na manungkun ma hami di hata dohot lapatan ni sipanganon i :
Sai marangkup do inna nauli, na dengggani sai mardongan
Siangkup ni nauli dia ma dia ma nanaeng sitaringotan
Botima da Anggidoli.
Parsinabung-> Robinson Sitorus ( A. Martin )
Tutu do Hahadoli na nidok muna i, sai marangkup do nauli, mardongan na denggan. Jadi paboan ma tutu nuaeng siangkupna songon na hundul, sidonganna songon na mardalan. Adong do umpasa na mandok:
Mardangka bulung bira, Martampuk bulun tabu;
Sonang ma rohaniba, Molo tipak iba marjabu.
Ima namanggohi rohani dahahang on na salelengon gabe marhoi-hoi ibana anggiat dapot namanggohi rohana.Ba hinorhon ni pasu-pasu ni Tuhanta antong, ba;
Tolap do ibana sian Sibuluan, mardalan tu Tampahan
Dapotsa do naniluluan, jumpang na do na jinalahan.
I ma dalannna umbahen na hundul hita nuaeng di jabu na pinauli na on, jala nunga di ingani nasida bagas on. Namarningot ma hami di hata sipaingot namandok;
Labu pe labui, ndang asal suanhononhon
Jabu pe jabui, ndang asal inganhononhon
Ido alana umbahen na jinou hamu angka dongan sabutuha, hula-hula, boru, bere, dongan sahuta rodi angka ale-ale, asa rap hita antong martangiang tu Amanta Debata asa gabe jabu na marampang na marjual on, jala sai horas jala hipas dahahang on rodi sude keluarga mangingani jabu on.
Botima da Hahadoli.
Manise/Manungkun haha doli Raja Pane (Samsir Sitorus / A. Helen Sitorus)
Ba ianggo ido hape lapatan ni parpunguanta on na uli ma i tutu jala na denggan. Toho do i tutu na nidok muna i, naeng ma jabu na marsahala bagasniba i. Antong jabu sipabereng-bereng on jala jabu hinalomoan ni angka dongan sahuta dohot angka sisolhot ma jabunta on. Sai dapot ma antong songon ni dok ni umpasa ;
Mabaor aek puli. Sian tano ni Simamora
Hot ma jabunta on bagas nauli, Inganan marlas ni roha
On pe anggidoli sai manumpak ma Amanta Pardenggan Basa i sai di ramoti ma tongtong jabunta on, sai hotma bagasta on di batuna, togu di rangsangrangsang na jala momos di pangarahutna
Marbulung ia tandiang, Marboras ia singkoru
Sai gok ma jolma di ginjang, Gok nang mas di si dabu-dabu. Botima,
Di hita na marhaha maranggi, borunami dohot bere, suang songoni nang dongan sahuta nami , tarlumobi ma di hamu Tulang nami Doloksaribu dohot Hula-hula nami Sitanggang, nunga tangkas rap umbegesa hita partording ni ulaonta di sadarion on, jala na tong-tong dope nasida mangido tangiang sian hita naung ro mangadopi ulaon on, asa marsiaturan mahita ra indok rohanami songonon ma partordingna :
1. Mandok hata ma Hita namardongan tubu (termasuk Pomparan Raja Mandidang Sitorus)
2. Mandok hata ma Borunami, dohot Bere/Ibebere
3. Mandok hata ma dongan sahundulan nami Raja ni Dongan Sahuta
4. Dung sidung dongan sahuta, pasahathon nami ma partingkian tu Tulang nami Raja Doloksaribu, jala hamu ma Tulang
namangaturhon uduranmu (Tulang Rorobot).
5. Dung sidung Tulang nami Doloksaribu pasahathon nami ma partingkian tu raja i Raja Sitanggang, asa hamu ma namangaturhon
dohot uduranmu (Tulang Bao & PARNA), jala hamu ma Raja nami na laos pa ampuhon tu hasuhuton.
6. Mangampu hasuhuton
Boa di hita namardongan tubu suang songoni nang dongan sahuta tarlumobi Tulang Dolok Saribu dohot Raja i Hula-hula Sitangang nga denggan i didok rohamu ? (Biasana dialusi nga na denggan i).
Urutan No 1 s/d 3 mandok hata, dungi dipasahat Panise ma partingkian tu No 4 +5.
Note:
Dang jadi pangampu Dongan Sahuta, ai Raja do nasida jala na niontang do nasida. Artina digonghon pe nasida asa dohot do martangiang tu Amanta Debata asa di pasu-pasu hami hasuhuton.
Dung ris horong ni hula-hula mandok hata biasana di paampuhonma tu hasuhuton, dohononna ma: Nunga liat hami pasahat hata nauli hata nadenggan, asa ampu hamu martonga ni jabu.
Mauliate ma tutu Raja nami,
Suman tu aek natio do hamu, riong-riong di pinggan pasu,
Hula-hula nabasa do hamu, na girgir mamasu-masu.
Tinapu bulung nisabi, baen lompan ni pangula
Sahat ma pasu-pasu na nilehon muna i tu hami,
Sai horas ma nang hamu hula-hula.
Aek marjullak-jullak sian tonga-tonga ni batu
Jullak-jullak na i bahenon tu tabu-tabu laho boanon tu jabu
Hata-nauli hata pasu-pasu marhite tangiangmu namanghaholongi hami
Tarlumobi ma i sian Tulang dohot Hula-hula nami ampuon nami ma antong
martonga ni jabu, botima.
Songon i ma nang di hita, ala tingkina nama hita mangampu hata nauli hata nadenggan naung dipasahat tu hita, asa mangarade ma hita.
Pasahat Piso-piso dohot Pasituak Natonggi
Di hahaniba Amani Managam dohot angkangboru andorang so mangampu hita asa borhat ma hamu Pasahat Piso-piso dohot Pasi tuak Natonggi ni Hula-hulanta dohot Tulangta.
Note : Piso-piso tu Hula-hula dohot Tulang tangkas (gumodang ma tu na sumolhot ai laos alus ni ulos nasida i do i),
Pasi tuak Natonggi Hula-hula dohot Tulang na humolang, dongan tubu dohot dongan sahuta.
Hasuhoton Mangampu
Dung sidung pasahat pasituak natonggi udutan ma pangampuion
Partording ni Pangampuion
· parjolo ma boru, jongjong ma sude boru ni Pomparan Ompu Paralat Sitorus.
· paidua ni suhut, jongjong ma sude Pomparan Ompu Paralat Sitorus.
· Suhut sihabolonan Keluarga Besar Pomparan Op Tamado Sitorus alai parjoloma angka inanta soripada, parpudi ma Nai Managam dohot Amani Managam.
Note: Inti ni mangampu ima mandok mauliate tu sude tutur na ro suang songoni angka na denggan naung pinasahat ni nasida dohot hata nauli pasu-pasu marhite tangiang nasida. Dang pala adong dohonon hata tu bona ni hasuhuton (Amani Managam dohot inanta boru Sitanggang), holan mandok peop ma sude hata nauli hata nadenggan. Tongka pasingothon manang podaan diloloan natorop.
Molo naeng adong sidohonon (poda manang sipaingot) annon ma dung mulak tutur manang haduan ni titi ari.
Contoh : hata mangampu sian SUHUT (Amani Managam)
Dihamu Haha Anggi, Borunami dohot Berenami suang songoni nang Raja ni Dongan Sahuta, mauliate ma hupasahat hami di harentaon ni roha mu mangadopi gonghon dohot joujou nami, suang songoni di pambaenan mu nadennggan, sai Tuhanta ma nambalos sude na i, asa songon nidok ni umpasa ma dohonon:
Tampulan Sibaganding di Dolok ni Pangringan
Horas ma hita namarhaha maranggi marsipairing-iringan.
Tu hamu Tulang nami dohot Raja i Hula-hula nami,
Mauliate di sude nauli nadenggan naung pinasahat mu tu hami ianakkonmu.
Tangkas do hu panghilalahon hami burjumu marbere dohot marboru,
Dipasahat hamu Dengke Simudur-udur, Dengke Sitio-tio, Dengke Sahat
Dipasahat hamu ulos holong ulos si ganjang rambu.
Anggiat ma antong asi roha ni Tuhanta sahat ma tu hami pamoruonmu songon pasu-pasu naung pinasahatmu marhite tangiang dohot elek-elek tu Tuhanta Jesus Kristus.
Molo tung mardomu sirang pe hita pe annon sian bagas on, tangiang nami di hamu saluhut Tulang dohot Hula-hulanami sai di dongani Tuhanta ma hamu sahat tu bagasmu ganup marsada-sada. Asa songon ni dok ni umapasa m a dohonon:
Tinapu bulung nisabi, baen lompan ni pangula
Sahat ma pasu-pasu na nilehon muna i tu hami,
Sai horas ma nang hamu hula-hula.
Tarsingot tu Hata nauli hata nadenggan naung pinasahat mu
Abing ma i antong di abingan nami, Tuat dia abara nami, Jala hot ma i antong disimanjujung nami,
Asa songon ni dok ni umpasa ma antong dohonon nami:
Songgop si Ruba-ruba tu dakka ni Hapadan,
Angka pasu-pasu na ni lehon muna,
Sai dijangkon tondi ma dohot pamatang.
Mardakka Jabi-jabi, marbulung ia si Tulan
Angka pasu-pasu na pinasahat muna,
Sai sude mai dipasaut Tuhan.
Naung sampulu pitu, jumadi sampulu ualu,
Angka pasu-pasu pinasat muna hula-hula nami,
Di ampu hami ma di tonga jabu.Botima, Horas ma di hita.
Hatorangan tu :Tudu Tudu Sipanganon
Tudu-tudu sipanganon yang arti harafiahnya penanda perjamuan (bila dalam keadaan lengkap disebut na margoar atau bagian-bagian hewan yang diberi nama sesuai dengan yang berhak menerimanya dalam parjambaran atau pembagian daging hewan) adalah bagian-bagian tertentu hewan sembelihan yang diletakkan di tengah-tengah sebagai simbol penghormatan hasuhutan kepada undangannya khususnya hula-hula. Maksudnya: untuk menjamu hula-hula pihak tuan rumah tidak membeli daging kiloan (rambingan) tetapi rela mengorbankan nyawa satu ekor hewan. Sebagai balasannya hula-hula akan memberikan ikan (dengke) dan beras. (Dahulu disebut boras sipir ni tondi atau beras penguat roh, sekarang bagi komunitas Batak-Kristen harusnya disebut boras parbue atau beras buah kehidupan).
Sering kita saksikan pada jaman sekarang sewaktu menyerahkan tudu-tudu sipanganon atau penanda perjamuan pihak keluarga akan beramai-ramai memegang piringnya dan kalau mereka terlalu banyak jumlahnya akan saling memegang bahu, seolah-olah ada sesuatu yang hendak dialirkan. Padahal kesaksian orang tua-tua pada jaman dahulu tidak begitu. Tudu-tudu sipanganon cukup diletakkan di tengah-tengah ruangan di hadapan undangan terhormat!
Bagi kita orang Kristen lebih baik tudu-tudu sipanganon diletakkan di tengah tengah ruang agar tidak menimbulkan salah tafsir seolah-olah makanan itu memiliki kekuatan magis atau menjadi medium penyaluran berkat. Sebab tudu-tudu sipanganon itu hanyalah simbol penghormatan kepada undangan bahwa jamuan dilakukan dengan khidmad dan sepenuh hati. Tidak ada kekuatan magis yang hendak dialirkan di sana.
Pinadomuni (dirangkum oleh) : Sampe Sitorus, SE (A. Hitado Managam Sitorus)
Medang Lestari B3/K11 08129052462
Referensi & Daftar Pustaka :
1. Jambar Hata, T.M Sihombing, CV Tulus Jaya
2. Dalihan Natolu Nilai Budaya Suku Batak, Drs. DJ Gultom Rajamarpodang, CV Armada –Medan
3. Garis Besar Ruhur-Ruhut Paradaton Sitorus, Buku Parsadaan
Raja Sitorus Dohot Boruna (PARSIBONA) JABOTABED
4. Situs Partungkoan http://tanobatak.wordpress.com
5. St. D.P.Hutagalung/Br. Simarangkir (O. ni Salomo) http://www.rajaparhata.com
6. Literatur lain dan angka panuturion nu angka natua-tua.
mauliatema dihamuna akkanatua tuanami,namambahin insfirasi tu generasi muna akka hami naumposa.saiganjangma umurmuna.amin
pengertian saya tentang ketik pasahat tudu tudu sipangannon, ramai rami pegang piring jika terlalu banyak maka pihak keluarga akan saling memegang, bukan berarti seolah olah makanan itu mempunya kekuatan magis, sangat sederhana penjelasannya, ketika pihak hasuhuton bolon menyampaikan tudu tudu sipanganon maka tdk mglkin semua ikut memgang piring
tp cukup yg didepan saja, sebagai simbol bahwa semua keluarga yg ada disitu ikut menyampaikan maka mereka saling memegang, seolah olah semua sudah megang piringnya,
Ya, sesungguhnya cukup hanya suhut tangkas saja (keluarga inti)